ކޮންމެ މީހަކީ ދީނަށް ދަޢުވަތުދެވޭނެ ފެންވަރުގެ މީހަކަށް ނުވެދާނެއެވެ. އެކަމަކު އެއީ ކޮންމެ މީހަކަށްވެސް ކުރެވިދާނެކަމެކެވެ. އެމީހެއްގެ ފެންވަރުންނެވެ. މިޘާލަކަށް ނަމާދުކުރަން ހަނދާންކޮށްދެވިދާނެއެވެ. އެއީވެސް ހަމަ ދަޢުވަތުދިނުމެކެވެ.
މީސްތަކުންނަށް ތެދުމަގުދައްކައިދީ ހެޔޮ ޢަމަލކުތައް ކުރުވަން މަސައްކަތްކުރުމަކީ ކޮންމެ މުސްލިމެއްގެ މައްޗަށްވެސް އޮތް އެންމެ ބޮޑު އެއް ވާޖިބެވެ. ފަށަންވީ އެމީހެއްގެ އަމިއްލަ ނަފްސުންނާއި ޢާއިލާއިންނެވެ. ޔަޤީންކުރަން މަސައްކަތްކުރަންވީ ތިމާއާއި ޢާއިލާއަކީ ﷲ ތަޢާލާއަށް ފުރިހަމަ ގޮތުގައި ކިޔަމަންތެރިކަން އަދާކުރާ ބައެއް ކަމެވެ. އެއަށްފަހު މަސައްކަތްކުރަންވީ ވީހައި ގިނަބައަކަށް ތެދުމަގު ދައްކައިދެވޭތޯއެވެ. ވީހާ ގިނަ ބައަކު ގޮވައިގެން ސުވަރުގެ ވަދެވޭތޯ މަސައްކަތްކުރުމަކީ ތިބާ ސުވަރުގެވައްދަވާނެ ސަބަބުކަމަށްވުން ގާތެވެ. މަސައްކަތް ފަށަންވީ އަމިއްލަ ޢާއިލާއިންނެވެ.
ރަސޫލް (ﷺ) ގެ އުންމަތް ބޮޑުކުރުމަކީ ކޮންމެ މުސްލިމެއްގެވެސް، ތިބާގެވެސް މަސްއޫލިއްޔަތަކަށްވާއިރު އެކަމަށް ތިބާކުރަނީ ކޮންކަމެއްހެއްޔެވެ؟ އެއްވެސްކަމެއް އެބަކުރަމުހެއްޔެވެ؟
ކޮންމެ ރަސޫލް ބޭކަލަކަށްވެސް ﷲ ތަޢާލާ ވަނީ މުޢްޖިޒާތްތަކެއް މިންވަރު ކުރައްވަވައިފައެވެ. އެއީ އެ މުޢްޖިޒާތްތަކުގެ ސަބަބުން މީސްތަކުން ﷲ ތަޢާލާއަށް ބިރުވެތިވެ އީމާންވުމަށެވެ. އެ މުޢްޖިޒާތްތަކުގެ ސަބަބުން މީސްތަކުންނަށް ﷲ ތައާލާގެ އެއްކައުވަންތަކަމާއި އުޅަދުންވަންތަކަމުގެ ހެކިތައް ދެއްކެވުމަށެވެ.
ރަސޫލް (ﷺ( ފިޔަވައި އެހެން ހުރިހާ ރަސޫލްބޭކަލުންނަށް ދެއްވެވި މުޢްޖިޒާތްތައް ވަނީ އެބޭކަލުންނާއި ހަމައިން ނިމިގެން ގޮސްފައެވެ. ކީރިތި ޤުރްއާން ފިޔަވައި ދެން ބާވައިލެއްވެވި 3 ފޮތް ވަނީ މީސްތަކުން އެމީހުން ބޭނުންވާ ގޮތަށް ބަދަލުކޮށް ކަރާމާތް ނަގާލައިފައެވެ. ބަދަލު ނުކުރެވި އޮތީ އަދި ނުވެސް ކުރެވޭނެ ފޮތަކީ ރަސޫލް (ﷺ) އަސް ބާވައިލެއްވެވި ކީރިތި ޤުރްއާނެވެ. އެފޮތަކީ ދުނިޔެ އޮތްހައި ދުވަހަކަށް ދިރި ދެމިއޮންނާނެ އެންމެ ބޮޑު މުޢްޖިޒާތެވެ.
އެފޮތަށް އެފަދަ މަތިވެރި ދަރަޖައެއް ދެއްވަވާފައިވުމުގެ ބޭނުން ހިފުމަކީ މުސްލިމުން ކޮންމެހެން ވެސް ކުރަން ޖެހޭނެ ކަމެކެވެ. ރަސޫލް (ﷺ) ހަދީޘްފުޅު ކުރައްވަވާފައިވަނީ އެ ފޮތުގެ ސަބަބުން ޤިޔާމަތް ދުވަހު އެންމެ ބޮޑު (އެންމެ މީހުން ގިނަ) އުންމަތަކީ ތިމަންކަލޭގެފާނުގެ އުންމަތްކަމުގައި ވެގެން ދިއުމަށް އުންމީދު ކުރައްވަވާ ކަމަށެވެ.
ސުވާލަކީ ރަސޫލް (ﷺ)ގެ އެ އުންމީދުފުޅު ކާމިޔާބުކުރެވޭތޯ އެމީހަކަށް ކުރެވުނީ ކޮންކަމެއްތޯއެވެ؟ އެންމެ މީހަކަށްވެސް އިސްލާމް ދީނަށް ދަޢުވަތު ދެވިއްޖެތޯއެވެ؟ ކީރިތި ޤުރްއާނުގެ އެންމެ ޢާޔަތެއް ނަމަވެސް މީހަކަށް ފޯރުކޮށްދެވިއްޖެތޯއެވެ؟
މިއީ ހަމަ ކޮންމެ މީހަކުވެސް ވިސްނައިލުން މުހިންމު ކަމެކެވެ. ރިވެތި ގޮތުގައި ކުރަން މަސައްކަތްކުރަން ޖެހިފައިވާ ކަމެކެވެ. ވީމާ ހަމަ ކޮންމެ މީހަކުވެސް މި ޙަދީޘްފުޅާއިމެދު ވިސްނައިލާށެވެ!
Nabi ﷺ said
Every Prophet was given miracles because of which people believed but what I've been given, is Divine Inspiration (Quran) which Allah has revealed to me. I hope that my followers will outnumber the followers of the other Prophets on the Day of Resurrection
Bukhari 4981
---އިސްލާމީ ތިލަފަތުގެ ދަރުސަކުން
