ކަމަކު އެދިގެން މީހަކަށް ސިޓީއެއް ފޮނުވިނަމަވެސް އެސިޓީގައިވާ ކަންތައް އެމީހަކަށް އެނގޭނީ އެމީހަކު އެސިޓީ ކިޔުމުންނެވެ. ނުކިޔައި ކިތަންމެ ދުވަހަކު އޮތަސް ނުއެނގޭނެއެވެ. ނަމަވެސް ﷲ ތަޢާލާގެ ޙަޟްރަތުން ކަމަކަށް އެދިގެން ދުޢާކުރުމުން މުޅިން ތަފާތެވެ.
އިމާމް އަހްމަދުގެ އަރިއަހުގައި ދެންނެވުނެވެ. "އަހަރެމެންނާއި ޢަރުޝި އާއި ދެމެދުގައިވާ ރާސްތާ ނުވަތަ ދުރުމިނަކީ ކޮބައިތޯއެވެ؟" ޖަވާބުގައި ވިދާޅުވިއެވެ. "އިޚްލާޞްތެރި ހިތަކުން އިޚްލާޞްތެރިކަމާއިއެކު ކުރާ ދުޢާއެވެ."
މީސްތަކުންނޭވެ! އިމާމް އަޙްމަދުގެ މި ބަސްފުޅުން ވެސް އެނގިގެންދަނީ އިޚްލާޞްތެރި ހިތަކުން، އިޚްލާޞްތެރިކަމާއިއެކު ކުރާ ދުޢާ ﷲ ތަޢާލާގެ ޙަޟްރަތަށް ވަގުތުން ފޯރަމުންދާނެ ކަމެވެ. ވީމާ ބޭނުންވާހައިވެސް ކަމަކީ ހަމަ އިޚްލާޞްތެރިކަން ކަމެވެ.
ހިތުގެ އިޚްލާޞްތެރިކަމުގެ މާނަ ވަރަށް ގިނައެވެ. ހިތުގެ އިޚްލާޞްތެރިކަމަކީ އިޚްލާޞްތެރި ތައުބާއަކުން ތައުބާވުންމަތީގައި ދެމިހުރުމެވެ. ފާފައެއް ދެން ނުކުރަން އިޚްލާޞްތެރިކަމާއިއެކު ޢަޒުމް ކަނޑައަޅައިގެން ހުރުމެވެ. އެފަދައިން ހުރި އެއްވެސް މީހަކަށް މާޔޫސްވާކަށް ނުޖެހޭނެއެވެ! ފާފަތައް ގިނަވެ ފުއްސަވައި ނުދެއްވައިފާނެ ކަމަށް ޒައްރެއްގެ މިންވަރަށްވެސް ޝައްކުކުރުމެއް ނެތެވެ.
"ކަލޭގެފާނު ވިދާޅުވާށެވެ! އެއުރެންގެ އަމިއްލަ ނަފުސްތަކުގެ މައްޗަށް ފާފައިން އިސްރާފް ކޮށްފައިވާ، ތިމަންރަސްކަލާނގެ އަޅުތަކުންނޭވެ! ތިއަބައިމީހުން ﷲ ގެ ރަހްމަތުން އުންމީދު ކަނޑައިނުލާށެވެ! ހަމަކަށަވަރުން، ﷲ އީ، އެންމެހާ ފާފަތައްފުއްސަވާ ރަސްކަލާނގެއެވެ. ހަމަކަށަވަރުން، އެކަލާނގެއީ، ގިނަގިނައިން ފާފަފުއްސަވާ، ރަހީމް ވަންތަ ރަސްކަލާނގެއެެވެ." (އައްޒުމަރު: 53)
ދުޢާކުރުމަށްފަހު ދުޢާގައި އެދުނު ކަންކަން ހިންމަވައި ދެއްވެވުން ލަސްވާނަމަ ތިމާ ކުރި ދުޢާ ﷲ ތަޢާލާގެ ޙަޟްރަތަށް ފޯރައިފިކަމާއިމެދުވެސް ބައެއް މީހުން އެބަ ޝައްކުކުރެއެވެ. އެފަދަ ޝައްކުތައް ނުކުރާށެވެ! ދުޢާކުރުމާއިއެކު އެދުޢާ ﷲ ތަޢާލާގެ ޙަޟްރަތަށް ދަތުރުކުރާނެއެވެ.
ދެން އޮތީ ހިންމަވައިދެއްވެވުން ނުވަތަ ދުޢާ ޢިޖާބަކުރެއްވެވުމެވެ. ތިބާއަށް އެކަމަކުން އެންމެ ބޮޑަށް ފައިދާކުރާނެ ވަޤުތުގައި ހިންމަވައިދެއްވަވާނެތެވެ. އިން ޝާ ﷲ
- އިސްލާމީ ތިލަފަތުގެ ދަރުސަކުން
