ޞަޙީޙް ޙަދީޘްފުޅުން އެނގެން އޮތް ގޮތުގައި ކޮންމެ ހުކުރު ދުވަހެއްގައިވެސް ދުޢާ ޢިޖާބަކުރައްވަވާ ވަޤުތުކޮޅެއްވާ ފަދައިން ކޮންމެ ރެއަކުވެސް ދުޢާ ޢިޖާބަކުރައްވަވާ ސާޢަތެއްވެއެވެ.
އެސާޢަތުގައި ދުނިޔަވީކަމެއްގައިނަމަވެސް އަދި އުޚުރަވީކަމެއްގައި ނަމަވެސް އަދި ދުނިޔެއާއި އާޚިރަތުގެ ކަމަކަށް ނަމަވެސް ﷲ ތަޢާލާގެ ޙަޟްރަތަށް ދުޢާކޮށްފިނަމަ އެދުޢާ ޢިޖާބަކުރައްވަވާނެތެވެ. އަދި އެކަން ކޮންމެ ރެއަކުވެސް ދާނީ ހިނގަމުންނެވެ. (ކޮންމެރެއަކުވެސް އެވަޤުތުކޮޅު މީސްތަކުންނާއި ބައްދަލުކުރާނެތެވެ. އެކަން ދާނީ ކޮންމެ ރެއަކުވެސް ތަކުރާރުވަމުންނެވެ.)
ރޭގެގަނޑުގެ އެވަޤުތުކޮޅުވެސް ﷲ ތަޢާލާ ވަނީ ސިއްރުކުރައްވަވައިފައެވެ. އެއީ މީސްތަކުން ހީވާގިވެ އެކަމަށް އެދިގެން ގިނަ ވަޤުތުތަކެއްގައި މަސައްކަތްކުރުމަށްޓަކައެވެ. 1000 މައްސަރަށްވުރެ އިތުރުކަންބޮޑުވެގެންވާ ލައިލަތުލްޤަދްރިވިލޭރޭވެސް ސިއްރުކުރެއްވެވި ފަދައިންނެވެ. ހުކުރު ދުވަހުގައިވާ ދުޢާ ޢިޖާބަކުރައްވަވާ ވަޤުތުކޮޅުވެސް ސިއްރުކުރެއްވެވި ފަދައިންނެވެ.
ދުޢާ ޢިޖާބަ ކުރެއްވެވުމުގައި އޮތީ 3 ގޮތެކެވެ. ފުރަތަމަ ގޮތަކީ ދުނިޔޭގައި އެކަމެއް އެމީހަކަށް އަވަސްކޮށްދެއްވެވުމެވެ. ދެވަނަ ގޮތަކީ އާޚިރަތަށްޓަކައި އެކަން ފަސްކޮށްދެއްވެވުމެވެ. 3 ވަނަ ގޮތަކީ އެމީހަކަށް ލިބެން އޮތް ގެއްލުމަކުން އެމީހަކު ސަލާމަތްކޮށްދެއްވެވުމެވެ.
- ޝައިޚް މުޙައްމަދު ލަޠީފް / އިސްލާމީ މަރުކަޒުގެ އިސް އިމާމް
