ޢާއިޝަތު ރަފާޙް ޢަލީ
އިމާމް އިބްނުލް ގައްޔިމް ރަޙިމަހުﷲ ބަޔާންކުރައްވާފައިވާ ގޮތުގައި، ﷲ ސުބްޙާނަހޫ ވަތަޢާލާ ހަނދުމަކުރުުން (ޛިކުރުކުރުން) ފަސް ބަޔަކަށް ބެހިގެންވެއެވެ.
ފުރަތަމަ ގޮތަކީ، ﷲ ސުބްޙާނަހޫ ވަތަޢާލާގެ ރީތި އިސްމުފުޅުތަކާއި ސިފަފުޅުތައް ހަނދުމަކުރުމެވެ. އެއީ ނަބިއްޔާ ﷺ ކިޔުއްވައި އުޅުއްވި ޛިކުރުތައް ކަމަށްވާ سبحان الله (ﷲގެ ހުސްޠާހިރުވަންތަކަން ހާމަކުރަމެވެ)، الحمد لله (ހުރިހާ ޙަމދެއްވަނީ ﷲ އަށެވެ)، لا اله الا الله (ﷲ ފިޔަވައި އެހެން އިލާހަކު ނުވެއެވެ) އަދި الله اكبر (ﷲ އެންމެ ބޮޑެވެ) ފަދަ ލަފްޒުތަކުން އެކަލާނގެއަށް ޙަމްދާއިޘަނާ ދެންނެވުމެވެ. ކީރިތި ގުރުއާނާއި ނަބިއްޔާ ﷺ ގެ ސުންނަތުން އަހަރެމެންނަށް ދަސްވެފައިވާ ސީދާ އެ ތައުރީފުގެ ބަސްތައް ބޭނުންކޮށްގެންނެވެ.
ދެވަނަ ގޮތަކީ، އެކަލާނގެ ސިފަފުޅުތަކާއި ރީތި އިސްމުފުޅުތަކުގެ މާނަ ހަނދުމަކޮށް، ﷲ ސުބްޙާނަހޫ ވަތަޢާލާއަށް ޙަމްދާއިޘަނާ ދެންނެވުމެވެ. އެގޮތުން ﷲގެ ހެއްދެވުންތައް ފެންނަ ހިނދު سبحان الله އޭ ބުނުމެވެ. ﷲ ސުބްޙާނަހޫ ވަތަޢާލާއީ އެންމެ މަތިވެރި ރަސްކަލާނގެއެވެ.
ތިންވަނަ ބަޔަކީ، އެކަލާނގެ އަމުރުފުޅުތަކާއި ނަހީތައް (މަނާކުރެއްވި ކަންތައްތައް) ހަނދުމަކުރުމުގެ ތެރެއިން ﷲ ސުބްޙާނަހޫ ވަތަޢާލާ ހަނދުމަކުރުމެވެ. މިސާލަކަށް، ތިބާ ވަގުތުން ނަމާދުކުރުމުން ﷲ ތިބާދެކެ ލޯބިވެވޮޑިގަންނަވައެވެ. އަދި މީހުން ނަމާދަށް ފަރުވާކުޑަކޮށް ދޫކޮށްލުމުން ﷲ ރުހިވޮޑިނުގަންނަވައެވެ.
ހަތަރުވަނަ ބަޔަކީ، އެކަލާނގެ ކުރައްވާފައިވާ އަމުރުފުޅުތަކަށް ކިޔަމަންވުމަށާއި، ޙަރާމްކުރެއްވި ކަންތައްތަކާ ދުރުހެލިވުމަށް އަވަސްވެގަންނަ ހިނދު، އެކަލާނގެ ހަނދުމަކުރުމެވެ.
ފަސްވަނަ ގޮތް : އެކަލާނގެ ދެއްވާފައިވާ ނިޢުމަތްތަކާއި، ބަރަކާތާއި، އޯގާތެރިކަމާއި، އެހީތެރިކަމުގެ އިތުރުން، އެކަލާނގެ އަޅާއަށް ދީލަތިވަންތަކަން މިންވަރުކުރެއްވި ވަގުތުތައް ހަނދުމަކުރުމެވެ. މިއީވެސް ޛިކުރުކުރުމުގެ އެންމެ މާތް ގޮތްތަކުގެ ތެރެއިން ހިމެނޭ ކަމެކެވެ.
ވީމާ، ޛިކުރުކުރުމުގެ މި ފަސް ބާވަތަކީވެސް ހިތާއި ދުލުން ކުރަންޖެހޭ ކަންތައްތަކެވެ.
- -މިއަދުނޫސް
