ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ)ގެ ޗީފް އެގްޒެކެޓިވް އޮފިސަރު (ސީއީއޯ)ގެ މަގާމަށް މާލީ ދާއިރާގެ ތަޖުރިބާކާރެއް ކަމަށްވާ މުހައްމަދު އަހުމަދު އައްޔަންކޮށްފިއެވެ. އޭނާ މި މަގާމަށް އައްޔަންކުރައްވާފައިވަނީ ރާއްޖޭގެ މާލީ ބާޒާރު ހަރުދަނާކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިންނެވެ.
މުހައްމަދު އަހުމަދަކީ ފައިނޭންސް، ބޭންކިން، ޕަބްލިކް އެޑްމިނިސްޓްރޭޝަން އަދި ކޯޕަރޭޓް ގަވަނަންސްގެ ދާއިރާއިން 40 އަހަރަށްވުރެ ގިނަ ދުވަހުގެ ތަޖުރިބާ ލިބިވަޑައިގެންފައިވާ ބޭފުޅެކެވެ. މާލީ ދާއިރާގެ އެކި ފަންތީގެ މަގާމުތަކުގައި އޭނާ ވަނީ ގިނަގުނަ ހިދުމަތްތަކެއް ކުރައްވާފައެވެ.
ސަރުކާރުގެ އިސް މަގާމުތަކަށް ބަލާއިރު، ކުރީގެ ރައީސް މުހައްމަދު ނަޝީދުގެ ވެރިކަމުގައި ފިނޭންސް މިނިސްޓްރީގެ ޑެޕިއުޓީ މިނިސްޓަރުކަމާއި ފައިނޭންޝަލް ކޮންޓްރޯލަރުގެ މަގާމު ވެސް އޭނާ ވަނީ ފުރުއްވާފައެވެ. މީގެ އިތުރުން ދައުލަތުގެ މާލީ ނިޒާމު ހަރުދަނާކުރުމަށް ގިނަ މަސައްކަތްތަކެއް އޭނާ ވަނީ ކުރައްވާފައެވެ.
ޕްރައިވެޓް ސެކްޓަރުގައި ވެސް މުހައްމަދު އަހުމަދު ވަނީ ފާހަގަކޮށްލެވޭ ފަދަ ހިދުމަތްތަކެއް ކުރައްވާފައެވެ. އެގޮތުން ބޭންކް އޮފް މޯލްޑިވްސް (ބީއެމްއެލް) އާއި ސޮލަރެލް އިންޝުއަރަންސް ފަދަ ކުންފުނިތަކުގެ އިސް މަގާމުތަކުގައި އޭނާ ވަނީ މަސައްކަތް ކުރައްވާފައެވެ.
ސީއެމްޑީއޭއަކީ ރާއްޖޭގެ ކެޕިޓަލް މާކެޓް ރެގިއުލޭޓްކޮށް، އެ ދާއިރާ ކުރިއެރުވުމުގެ ޒިންމާ އޮންނަ މުއައްސަސާއެވެ. މުހައްމަދު އަހުމަދުގެ ތަޖުރިބާގެ އަލީގައި އެ އޮތޯރިޓީގެ ހިންގުން އިތުރަށް ހަރުދަނާވެގެންދާނެ ކަމަށް ބެލެވެއެވެ.
