މެދުއިރުމަތީގެ ހަނގުރާމައާ ގުޅިގެން ރާއްޖޭގެ ފަތުރުވެރިކަމަށް ކުރި ނޭދެވޭ އަސަރުތަކުން އަރައިގަނެ، މިދިޔަ ޖުލައި މަހުން ފެށިގެން ރާއްޖޭގެ ފަތުރުވެރިކަން އާންމު ހާލަތަށް އިއާދަކުރެވިފައިވާ ކަމަށް ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުހައްމަދު އަމީން ވިދާޅުވެއްޖެއެވެ.
ވަޒީރު މިހެން ވިދާޅުވީ ދާދި ފަހުން ބޭއްވި "މޯލްޑިވްސް ޓުއަރިޒަމް އިންޓެލިޖެންސް ކުއާޓަލީ ބްރީފިން" ގައި ވާހަކަފުޅު ދައްކަވަމުންނެވެ. މި ބްރީފިން ބޭއްވުމުގެ އެންމެ ބޮޑު މަގުސަދަކީ ރާއްޖޭގެ ފަތުރުވެރިކަމުގެ ސިނާއަތް އިތުރަށް ހުޅުވާލައި، ރައްޔިތުންނާއި ރަށްރަށަށް އިތުރު ފުރުސަތުތައް ހޯދައިދިނުން ކަމަށް ވަޒީރު ފާހަގަކުރެއްވިއެވެ.
ވަޒީރު އަމީން ވިދާޅުވި ގޮތުގައި، މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ވައިގެ ދަތުރުފަތުރަށް އެރި ބުރޫތަކާ އެކު، ރާއްޖޭގެ ފަތުރުވެރިކަން ގާތްގަނޑަކަށް ހަތަރު މަސް ދުވަހުގެ މުއްދަތަށް ދަށްވެގެން ދިޔައެވެ. ނަމަވެސް، ފަތުރުވެރިކަމުގެ ސިނާއަތާއި ސަރުކާރު ގުޅިގެން ކުރި ހަރުދަނާ މަސައްކަތްތަކުގެ ނަތީޖާއެއްގެ ގޮތުން، ޖުލައި މަހުގެ ކުރީކޮޅުން ފެށިގެން ސިނާއަތް އަލުން އާންމު ހާލަތަކަށް ގެނެވިފައިވާ ކަމަށް އެމަނިކުފާނު ވިދާޅުވިއެވެ.
މީގެ އިތުރުން، ރާއްޖޭގެ މެހެމާންދާރީއަށް ފަތުރުވެރިން ކުރާ އިތުބާރު ބޮޑުކަން ތަފާސްހިސާބުތަކުން ހާމަވާކަން ވަޒީރު ފާހަގަކުރެއްވިއެވެ.
އެގޮތުން މިދިޔަ އަހަރުގެ ފަތުރުވެރިކަމުގެ ވިޒިޓާ ސާވޭގެ ނަތީޖާތަކަށް އަލިއަޅުވާލައްވަމުން ވަޒީރު ވިދާޅުވީ:
- ރާއްޖެއަށް ޒިޔާރަތްކުރާ ފަތުރުވެރިންގެ 90 އިންސައްތައަށް ވުރެ ގިނަ މީހުން، އެމީހުންގެ އާއިލާ އާއި ރަހުމަތްތެރިންނަށް ރާއްޖެއަށް ޒިޔާރަތްކުރުމަށް އިރުޝާދު ދޭނެ ކަމަށް ބުނެފައިވެއެވެ.
- 80 އިންސައްތައަށް ވުރެ ގިނަ ފަތުރުވެރިން ރާއްޖޭގައި ހޭދަކުރި ޗުއްޓީގެ ތަޖުރިބާއާމެދު އިންތިހާއަށް ހިތްހަމަޖެހޭކަން ހާމަކޮށްފައިވެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ފަތުރުވެރިކަން ކުރިއެރުވުމަށް ކުރަމުންދާ މަސައްކަތްތަކުގެ ތެރެއިން، މިފަދަ ކާމިޔާބީތަކަކީ ރާއްޖޭގެ އިގްތިސާދަށް ލިބިގެންދާ ބޮޑު ކުރިއެރުމެއްގެ ގޮތުގައި ވަޒީރު ސިފަކުރެއްވިއެވެ. ސަރުކާރުގެ އަމާޒަކީ ދިވެހިރާއްޖޭގެ ފަތުރުވެރިކަން އާ ހަރުފަތަކަށް ގެންގޮސް، އޭގެ މަންފާ ސީދާ ރައްޔިތުންނަށް ލިބޭނެ މަގު ފަހިކޮށްދިނުމެވެ.
