ދިވެހިރާއްޖެއާއި ތުރުކީވިލާތާ ދެމެދު ސޮއިކޮށް ޢަމަލުކުރަން ފަށާފައިވާ ޕްރިފަރެންޝިއަލް ޓްރޭޑް އެގްރިމެންޓް (ޕީ.ޓީ.އޭ) ގެ ދަށުން އެތެރެކުރާ މުދަލަށް ޑިއުޓީ އިނާޔަތް ހޯދުމަށް، އެ ޤައުމުގެ ކަމާބެހޭ އިދާރާތަކުން ދޫކޮށްފައިވާ "ސެޓްފިކެޓް އޮފް އޮރިޖިން" ހުށަހަޅަން ޖެހޭނެ ކަމަށް މޯލްޑިވްސް ކަސްޓަމްސް ސާވިސްއިން ބުނެފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިސްނަގައިގެން، ދެ ޤައުމުގެ ދެމެދުގައި ވިޔަފާރީގެ ގުޅުން ބަދަހިކުރުމަށް ކުރެވުނު މި އެއްބަސްވުމަށް ޢަމަލުކުރަން ފަށާފައިވަނީ މިއަހަރުގެ އޯގަސްޓު މަހުގެ 1 ވަނަ ދުވަހުން ފެށިގެންނެވެ. މި އެއްބަސްވުމުގެ މައިގަނޑު މަޤްޞަދަކީ ދެ ޤައުމުގެ ދެމެދުގައި މުދާ ބަދަލުކުރުމުގައި ލުއިފަސޭހަ ގޮތްތަކެއް ހަމަޖައްސައި، ވަކި ބާވަތްތަކުގެ މުދަލުން ޑިއުޓީގެ އިނާޔަތްތައް ފޯރުކޮށްދިނުމެވެ.
ކަސްޓަމްސްއިން ހާމަކޮށްފައިވާ ގޮތުގައި، މި އެއްބަސްވުމުގެ ދަށުން ތުރުކީވިލާތުން ރާއްޖެއަށް އެތެރެކުރާ ގިނަ ބާވަތްތަކުގެ މުދަލަށް ބޮޑެތި ލުއިތަކެއް ލިބިގެންދާނެއެވެ. ނަމަވެސް، މި އިނާޔަތްތައް ލިބޭނީ އެ މުދަލަކީ ތުރުކީވިލާތުގެ އުފެއްދުމެއްކަން ކަށަވަރުކޮށްދޭ، އެ ޤައުމުގެ ކަމާބެހޭ އިދާރާއަކުން ދޫކޮށްފައިވާ "ޕްރިފަރެންޝިއަލް ސެޓްފިކެޓް އޮފް އޮރިޖިން" ކަސްޓަމްސްއަށް ހުށަހެޅުމުންނެވެ.
މީގެ އިތުރުން، މި އެއްބަސްވުމުގެ ދަށުން ޑިއުޓީ އިނާޔަތް ލިބޭ މުދަލުގެ ތަފްސީލީ މަޢުލޫމާތު، ކަސްޓަމްސްގެ ރަސްމީ ވެބްސައިޓުގައިވާ "ޓެރިފް ސާޗް ޓޫލް" މެދުވެރިކޮށް މިހާރު ބަލައިލެވޭނެ ކަމަށްވެސް އެ އިދާރާއިން މަޢުލޫމާތުދެއެވެ.
މި ފުރުޞަތުގެ ބޭނުން ހިފުމަށް ހުރިހާ ވިޔަފާރިވެރިންނަށް ކަސްޓަމްސްއިން އިލްތިމާސްކުރެއެވެ. މިއީ ރާއްޖޭގެ އިޤްތިޞާދު ކުރިއެރުވުމަށާއި، ބޭރުގެ ޤައުމުތަކާއެކު އޮންނަ ވިޔަފާރީގެ ގުޅުންތައް ހަރުދަނާކުރުމަށް ސަރުކާރުން އަޅުއްވާފައިވާ މުހިންމު ފިޔަވަޅެކެވެ.
