ރާއްޖޭގެ ހަ އަތޮޅަކުން 15 ރަށެއް ނުވަތަ ފަޅެއްގައި ރިސޯޓު ތަރައްގީކޮށް ހިންގާނެ ފަރާތްތައް ހޯދުމަށް މިނިސްޓްރީ އޮފް ޓޫރިޒަމުން އިއުލާނުކޮށްފިއެވެ. މިނިސްޓްރީން ކޮށްފައިވާ ހަތަރު އިއުލާނެއްގައިވާ ގޮތުން ރިސޯޓު ތަރައްގީކުރުމަށް ހުޅުވާލާފައިވަނީ ހއ. ހދ، ށ، ނ، ލ، އަތޮޅުގެ އިތުރަށް އައްޑޫ ސިޓީގައެވެ.
ރިސޯޓު ހަދަން ކުއްޔަށް ދޭ ފަޅުތަކަށް ބަލާއިރު އޭގެ ތެރޭގައި ހއ. މާދުނި ފަރުން ތިން ބައެއް، ހދ. މަކުނުދޫ ފަރު ދެ ބައެއް، ހދ. މާފަރު ފަޅުން ތިން ބައެއް އަދި ށ. ގޮނާ ފަރުން ތިން ބައެއް ހިމެނެއެވެ. ޓޫރިޒަމް މިނިސްޓްރީން ހާމަކުރި ގޮތުގައި، އެ ސަރަހައްދުތަކުން ރިސޯޓު ހެދުމަށް ބޭނުންވާ ފަރާތްތަކަށް ބިޑް ހުށަހެޅުމުގެ ފުރުސަތު މިހާރު ވަނީ ހުޅުވާލެވިފައެވެ.
މިނިސްޓްރީން، އައްޑުއާއި ހދ. އާއި ލ. އަތޮޅުގައި ރިސޯޓު ހަދާނެ ބަޔަކު ހޯދަނީ ހަލާލު ޓުއަރިޒަމްގެ މޮޑަލަށެވެ. އެގޮތުން، ހދ. މަކުނުދޫ ފަޅުގައި މަދުވެގެން 150 އެނދުގެ ރިސޯޓެއް ހަދަން އިއުލާނުކުރިއިރު، ލ. ފޮނަގާދޫގައި ރިސޯޓު ހަދަނީ 100 އެނދުގެ ކެޕޭސިޓީއަށެވެ. އަދި، އައްޑޫ ދޮންހެރައާއި އެ ރަށާ ޖެހިގެން އޮންނަ 0.85 ހެކްޓަރުގެ ކުޑަ ފަޅުރަށުގައި އަޅަނީ، މަދުވެގެން 100 އެނދުގެ ރިސޯޓެއް ކަމަށް މިނިސްޓްރީން ބުނެފައިވެއެވެ.
މީގެ އިތުރުން، މިނިސްޓްރީން ރިސޯޓު ހަދަން ކުުއްޔަށް ދޫކުރާ ފަޅު ރަށްތަކުގެ ތެރޭގައި ށ. ނަލަންދުއާއި ނ. ފަރުމުލި ހިމެނެއެވެ. އޭގެ ތެރެއިން ނަލަންދޫގައި ރިސޯޓު ހަދަން ބީލަން ހުށަހެޅުމުގެ ސުންގަޑިއަކީ އަންނަ ނޮވެންބަރު 23 އެވެ. އަދި ފަރުމުލީގައި ރިސޯޓު ހަދަން ބީލަން ނޮވެންބަރު 17ގެ ކުރިން ހުށަހަޅަން ޖެހެއެވެ.
ޓޫރިޒަމް މިނިސްޓްރީން ބީލަން ހުށަހެޅުމަށް ހުޅުވާލާފައިވާ އެންމެ ފަހު ސުންގަޑިއަކީ އަންނަ ނޮވެންބަރު 18 އެވެ. މިނިސްޓްރީން އެ ހުރިހާ ތަންތަނެއް ވެސް ކުއްޔަށް ދިނުމަށް ނިންމާފައި ވަނީ 50 އަހަރުގެ މުއްދަތަކަށެވެ.
