ބޭރު ފައިސާއާބެހޭ ގަވާއިދުގެ ދަށުން ބޭރު ފައިސާ މާރުކުރުމަށް ކަނޑައަޅާފައިވާ މުއްދަތުތަކަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބަދަލު ގެނެސްފިއެވެ.
މި ބަދަލާއެކު، ކުރިން ތިން ވަނަ މަހުގެ 28 ވަނަ ދުވަހުގެ ކުރިން މާރުކުރަން ޖެހުނު ނަމަވެސް، މިހާރު ފައިސާ މާރުކުރަން ޖެހޭނީ ހިނގަމުންދާ މަސް ނިމި ވިދިގެން އަންނަ ފުރަތަމަ މަހުގެ 28 ވަނަ ދުވަހުގެ ކުރިންނެވެ. އަދި އާ ތާވަލާ އެއްގޮތަށް، ކަނޑައެޅިފައިވާ މުއްދަތުގެ ތެރޭގައި ފައިސާ މާރުކުރުމުގެ އެންމެހައި ކަންކަން ފުރިހަމަކުރުމަށް އެމްއެމްއޭއިން ވަނީ އިލްތިމާސްކޮށްފައެވެ.
މީގެއިތުރުން، ބޭރު ފައިސާގެ މުޢާމަލާތްތަކާ ގުޅޭ މާލީ އިލްތިޒާމުތައް އެމްއެމްއޭއަށް އަންގަންޖެހޭ ގޮތަށް ގަވާއިދު ވަނީ އިސްލާހުކޮށްފައެވެ. އަދި މި ގެނެވުނު އިސްލާހުގެ ދަށުން ރިސޯޓުތަކަށް ލިބޭ އާމްދަނީގެ 40 އިންސައްތަ ރާއްޖޭގެ ބޭންކަކަށް މާރުކުރުން ވަނީ ލާޒިމުކޮށްފައެވެ.
