މައިންބަފައިން ދުނިޔޭގައި ތިބޭއިރު އެމީހުންނަށް ޚިދުމަތް ކުރެވިދާނެއެވެ. އެކަންކުރަން ގިނަ ބައަކު މަސައްކަތްވެސް ކުރެއެވެ. ނަމަވެސް މަރުވުމުން މަޑުމަޑުން ހަނދުމަނެތެމުންގޮސް އެމީހުންގެ މަތިން ހަނދާން ނެތޭ ދަރިންވެސް މަދެއް ނޫނެވެ. ވީމާ އަހުރެންގެ މިނަޞީޙަތް އަޑުއަހާށެވެ! އެއރުން ތިބާއަށްވެސް އެކަމުން ފައިދާކުރާނެއެވެ. އިން ޝާ ﷲ
ގިނަ ބައަކަށް ވިސްނިފައި އޮންނަނީ އެމީހުންގެ ކިބައިގައި ތަނަވަސްކަން ނެތުމުން މިސްކިތެއް އެޅެން ނެތްނަމަ ނުވަތަ ޞަދަޤާތްކުރެވެން ނެތްނަމަ ދުނިޔެ ދޫކޮށްފައިވާ މައިންބަފައިންނަށްޓަކައި ކޮށްދެވޭނެ ހަމަ އެއްވެސް ކަމެއް ނެތް ކަމަށެވެ. ނަމަވެސް އެއީ އެއްގޮތަކަށްވެސް ރަނގަޅު ވިސްނުމެއް ނޫނެވެ.
ކޮންމެ މީހަކުވެސް އެމީހެއްގެ މައިންބަފައިންނަށް ސަރޕްރައިޒް ދޭން ބޭނުންވާނެއެވެ. އަދި އެމީހާ ދޭ ސަރޕްރައިޒް އަކީ މައިންބަފައިންނަށް އެންމެ ފައިދާކުރާނެ ސަރޕްރައިޒްއަށް ހަދަންވެސް ބޭނުންވާނެއެވެ.
މި ސަރޕްރައިޒް ދިނުމަށްޓަކައި އެއްވެސް އެއްޗެއް ގަންނާކަށްވެސް ނުޖެހެއެވެ. ވީމާ އަތުން އެންމެ ރުފިޔާއެއް ވެސް ޚަރަދުކުރާކަށް ނުޖެހެއެވެ. ވީމާ އެއިގެ މާނައަކީ ފައިސާގެ ގޮތުން އެއްވެސް ޚަރަދެއް ކުރަން ނުޖެހޭނެ ކަމެވެ. ވީމާ ކިތަންމެ ފަޤީރު ނަމަވެސް މި ސަރޕްރައިޒް ދެވިދާނެއެވެ.
މިހިސާބަށް އައިއިރުވެސް ސަރޕްރައިޒް އަކީ ކޮބައިކަން އަދިވެސް ނުބުނެވެއެވެ. ސަރޕްރައިޒް މިކިޔައިދެނީ އެވެ. ރަނގަޅަށް އަޑުއަހާށެވެ.
މީހާއަށް ސުވަރުގެ ވަދެވި ދަރަޖަ ލިބެނީ އެމީހަކު ދުނިޔޭގައި ހުރިއިރު އެކަމަށްޓަކައި ކުރެވުނު މަސައްކަތަކާއި އެއްވަރުންނެވެ. ނުވަތަ ﷲ ތަޢާލާ ދެއްވަވާނެ ބޯނަސްތަކުންނެވެ. އެގޮތުން ތިބާގެ މަންމަ އާއި ބައްޕައަށްވެސް ވަނީ ސުވަރުގެ ލިބިފައެވެ. ލިބިފައިވަނީ 10 ވަނަ ދަރަޖަ ކަމަށް ބަލާށެވެ.
10 ވަނަ ދަރަޖައިގައި ތިއްބައި މިފެންނަނީ ކުއްލިއަކަށް އެތައް ދަރަޖަތަކަކަށް މަތިވެރިކުރެވިގެންދާތަނެވެ. މިއަށްވުރެ ބޮޑު ސަރޕްރައިޒްއެއް އެއްވެސް މީހަކަށް ލިބޭނެ ހެއްޔެވެ؟ މިއަށްވުރެ ބޮޑު ނިޢްމަތެއް ލިބޭނެ ހެއްޔެވެ؟ މިއަށްވުރެ ބޮޑު އުފަލެއް ލިބޭނީ ކިހިނަކުން ހެއްޔެވެ؟ އެމީހުން ސުވަރުގެ ވަދެ ތިބީ އެމީހުންނަށް އެކަމަށް ކުރެވުނު މަސައްކަތަށް އެންމެ ޙައްޤު މިންވަރުގައެވެ. އެކަން އެމީހުން ތިބީ ހިތުގެ އަޑިން ޤަބޫލުކޮށްގެނެނެވެ. ދަރަޖަ މަތިވެރިވެގެން މިދިއައީ އެކަންކަން ހަމަ އުފަލުން ޤަބޫލުކޮށްގެން ތިއްބައެވެ.
Prophet Muhammad (ﷺ) said:
"A man will be raised in status in Paradise and will say: 'Where did this come from?' And it will be said:'From your son's praying for forgiveness for you.'"
— Ibn Majah, Hadith 3660
އެހެންވެ މަންމަ އާއި ބައްޕަ އެމީހުންގެ ދަރަޖަ ކުއްލިއަކަށް މަތިވެރިވި ސަބަބާއިމެދު ސުވާލުކުރާނެތެވެ. މިއީ ކިހިނަކުން ވީކަމެއްތޯއެވެ؟ އެހިނދު ޖަވާބުގައި މައިންބަފައިންނަށް ބުނެވޭނެތެވެ. "އެއީ ތިބާގެ ފާފަތައް ފުއްސަވައި ދެއްވެވުން އެދި ތިބާގެ ދަރިން ކުޅަ ދުޢާތަކުގެ ސަބަބުންނެވެ."
ވީމާ މައިންބަފައިންދެކެ ލޯބިވާނަމަ، މައިންބަފައިންނަށް އެންމެ ފައިދާކުރާނެ އެންމެ ބޮޑު ސަރޕްރައިޒް ދޭން ބޭނުންނަމަ މައިންބަފައިންނަށް ހެޔޮ ދުޢާކުރުން ގިނަކުރާށެވެ! މިހާރު ދުނިޔޭގައި ދެމުން ގެންދާ ހަދިޔާތަކުގެ އަގު ކިތަންމެ ބޮޑު ނަމަވެސް މި ޙަދީޘްފުޅުގައިވާ ހަދިޔާގެ ނިޞްބަތުން ބަލައިފިނަމަ މިހާރު ތިއަ ދޭ ހަދިޔާތަކުގެ އެއްވެސް އަގެއް ނެތެވެ.
މީގެ މާނައަކީ ދުނިޔޭގައި ތިބޭއިރު މައިންބަފައިންނަށް ހަދިޔާ ނުދިނުމެއް ނޫނެވެ. ދުނިޔޭގައި ތިބޭއިރު މައިން ބަފައިންނަށް ލޯބިކޮށް ރުހުން ހޯދުމަކީ ތިމާ އަށް ސުވަރުގެ ވަދެވޭނެ ތަޅުދަނޑިކަމަށްވެސް ވެދާނެއެވެ. ވީމާ އެކަންކަން ބަރާބަރަށް ބުރަމުން ގެންދާށެވެ.
ހުރިހާވެސް އިލްތިމާސްއަކީ މައިން ބަފައިން ދުނިޔޭގައި ތިބިއިރުވެސް އަދި މަރުވުމުންވެސް އެމީހުންނަށްޓަކައި ހެޔޮ ދުޢާކުރަމުން ގެންދާށެވެ. ތިމާ ދުނިޔޭގައި ހުރިހާ ދުވަހަކު އެކަން ކުރުން ހުއްޓައިނުލާށެވެ. މައިންބަފައިންނަށް ލިބޭނެ އެންމެ ބޮޑު ސަރޕްރައިޒް ދޭ ދަރިއަކީ ތިމާ ކަމަށްވުމަށްޓަކައި ޢާއިލާގެ މެދުގައިވެސް ވާދަކުރާށެވެ. ހަމަގައިމުވެސް އެފަދަ ރޭސްތަކަށް ލިބެން އޮތް ދަރުމަ މާމަތިވެރިއެވެ.
- އިސްލާމީ ތިލަފަތުގެ ދަރުސަކުން
