ޕެންޝަން ފަންޑުގައި ހުރި ފައިސާ ބޭނުންކޮށްގެން ޙައްޖަށް ދިޔުމަށް ފައިސާ ދެއްކޭނެ އިންތިޒާމާއި ޙައްޖު ކިޔޫގައި ބައިވެރިވެވޭނެ ގޮތް ހަމަޖައްސައިފިކަމަށް ކަމާބެހޭ އިދާރާތަކުން ހާމަކޮށްފިއެވެ. މި ނިންމުމާއެކު، ޕެންޝަން ފަންޑުގައި ފައިސާ ރައްކާކޮށްފައިވާ ފަރާތްތަކަށް އެ ފައިސާ ބޭނުންކޮށްގެން ޙައްޖުގެ މަތިވެރި އަޅުކަން އަދާކުރުމަށް މަގުފަހިވެގެންދާނެއެވެ.
އަލަށް ގެނެވުނު އުސޫލުގެ ދަށުން، ޙައްޖަށް ދިޔުމަށް ދައްކަންޖެހޭ ޖުމްލަ އަގުގެ %20 އަމިއްލައަށް ދެއްކުމުން، ބާކީ %80 ފައިސާ އެ މީހެއްގެ ރިޓަޔަރމަންޓް ސޭވިންގްސް އެކައުންޓުން ހަމަޖައްސައިދެވޭނެއެވެ. މިއީ ޕެންޝަން ފަންޑުގެ ބޭނުން ހިފައިގެން ދީނީ ފަރުޟެއް އަދާކުރުމަށް ދެވޭ މުހިންމު ލުޔެކެވެ.
މި ފުރުޞަތު ހުޅުވާލެވިފައިވަނީ ވަކި ޝަރުތުތަކަކާ އެކުގައެވެ. އެގޮތުން، މި ފުރުޞަތު ލިބޭނީ އަލަށް ފަރުޟު ޙައްޖުވާ ފަރާތްތަކަށާއި، ރިޓަޔަރވާއިރު މަހަކު މަދުވެގެން 2000 ރުފިޔާ ޕެންޝަންގެ ގޮތުގައި ލިބޭ މިންވަރަށް ފަންޑުގައި ފައިސާ ޖަމާވެފައި ހުރި މީހުންނަށެވެ.
ޕެންޝަން އޮފީހުން މަޢުލޫމާތު ދޭ ގޮތުގައި، ގެދޮރު ގަތުމަށް ޕެންޝަން ފަންޑުން ފައިސާ ބޭނުންކޮށްފައިވާ ފަރާތްތަކަށްވެސް މި ފުރުޞަތު އޮންނާނެއެވެ. ނަމަވެސް، އެފަދަ ފަރާތްތަކަށް ޙައްޖަށް ފައިސާ ދޫކުރާނީ ގެދޮރު ގަތުމަށް ބޭނުންކުރި އަދަދު އުނިކުރުމަށްފަހު ބާކީ ހުރި ފައިސާގެ ތެރެއިންނެވެ. މީގެ އިތުރުން، ޕެންޝަން އުމުރު ހަމަވުމަށްފަހުވެސް، ފަންޑުގައި ހުރި ފައިސާ ބޭނުންކޮށްގެން ޙައްޖަށް ދިޔުމަށް އެދުމުގެ ފުރުޞަތު އޮންނާނެ ކަމަށް ވަނީ ކަނޑައަޅާފައެވެ.
މި އައު އިންތިޒާމާ ގުޅޭ އިދާރީ މަސައްކަތްތަކާއި ގަވާއިދުތައް އެކުލަވާލުމުގެ މަސައްކަތް ޕެންޝަން އޮފީހުން މިހާރު ދަނީ ކުރަމުންނެވެ. ޕެންޝަން އޮފީހުން ލަފާކުރާ ގޮތުގައި ކުރިއަށް އޮތް 3 މަސްދުވަހުގެ ތެރޭގައި މިކަމާ ގުޅޭ ހުރިހާ އިންތިޒާމްތަކެއް ފުރިހަމަކޮށް ނިމޭނެއެވެ.
