މޯލްޑިވްސް މަނިޓަރީ އޮޓޯރިޓީ (އެމްއެމްއޭ) އިން ދޭ ސްކޮލަރޝިޕްތަކަށް ކުރިމަތިލުމަށް ހުޅުވާލާފައިވާ މުއްދަތު، މި ހިނގާ މަހުގެ 15 ވަނަ ދުވަހުގެ ނިޔަލަށް އެ އިދާރާއިން އިތުރުކޮށްފިއެވެ. އެމްއެމްއޭއިން މި ފުރުޞަތު ހުޅުވާލާފައިވަނީ މަތީ ތަޢުލީމުގެ ތިން ފަންތިއަކުން ކުރިއަށް ދިއުމަށް ބޭނުންވާ ފަރާތްތަކަށެވެ.
އެމްއެމްއޭއިން މަޢުލޫމާތު ދޭ ގޮތުގައި މި ސްކޮލަރޝިޕްތަކުގެ ދަށުން ބެޗްލާސް ޑިގްރީ، މާސްޓަރސް ޑިގްރީ އަދި ޕީއެޗްޑީއަށް ކިޔެވުމުގެ ފުރުޞަތު ވަނީ ހުޅުވާލާފައެވެ. މި ޕްރޮގްރާމްތަކުގެ ދަށުން ކޯސް ފުރިހަމަކުރާ ފަރާތްތަކުން، ކިޔެވުން ނިންމުމަށްފަހު 5 އަހަރު ދުވަހުގެ މުއްދަތަށް ދިވެހިރާއްޖެއަށް ޚިދުމަތް ކުރުމަށް ބޮންޑު ކުރެވޭނެ ކަމަށްވެސް އެމްއެމްއޭއިން ވިދާޅުވެއެވެ.
މި ސްކޮލަރޝިޕްތަކުގެ ދަށުން މެލޭޝިޔާގެ އެކި ޔުނިވަރސިޓީތަކުން ކިޔެވުމުގެ ފުރުޞަތު ވަނީ ފަހިކޮށްދީފައެވެ. އޭގެ ތެރޭގައި ހިމެނެނީ ބެޗްލަރސް އޮފް އެކައުންޓިންގ، ސެލަންގޯރ އިސްލާމިކް ޔުނިވަރސިޓީ
މާސްޓަރސް އޮފް ލޯސް އަދި މާސްޓަރސް އޮފް އިކޮނޮމިކްސް، އިންޓަރނޭޝަލް އިސްލާމިކް ޔުނިވަރސިޓީ
ޕީއެޗްޑީގެ ދާއިރާތައް: އިންސިފް ޔުނިވަރސިޓީން އިސްލާމިކް ފައިނޭންސް ނުވަތަ އެޕްލައިޑް މުއާމަލާތު (އިކޮނޮމިކްސް އެންޑް ފައިނޭންސް)
މި ސްކޮލަރޝިޕްތަކަށް ހޮވޭ ފަރާތްތަކަށް ބޮޑެތި އިނާޔަތްތަކެއް ދިނުމަށް ވަނީ ނިންމާފައެވެ. އެގޮތުން ޓިއުޝަން ފީއާއި ޔުނިވަރސިޓީއަށް ދައްކަންޖެހޭ އެހެނިހެން ޚަރަދުތަކުގެ އިތުރުން، ކިޔަވަން ހުންނަ މުއްދަތުގައި ދިރިއުޅުމުގެ ޚަރަދާއި، ބުކް އެލަވަންސް، އެސްޓެބްލިޝްމަންޓް އެލަވަންސް އަދި ޑިޕާޗަރ އެލަވަންސް ލިބޭނެއެވެ.
މީގެ އިތުރުން، ކިޔަވަންދާ ދަރިވަރުންގެ ވިސާ ޚަރަދާއި ހެލްތު އިންޝުއަރެންސްގެ ޚަރަދުވެސް އެމްއެމްއޭއިން ހަމަޖައްސައިދޭނެ ކަމަށް އެ އޮޓޯރިޓީން ވިދާޅުވެއެވެ. މިއީ ރާއްޖޭގެ މާލީ ދާއިރާއަށް ބޭނުންވާ ފަންނީ މީހުން ބިނާކުރުމަށް އެމްއެމްއޭއިން ކުރިއަށްގެންދާ މުހިންމު މަސައްކަތެކެވެ.
