އިންޑިއާގެ ހައިދަރުއާބާދުގައި ބޭއްވުމަށް ހަމަޖެހިފައިވާ އިންޑިއާ-އޭޝިއާ ބިޒްނަސް ކޮންކްލޭވްގައި ބައިވެރިވުމުގެ ފުރުސަތު ދިވެހިރާއްޖޭގެ ވިޔަފާރިތަކަށް ހުޅުވާލައިފިއެވެ. މި ބޮޑު ސަމިޓް ބޭއްވުމަށް ހަމަޖެހިފައިވަނީ މިއަހަރުގެ ޖުލައި މަހުގެ 31 އިން އޯގަސްޓް މަހުގެ 1 ވަނަ ދުވަހުގެ ނިޔަލަށެވެ.
މި ހަރަކާތަކީ ގްލޯބަލް އިންޑިއާ ބިޒްނަސް ފޯރަމުން އިންތިޒާމުކޮށްގެން ބާއްވާ، ބައިނަލްއަޤުވާމީ ވިޔަފާރިތައް އެއް ފުރާޅެއްގެ ދަށުން ގުޅުވައިދޭ މުހިންމު ޕްލެޓްފޯމެކެވެ. މި އެކްސްޕޯގައި އިންޑިއާގެ 500 އަށްވުރެ ގިނަ ކުންފުނިތަކުގެ އިތުރުން، އޭޝިއާ ސަރަހައްދުގެ 20 އަށްވުރެ ގިނަ ޤައުމުގެ ވިޔަފާރިވެރިންނާއި ސިޔާސަތު ކަނޑައަޅާ ފަރާތްތައް ބައިވެރިވާނެ ކަމަށް މައުލޫމާތު ލިބެއެވެ.
މި ކޮންކްލޭވްގައި ބައިވެރިވާ ފަރާތްތަކަށް ވިޔަފާރި ނެޓްވޯކިންގް ވަރުގަދަކުރުމާއި، އިންވެސްޓްމަންޓް ހޯދުމުގެ ފުރުސަތުތައް ފަހިވެގެންދާނެއެވެ. މީގެ އިތުރުން، ޖޮއިންޓް ވެންޗަރ އުފެއްދުމުގެ ފުރުސަތުތަކާއި، ދާއިރާގެ މާހިރުން ބައިވެރިވާ ޕެނަލް ޑިސްކަޝަންތަކުގައި ބައިވެރިވެ މައުލޫމާތު މުއްސަނދި ކުރުމުގެ ފުރުސަތުވެސް ލިބިގެންދާނެއެވެ.
މި ހަރަކާތުގެ ތެރެއިން ހާއްސަ އިސްކަމެއް ދެވޭނެ ދާއިރާތަކުގެ ތެރޭގައި ފަތުރުވެރިކަން، އިއާދަކުރަނިވި ހަކަތަ، ޓެކްނޮލޮޖީ، އަދި ސިއްހީ ދާއިރާ ހިމެނެއެވެ. މި ސިނާއަތްތަކުން ސްޓްރެޓެޖިކް ޕާޓްނަރޝިޕްތައް ބިނާކުރުމަކީ ދިވެހި ވިޔަފާރިތަކަށް ބައިނަލްއަޤުވާމީ މާކެޓަށް ފުޅާވުމަށް ލިބޭނެ ރަނގަޅު ފުރުސަތެކެވެ.
މި ކޮންކްލޭވްގެ ސަބަބުން އޭޝިއާ ސަރަހައްދުގެ ވިޔަފާރި ގުޅުންތައް އިތުރަށް ބަދަހިވެ، ދިވެހި އުފެއްދުންތަކާއި ހިދުމަތްތައް ބޭރުގެ މާކެޓްތަކަށް ތައާރަފުކުރުމަށް މަގުފަހިވެގެންދާނެ ކަމަށް ބެލެވެއެވެ.
