ހައްދުންމަތީގައި ތަރައްޤީކުރާ ދެވަނަ އެއާޕޯޓު އިސްދޫ ކަލައިދޫގައި އެޅުމަށް ސަރުކާރުން ނިންމަވައިފިއެވެ. މިކަން އިޢުލާން ކުރެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު 2025 ވަނަ އަހަރުގެ އޮކްޓޫބަރު މަހު ލ. އަތޮޅު މާވަށަށް ކުރެއްވި ދަތުރުފުޅުގައި އެ ރަށު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ވިދާޅުވީ، ލ. އަތޮޅަށް ކުރެއްވި ދަތުރުފުޅުގައި އެންމެ ގިނައިން ރައްޔިތުންގެ ފަރާތުން ހުށަހެޅުނު އެއް ކަމަކީ އެއާޕޯޓުގެ ވާހަކަ ކަމަށެވެ. އެގޮތުން އަތޮޅުގެ ތިން ރަށަކުން އެއާޕޯޓެއް ތަރައްޤީކޮށްދިނުމަށް އެދެމުންދާކަން ފާހަގަކުރައްވައި، ރައީސް ވިދާޅުވީ އެއާޕޯޓު ތަރައްޤީކުރުމުގައި ސަރުކާރުން އެންމެ ބޮޑު އިސްކަމެއް ދޭނީ ދެމެހެއްޓެނިވި ތަރައްޤީއަށް ކަމަށެވެ.
އިސްދޫ ކަލައިދޫގައި އެއާޕޯޓު އެޅުމަށް ނިންމެވި އެންމެ ބޮޑު ސަބަބަކީ އެ ސަރަޙައްދުގެ ބިމުގެ ތަނަވަސްކަން އޮތުމުން ކަމަށް ރައީސް ފާހަގަކުރެއްވިއެވެ. "މިރަށުގައި ތަފާތު ކަމަކީ އެއަރޕޯޓެއް އަޅާއިރު، ބިން ހިއްކަން ޚަރަދު ކުރަން ނުޖެހޭ، ބިން ނުހިއްކާ އެކަން ކުރެވޭނެ. އެއީ ފާހަގަކޮށްލަންޖެހޭ ވަރަށް މުޙިއްމު ނުކުތާއެއް" ރައީސް ވިދާޅުވިއެވެ.
މި މަޝްރޫޢަކީ ލ. އަތޮޅުގެ އިޤްތިޞާދީ އަދި އިޖުތިމާޢީ ތަރައްޤީއަށް ލިބިގެންދާނެ ބޮޑު ކުރިއެރުމެއްގެ ގޮތުގައި ސަރުކާރުން ދެކެއެވެ. ބިން ހިއްކުމުގެ ބޮޑު ޚަރަދަކާ ނުލައި މި މަޝްރޫޢު ކުރިއަށް ގެންދެވުމަކީ ދައުލަތުގެ ބަޖެޓަށްވެސް ލުއިވެގެންދާނެ ކަމެއްކަން ރައީސްގެ ވާހަކަފުޅުގައި ފާހަގަކުރެއްވިއެވެ.
