ރާއްޖެއިން އިނގިރޭސިވިލާތަށް އެތެރެކުރާ މަހުން ނަގަމުން އައި ޓެރިފް ކަނޑާލުމާ ގުޅިގެން، ރާއްޖޭގައި މަސްގަތުމުގެ ހަގީގީ ވާދަވެރި ބާޒާރެއް އުފެދިފައިވާ ކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.
މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބުދެއްވަމުން ވަޒީރު ޝިޔާމް ވިދާޅުވީ، އިނގިރޭސިވިލާތުން ކުރިން ނަގަމުން އައި ޓެރިފް ކަނޑާލުމާއެކު ރާއްޖޭގެ މަސް އެކްސްޕޯޓްކުރާ ކުންފުނިތަކަށް %20 ގެ ބޮޑު ކުރިއެރުމެއް ލިބިފައިވާ ކަމަށެވެ. މި ބަދަލުގެ ސަބަބުން ރާއްޖޭގެ މަސްވެރިންގެ އަތުން ރަނގަޅު އަގުގައި މަސް ގަތުމުގެ ފުރުސަތު އަމިއްލަ ކުންފުނިތަކަށާއި ދައުލަތުގެ މަސް ކުންފުންޏަށް ފަހިވެގެން ގޮސްފައިވާ ކަމަށް ވަޒީރު ފާހަގަކުރެއްވިއެވެ.
ވަޒީރު ވިދާޅުވި ގޮތުގައި، އިނގިރޭސިވިލާތުގެ ބާޒާރަށް ގިނައިން މަސް އެކްސްޕޯޓް ކުރަނީ ރާއްޖޭގެ އަމިއްލަ ކުންފުނިތަކުންނެވެ. އެގޮތުން ހޮރައިޒަން ފިޝަރީޒް އަދި އެންސިސް ފަދަ ކުންފުނިތަކުން މަސްވެރިންގެ އަތުން މަސް ގަންނަ އަގު ވަނީ އުފުލިފައެވެ. މިހާރުގެ ބާޒާރުގެ އަގުތަކަށް އަލިއަޅުވާލައްވަމުން ޝިޔާމް ވިދާޅުވީ، ސަރުކާރުގެ މަސް ކުންފުނި، މިފްކޯއިން މިހާރު މަސް ކިލޯއެއް ގަންނަނީ 20 ރުފިޔާއަށްވުރެ ދަށްނުވާ އަގެއްގައި ކަމަށާއި، ބައެއް ހާލަތްތަކުގައި 22 ރުފިޔާއަށްވެސް މަސް ކިލޯއެއް ގަންނަމުންދާ ކަމަށެވެ.
މީގެ އިތުރުން، އަމިއްލަ ކުންފުނިތަކުން މިދުވަސްވަރު މަސް ގަންނަމުންދަނީ ކިލޯއެއް 21 ރުފިޔާއާއި 22 ރުފިޔާއާ ދެމެދުގެ އަގުތަކެއްގައި ކަން ވަޒީރު ފާހަގަކުރެއްވިއެވެ.
"ރަނގަޅު ހަގީގީ ވާދަވެރިކަމެއް އުފެދިފައިވާ ކަމަށް އަޅުގަނޑުމެން ގަބޫލުކުރަން،" މަޖިލީހުގައި ވާހަކަފުޅު ދައްކަވަމުން ވަޒީރު ޝިޔާމް ވިދާޅުވިއެވެ.
މަސްވެރިކަމުގެ ސިނާއަތަށް މި އައި ބަދަލަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މަސްވެރިންނަށް ލިބޭ އާމްދަނީ އިތުރުކުރުމަށް ކުރަމުންދާ މަސައްކަތުގެ ތެރެއިން ލިބުނު ބޮޑު ކުރިއެރުމެއްގެ ގޮތުގައި ސަރުކާރުން ސިފަކުރެއެވެ. އިނގިރޭސިވިލާތުން ޓެރިފް ކަނޑާލުމަކީ ދިވެހި މަސްވެރިން ބާނާ މަހަށް ބައިނަލްއަގުވާމީ ބާޒާރުގައި ލިބޭ އަގު މަތިވެ، މުޅި ސިނާއަތަށް އޭގެ ފައިދާ ކުރާނެ ކަމެއް ކަމަށްވެސް ވަޒީރު ވިދާޅުވިއެވެ.
