މުސްލިމް އުންމަތަށް ބެލިނަމަވެސް ކައިވެންޏާއި ވަރިކުރުން ހުރީ އެއްވަރަކަށް ނުވަތަ ވަރިގިނަވާ ގޮތަށެވެ. މިކަމަށް އެންމެންވެސް ކަންބޮޑުވެއެވެ. އެންމެ ގިނަ ބައަކު ކަންބޮޑުވަނީ ދަރިން ލިބިފައި ތިއްބައި ކައިވެނި ރޫޅޭތީއެވެ. ދަރިންތަކެއް ނިކަމެތިވާތީއެވެ.
ކައިވެނިކުރެވެން އެންމެ ފަސޭހަވާ ސަބަބުތަކުގެ ތެރޭގައި ހިމެނެނީ ތަނަވަސްކަމާއި ރަނގަޅު މުސާރައެއް ލިބުމާއި ލޯބިވުމާއި މިނޫންވެސް ދުނިޔަވީ ސަބަބުތަކެވެ. ދީނުގައި އެކަން އޮތްގޮތާއިމެދު ވިސްނަނީ މަދު ބައެކެވެ.
ނިކަން ވިސްނައިލަބަލާށެވެ! ޙަދީޘްފުޅުގައި މިއޮތީ އެކްން މުޅިން ތަފާތު ގޮތަކަށެވެ. ޙަދީޘްފުޅަށް ދިއުމުގެ ކުރިން ފިރިހެނުންނަށް ބަހެއް ބުނެލާނަމެވެ. އެއީ ޙަދީޘްފުޅުގައި އެއޮތްފަދަ ފިރިހެނަކަށްވުމެވެ. ހެޔޮލަފާ އަންތބަކު ލިބުމުން އަނިޔާވެރިނުވެ ގޮވައިގެން ސުވަރުގެ ދިއުމަށް މަސައްކަތްކުރާނެ މީހަކަށްވާށެވެ! ކައިވެނި ދެމެހެއްޓޭނީ އެއިރުންނެވެ.
ކަމެއްކުރުން ލަސްކޮށްގެން ނުވާނެ ކަމަށް ޙަދިޘްފުޅުގައި އޮތުމުން އެކަން އަވަސްކުރުމުގެ މުހިންމުކަން އެނގިގެންދެއެވެ. އެކަމުގެ ވަގުތު ޖެހުމުން މުސްލިމުން ލަސްކޮށްގެން ނުވާނެ 3 ކަމެއް ރަސޫލް (ﷺ) ވަނީ ހަދީޘްފުޅު ކުރައްވަވައިފައެވެ. އެއީ:
1 ވަގުތު ޖެހުމުން ނަމާދުކުރުމާއި
2 މީހަކު މަރުވުމުން ވަޅުލުމާއި
3 އަންހެނަކާއި ކައިވެނިކުރަން (އިސްލާމް ދީނުގައި އޮތް ފަދަ) ފިރިހެނަކު އެދުމުން އޭނާގެ ކައިވެންޏެވެ.
މިކަންކަމަކީ އެއިގެ އަމިއްލަ ޒާތަށް ބަލައިފިނަމަ ވަރަށް ކުދިކުދި ވަރަށް އާދައިގެ ކަންކަން ކަމުގައި ބައެއް މީހުން ދެކެއެވެ. ބައެއް މީހުންނަށް ކަންކަން އާދައިގެ ކަންކަމަށްވަނީ ގިނަގިނައިން ކުރިމަތިވުމުންނެވެ.
އެގޮތުން ބަލައިފިނަމަ ނަމާދަކީ ކޮންމެ ދުވަހަކު 5 ފަހަރު ބައްދަލުވާ އެއްޗެކެވެ. (ކުރަންޖެހޭ ކަމެކެވެ.) ކޮންމެ ދުވަހަކު ވެސް މީހުން މަރުވީމާ ވަޅުލައެވެ. ވަރިކައިވެނީގެ ކަންކަން ވެސް ކޮންމެ ދުވަހަކު ހިނގައެވެ. ވީމާ އެމީހުން ދެކޭ ގޮތުގައި މިއީ މާ މުހިންމު ބަސްފުޅުތަކެއް ނޫނެވެ.
ނަމަވެސް ޙަޤީޤަތަކީ އެއިގެ ދިމާ އިދިކޮޅެވެ. މި 3 ކަންތަކަކީވެސް ހަމަ ކޮންމެ މީހަކުވެސް އެންމެ އިސްކަން ދޭން ޖެހޭނެ ކަންކަމެވެ. އެގޮތުން ބަލާއިރު ފުރަތަމަ އެއޮތީ ފަރުޟު ނަމާދުގެ ވާހަކައެވެ. ވަގުތު ޖެހުމުން ވީހައި އަވަހަކަށް ނަމާދުކުރުމުގެ ފައިދާ އެއީ ކޮންމެހެންވެސް ޙާޞިލުކުރަންޖެހޭ އެންމެ މުހިންމު ކަންތަކެވެ.
ދެން އެއޮތީ މީހުންގެ ޖަނާޒާގެ ވާހަކައެވެ. އަހަރެމެންގެ ދީނުގައި އޮތީ މީހަކު މަރުވެއްޖެ ނަމަ އަވަހަށް ވަޅުލުމެވެ. މަޖުބޫރީ ޙާލަތެއްގައި ދިމާވެގެން ނޫނީ ލަސްކުރުމެއް ނެތެވެ. އެކަމުގެ މުހިންމުކަން ނިކަން ދެކިބަލާށެވެ. މީހަކު މަރުވުމުން ކުރާ ކަށުނަމާދުގައި ބައިވެރިވެއްޖެ ނަމަ އުހުދު ފަރުބަދަ ހައި ގިނަ ސަވާބު އެބަ ދެއްވަވަތެވެ. އަދި އޭނާގެ ޖަނާޒާގައި ބައިވެރިވެއްޖެ އަނެއްކާވެސް އުހުދު ފަރުބަދަ ހައި ގިނަ ސަވާބު އެބަ ދެއްވަވަތެވެ. ޖުމުލަކޮށް ބަލައިފިނަމަ އުހުދު ފަރުބަދައިގެ 2 ފަރުބަދަހައި މިންވަރަށް އެމީހަކަށް ސަވާބު ދެއްވަވަތެވެ.
3 ވަނައަށް ބަޔާން ކުރައްވާފައި އެވަނީ ހެޔޮލަފާ، ތަޤްވާވެރިކަންހުރި، އަދި އަންތބަކު ގޮވައިގެން ދިރިއުޅުމުގެ ޢަޒުމުގައި ހުރި އަދި އަންހެން މިހާ ވެސް ރުހި ޤަބޫލުވާ ފިރިހެނަކު ގޮސް ކައިވެންޏަށް އެދިއްޖެ ނަމަ އެކަން ކޮށްދިނުން ލަސް ނުކުރުމުގެ ވާހަކައެވެ. މިޒަމާނަށް ބަލައިފިނަމަ އެންމެ ގިނަ ބައަކު މަގުފުރެދި ނަރަކައަށް ވަންނަމުން ދާ އެއް ސަބަބަކީ ކައިވެނި ލަސްކުރުމެވެ.
އެންމެ ގިނަ ކައިވެނިތައް ރޫޅި، ކައިވެނީގައި ލިބިފައި ތިބި ދަރިން ނިކަމެތިވެ އަނބިން އެކަނިވެރިވަމުން އެދަނީވެސް ކައިވެނި ލަސްކުރުމުގެ އިތުރުން ކައިވެނީގެ އެންމެ މުހިންމު ޝަރުތުތަކަށް ނުބަލައި ކައިވެނިކުރާތީއެވެ. އެހެންކަމުން އަދިވެސް އެއް ފަހަރު މި މިބަޔާންކުރި ޝަރުޠުތައް ތަކުރާރުކޮށްލާނަމެވެ.
"ހެޔޮލަފާ، ތަޤްވާވެރި، އަދި އަންތބަކު ގޮވައިގެން ދިރިއުޅުމުގެ ޢަޒުމުގައި ހުރި އަދި އަންހެން މިހާ ވެސް ރުހި ޤަބޫލުވާ" މީހަކު ކަމުގައި ވުމެވެ. އެފަދަ މީހަކު ތިބާގެ ކައިވެންޏަށް އެދިއްޖެނަމަ އަވަހަށް ކައިވެނިކުރާށެވެ! ދެން އޮތްބައި ﷲ ތަޢާލާއަށް ވަކީލުކުރާށެވެ! ކާމިޔާބު ދިރިއުޅުމެއް ދެއްވަވާނެތެވެ. އިން ޝާ ﷲ
--އިސްލާމީ ތިލަފަތުގެ ދަރުސަކުން
