އަކުނިވަޔަށް ދެމުމަކީ (Muscle Cramps) ކުއްލިއަކަށް މަސްގަނޑަށް އަންނަ ބާރުވުމެކެވެ. މިއީ އާންމުކޮށް ފަޔަށް ދިމާވާ، ވަރަށް ބޮޑަށް ތަދުވާ ކަމެކެވެ.
އަކުނިވަޔަށް ދަމަން މެދުވެރިވާ މައިގަނޑު ސަބަބުތައް:
1. ހަށިގަނޑުން ފެން މަދުވުން (Dehydration): ހަށިގަނޑުގައި ފެން މަދުވުމަކީ އަކުނިވަޔަށް ދަމަން މެދުވެރިވާ އެންމެ އާންމު އެއް ސަބަބެވެ.
2. މައުދަނުތައް މަދުވުން: މަސްތަކުގެ މަސައްކަތަށް ބޭނުންވާ މައުދަނުތައް ކަމަށްވާ ޕޮޓޭސިއަމް، މެގްނީޒިއަމް ނުވަތަ ކެލްސިއަމް ހަށިގަނޑުގައި މަދުވުން
3. މަސްގަނޑަށް ބާރުބޮޑުވުން: މާ ގިނައިރު ކަސްރަތު ކުރުން ނުވަތަ މަސްގަނޑަށް އާދަޔާ ހިލާފަށް ބާރުބޮޑުވާ ފަދަ މަސައްކަތެއް ކުރުން.
4. ލޭ ދައުރުވުން ދަށްވުން: ގުނަވަންތަކަށް ލޭ ފޯރުކޮށްދޭ ނާރުތައް ހަނިވުމުގެ ސަބަބުން ލޭ ދައުރުވުން ދަށްވުން.
5. މާބަނޑު ދުވަސްވަރު : މާބަނޑު ދުވަސްވަރު ހަށިގަނޑަށް އަންނަ ބަދަލުތަކުގެ ސަބަބުން ގިނައިން އަކުނިވަޔަށް ދަމާގޮތްވެއެވެ.
6. އެއްގޮތަކަށް މާގިނައިރު އިށީނދެގެން ނުވަތަ އޮށޯވެގެން ތިބުން.
ގޭގައި ނުވަތަ އަމިއްލައަށް ކުރެވިދާނެ ކަންތައްތައް:
1. މަސްގަނޑު ދެމުން (Stretching): އަކުނިވަޔަށް ދަމާފައިވާ މަސްގަނޑު މަޑުމަޑުން ދަމާލާށެވެ. މިސާލަކަށް ފަޔަށް ދަމައިފިނަމަ، ފައިގެ އިނގިލިތަކުގައި ހިފާފައި މައްޗަށް (ކަކުލާ ދިމާއަށް) މަޑުމަޑުން ދަމާލާށެވެ.
2. މަސާޖުކުރުން: ބާރުވެފައިވާ މަސްގަނޑު މަޑުމަޑުން މަސާޖުކޮށްލުމުން މަސްގަނޑު ދޫވާނެއެވެ.
3. ހޫނު ނުވަތަ ފިނި ފެންކޮތަޅު އެޅުން: ބާރުވެފައިވާ މަސްގަނޑުގައި ހޫނު ފެންކޮތަޅެއް އެޅުމުން މަސްގަނޑު ދޫވާނެއެވެ. ނުވަތަ ތަދު ކަނޑުވަން އައިސްޕެކެއްވެސް ބޭނުންކުރެވިދާނެއެވެ.
4. ގިނައިން ފެން ބުއިން: ހަށިގަނޑުގައި ފެން ހުންނަ މިންވަރު އިތުރުކުރުމަށް ގިނައިން ފެން ބޯށެވެ.
5. ސިއްހަތަށް ފައިދާހުރި ކާނާ ކެއުން: ޕޮޓޭސިއަމް ގިނަ ކާނާ (މިސާލަކަށް: ދޮންކެޔޮ) އަދި މެގްނީޒިއަމް ގިނަ ކާނާ ކެއުމަށް ސަމާލުކަން ދޭށެވެ.
6. ލުއި ކަސްރަތު: ނިދުމުގެ ކުރިން ފައިގެ ކުޑަ ކަސްރަތެއް ކޮށްލުމަކީ ރޭގަނޑު އަކުނިވަޔަށް ދެމުމުން ސަލާމަތްވުމަށް އެހީތެރިވެދޭނެ ކަމެކެވެ.
އަކުނިވަޔަށް ދެމުމަކީ ވަރަށް ގިނައިން ދިމާވާ ކަމެއްނަމަ ނުވަތަ އޭގެ ސަބަބުން ހަންގަނޑުގެ ކުލަ ބަދަލުވެ ދުޅަވާނަމަ، ލަސްނުކޮށް ޑޮކްޓަރެއްގެ އިރުޝާދު ހޯދުން މުހިންމެވެ.
- މިއީ އަކުނިވަޔަށް ދެމުމަށް ހޯދިދާނެ ފަރުވާއަކަށް މިއަދުނޫހުގެ ކިޔުންތެރިއަކު އެދިލައްވާފައިވާތީ ރާއްޖޭގެ ޞިއްޙީ ދާއިރާގެ އިސް ބޭފުޅަކު ދެއްވާފައިވާ މަޢުލޫމާތެވެ. އެދެނީ އިތުރަށް ކަމެއް އޮޅުން ފިލުވަން ބޭނުންނަމަ އެކަމެއް ފާހަގަކޮށްލައި އަންގައިލަދިނުމެވެ. ޖަވާބުދޭން މަސައްކަތްކުރާނަމެވެ. އިން ޝާ ﷲ
- މިއަދުނޫސް
