ރާއްޖޭގެ 24 ރަށެއްގައި ޖުމްލަ 50 މެގަވޮޓުގެ އިއާދަކުރަނިވި ހަކަތަ އުފެއްދުމުގެ ބޮޑު މަޝްރޫޢެއް ފެށުމަށް ތައްޔާރުވެފައިވާ ކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން ހާމަކުރައްވައިފިއެވެ.
މި މަޝްރޫޢަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ގެންގުޅުއްވާ ހަކަތައިގެ ހަރުދަނާ ސިޔާސަތުގެ ދަށުން ކުރިއަށްގެންދާ މުހިންމު މަސައްކަތެކެވެ. މި މަޝްރޫޢުގެ މައިގަނޑު އަމާޒަކީ 2028 ވަނަ އަހަރުގެ ނިޔަލަށް ރާއްޖޭގައި ބޭނުންކުރާ ކަރަންޓުގެ 33 އިންސައްތައަކީ އިއާދަކުރަނިވި ހަކަތައަށް ހެދުމަށް ރައީސް ކަނޑައަޅުއްވާފައިވާ ލަނޑުދަނޑި ހާސިލްކުރުމެވެ.
މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން މަޢުލޫމާތު ދެއްވާ ގޮތުގައި، މި މަޝްރޫޢުގެ ސަބަބުން ކަރަންޓު އުފެއްދުމަށްޓަކައި ރާއްޖެއަށް އިމްޕޯޓްކުރާ ތެލަށް ކުރާ ބޮޑު ހޭދަ ބޮޑުތަނުން ކުޑަވެގެންދާނެއެވެ. މީގެ އިތުރުން، މިއީ ރާއްޖޭގެ ހަކަތައިގެ މިނިވަންކަން ކަށަވަރުކޮށް، ބޭރުގެ ފަރާތްތަކަށް ބަރާސާވުން ކުޑަކުރުމަށް އެޅޭ ވަރަށް މުހިންމު ފިޔަވަޅެކެވެ.
މި މަޝްރޫޢު ފަރުމާކުރެވިފައިވަނީ ތިމާވެއްޓާ ރައްޓެހި ގޮތަކަށް ކަރަންޓު އުފެއްދުމަށް އިސްކަންދީގެންނެވެ. މިކަމުގެ ސަބަބުން ޖައްވަށް ބޭރުކުރާ ވިހަ ގޭސްތައް މަދުވެ، ދުނިޔެ ހޫނުވުމުގެ މައްސަލައަށް ހައްލެއް ހޯދުމަށް ރާއްޖެއިން ބައިނަލްއަގުވާމީ މައިދާނުގައި ކުރަމުންދާ ވަކާލާތުތަކަށް އިތުރު ބާރަކާއި އިތުބާރެއް ލިބިގެންދާނެ ކަމަށްވެސް އެ ވުޒާރާއިން ފާހަގަކުރައްވައެވެ.
މި ބޮޑު މަޝްރޫޢު ފެށުމަށް ބޭނުންވާ ތައްޔާރުީތައް މިހާރު ދަނީ ނިމެމުންނެވެ. މިއީ ރާއްޖޭގެ ތިމާވެށި ހިމާޔަތްކުރުމަށާއި، އިގްތިސާދީ ގޮތުން ފުދުންތެރި ގައުމަކަށް ހެދުމަށް ސަރުކާރުން ކުރައްވާ މަސައްކަތުގެ ތެރެއިން ފާހަގަކޮށްލެވޭ ފަދަ ބޮޑު މަޝްރޫޢެކެވެ.
