ދިވެހިރާއްޖޭގެ ފަޚުރުވެރި ޤައުމީ ދުވަހުގެ މުނާސަބަތުގައި ހއ. އުތީމުގައި ޚާއްސަ ސަގާފީ ޝޯވއެއް ކުލަގަދަކޮށް ބާއްވައިފިއެވެ. އުތީމަކީ ސަރުކާރުން މިއަހަރުގެ ޤައުމީ ދުވަސް ރަސްމީކޮށް ފާހަގަކުރުމަށް ކަނޑައަޅާފައިވާ ރަށެވެ.
ޤައުމީ ދުވަހުގެ ރަސްމީ ހަރަކާތްތަކުގެ ތެރޭގައި ހިމެނިގެން ކުރިއަށްދިޔަ މި ސަގާފީ ޝޯވ ބާއްވާފައިވަނީ ތާރީޚީ އުތީމު ގަނޑުވަރު މައިދާނުގައެވެ. ދެ ރެޔަކަށް ބަހާލައިގެން ކުރިއަށްގެންދާ މި ޝޯވގެ ހަރަކާތްތައް ބަލާލުމަށް އުތީމުގެ ގިނަ އަދަދެއްގެ ރައްޔިތުން ގަނޑުވަރު މައިދާނަށް ޖަމާވެފައިވެއެވެ. މީގެއިތުރުން، އެ ސަރަޙައްދުގެ ކައިރި ރަށްރަށުންވެސް ގިނަ ބަޔަކު މި ޝޯވ ބަލައިލުމަށް އުތީމަށް ޒިޔާރަތްކޮށްފައިވާކަން ފާހަގަކުރެވެއެވެ.
މި ހަރަކާތާ ގުޅޭގޮތުން އުތީމު ކައުންސިލުން ވިދާޅުވީ، މިފަދަ ސަގާފީ ޝޯވއެއް އިންތިޒާމްކުރުމުގެ މައިގަނޑު ބޭނުމަކީ ރަށުގެ ރައްޔިތުންނާއި ޒިޔާރަތްކުރާ ފަރާތްތަކުގެ މެދުގައި އެކުވެރިކަމާއި އެއްބައިވަންތަކަން އާލާކުރުން ކަމަށެވެ. އަދި ޤައުމީ ދުވަހުގެ އުފާވެރި މުނާސަބަތުގައި އާއިލާތަކަށް އެކުގައި ހިތްހަމަޖެހުމާއި އުފާވެރި ވަގުތުކޮޅެއް ހޭދަކުރުމުގެ ފުރުޞަތު ފަހިކޮށްދިނުމަކީވެސް މި ޝޯވގެ މުހިންމު މަޤުޞަދެއް ކަމަށް ކައުންސިލުން ފާހަގަކުރެއްވިއެވެ.
ހަމައެއާއެކު، ދިވެހިންގެ މުއްސަނދި ސަގާފަތާއި ކާބަފައިންގެ ޒަމާންވީ ކުޅިވަރުތައް އަންނަން އޮތް ޖީލުތަކަށް ދައްކުވައިދީ، ސަގާފީ ކަންކަން ދިރުވައި އާލާކޮށް ކުރިއެރުވުމަށް މިފަދަ ހަރަކާތްތަކަކީ ނުހަނު ބޭނުންތެރި ކަމެއް ކަމަށްވެސް އުތީމު ކައުންސިލުން ވިދާޅުވިއެވެ.
މި ޝޯވގައި ދިވެހި ސަގާފަތާއި ފަންނުވެރިކަން ދައްކުވައިދޭ ތަފާތު ގިނަ އައިޓަމްތަކެއް ހުށަހަޅައިދީފައިވާއިރު، ބެލުންތެރިންގެ ފަރާތުން މި ހަރަކާތަށް ވަނީ ބޮޑު ތަރުޙީބެއް ލިބިގެން ގޮސްފައެވެ.
