ވިޔަފާރި ރަޖިސްޓްރީ ކުރުމުގެ ޚިދުމަތްދޭ ކޯލް ސެންޓަރަށް 2026 ވަނަ އަހަރުގެ ޖުލައި މަހުގެ ތެރޭގައި 2,900 އަށްވުރެ ގިނަ ފޯނު ކޯލް ލިބިފައިވާއިރު، އޭގެ ތެރެއިން 99 އިންސައްތައަށްވުރެ ގިނަ ކޯލްތަކަށް ވަނީ ޖަވާބުދީފައެވެ.
މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑުން އާންމުކޮށްފައިވާ ތަފާސްހިސާބުތަކަށް ބަލާއިރު، 2026 ޖުލައި 1 އިން 31 ގެ ނިޔަލަށް އެ ކޯލް ސެންޓަރުން ވަނީ 2,900 އަށްވުރެ ގިނަ ކޯލަށް ޚިދުމަތް ދީފައެވެ. ކޯލްތަކަށް ޖަވާބުދިން ރޭޓް 99 އިންސައްތައަށްވުރެ މަތީގައި ހުރުމާއެކު، ކަސްޓަމަރުން ބޭނުންވި މައުލޫމާތާއި އެހީތެރިކަން ވަގުތުން ފޯރުކޮށްދީފައިވެއެވެ.
ޚިދުމަތުގެ ފެންވަރު ރަނގަޅު ކުރުމަށް ކުރެވެމުންދާ މަސައްކަތްތަކުގެ ދަށުން، ކޯލް ކުރާ ފަރާތްތަކުން އިންތިޒާރު ކުރަންޖެހޭ ވަގުތު އެވްރެޖްކޮށް ދެ މިނެޓުގައި ވަނީ ހިފެހެއްޓިފައެވެ. އަދި ނިމިދިޔަ މަހު ކޯލްތަކުގައި އެވްރެޖްކޮށް ތިން މިނެޓު ހޭދަވެފައިވާ ކަމަށް އެ ތަފާސްހިސާބުތަކުން ދައްކައެވެ.
ބިޒްނަސް ރެޖިސްޓްރޭޝަން ކޯލް ސެންޓަރު މެދުވެރިކޮށް ވިޔަފާރިތަކާ ގުޅުންހުރި ގިނަ ޚިދުމަތްތަކެއްގެ އެހީތެރިކަން ފޯރުކޮށްދެއެވެ. އޭގެ ތެރޭގައި ވިޔަފާރި ނަން ރިޒާވްކުރުން، ވިޔަފާރިތައް ރަޖިސްޓްރީކުރުން، ރަޖިސްޓްރީއަށް ބަދަލު ގެނައުން، ވިޔަފާރި ހަރަކާތްތައް ރަޖިސްޓްރީކުރުން އަދި އެކި ބާވަތުގެ ހުއްދަތައް ހޯދުން ހިމެނެއެވެ. ވިޔަފާރި ރަޖިސްޓްރީ ކުރުމުގެ ޚިދުމަތް ހޯދާ ފަރާތްތަކަށް ބޭނުންވާ އިރުޝާދާއި އެހީތެރިކަން އެ ސެންޓަރުން މެދުނުކެނޑި ދަނީ ފޯރުކޮށްދެމުންނެވެ.
ހަބަރު: ސަރުކާރު
