އަންނަ ދިރާސީ އަހަރުން ފެށިގެން އެންމެ ފުރަތަމަ ބަދަލު ގެންނާނީ ގްރޭޑް 1 ގެ ދަރިވަރުންގެ ފޮތްތަކަށް ކަމަށް ހާމަކޮށްފިއެވެ. މިއީ މަންހަޖަށް ގެންނަން ނިންމާފައިވާ އިސްލާހީ ބަދަލުތަކުގެ ތެރެއިން އެޅުމަށް ހަމަޖެހިފައިވާ މުހިންމު ފިޔަވަޅެކެވެ.
މި ބަދަލު ގެނައުމުގެ މައިގަނޑު ބޭނުމަކީ ކިޔަވައިދިނުމުގެ ލާނިން އޮބްޖެކްޓިވްސްތައް ތީމެޓިކްކޮށް، އެއް މާއްދާ އަނެއް މާއްދާއާ ގުޅުވައިގެން އުނގެނުމާއި އުނގަންނައިދިނުމުގެ ކަންކަން އިތުރަށް ފަސޭހަކުރުމެވެ. މި މަސައްކަތް ކުރިއަށް ގެންދަނީ ކެމްބްރިޖް ޔުނިވަރސިޓީ ޕްރެސް އެންޑް އެސެސްމަންޓުގެ ފަންނީ ލަފައާއި އެހީތެރިކަމާއެކުގައެވެ.
މީގެއިތުރުން، ކީ ސްޓޭޖް 1 ގެ އެހެން ގްރޭޑްތަކުގެ ފޮތްތަކަށް ބަދަލު ގެނައުމަށް ހަމަޖެހިފައިވަނީ 2028 ވަނަ އަހަރުއެވެ. މި ގެންނަ ބަދަލުތަކާ ގުޅިގެން މުދައްރިސުން އަހުލުވެރިކުރުވައި ތަމްރީނު ކުރުމުގެ މަސައްކަތް މިއަހަރުގެ ތެރޭގައި ކުރިއަށްދާނެ ކަމަށްވެސް މައުލޫމާތު ލިބެއެވެ.
