މެލޭޝިއާގެ ބޮޑުވަޒީރު އަންވަރު އިބްރާހީމް ދިވެހިރާއްޖެއަށް ކުރެއްވި ފުރަމާނަ ދަތުރުފުޅުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ލީޑަޝިޕަށާއި އެމަނިކުފާނުގެ ތަޞައްވުރަށް ވަރަށް ބޮޑަށް ތަޢުރީފުކުރައްވައިފިއެވެ.
އެގޮތުން، ފަލަސްޠީނުގެ މިނިވަން ދައުލަތެއް ޤާއިމުކުރުމަށް ވަކާލާތުކުރުމުގައި ރާއްޖެއިން ދައްކަމުންދާ ހިތްވަރާއި ސާބިތުކަން ބޮޑުވަޒީރު އަންވަރު އިބްރާހީމް ވަނީ ޚާއްޞަ ގޮތެއްގައި ފާހަގަކުރައްވާފައެވެ. ދުނިޔޭގެ ބައެއް ޤައުމުތަކުން ފަލަސްޠީނުގެ މައްސަލައިގައި ދެފުށްދެގޮތް ސިޔާސަތެއް ގެންގުޅެމުންދާ މި ދަނޑިވަޅުގައި، ރާއްޖެއިން އެއްވެސް ފަސްޖެހުމެއްނެތި ފަލަސްޠީނުގެ ޙައްޤުގައި އަޑުއުފުލަމުންދާކަން އެމަނިކުފާނު ފާހަގަކުރެއްވިއެވެ.
މީގެއިތުރުން، އިސްރާއީލުގެ ޕާސްޕޯޓު މަނާކުރުމަށް ދިވެހި ސަރުކާރުން ނިންމި ނިންމުމަކީ ހިތްވަރުގަދަ އަދި އިންސާފަށް ތާއީދުކުރާ ނިންމުމެއްގެ ގޮތުގައި ސިފަކުރައްވައި، އެ ނިންމުމަށް މެލޭޝިއާގެ ބޮޑުވަޒީރު ވަނީ މަރުޙަބާ ވިދާޅުވެފައެވެ.
ބޮޑުވަޒީރު އަންވަރު އިބްރާހީމްގެ ވިދާޅުވީ، ފަލަސްޠީނުގެ ޙައްޤުގައި ރާއްޖެއާއެކު އަބަދުވެސް ދެމިއޮންނާނެ ކަމަށާއި، މިކަމުގައި މެލޭޝިއާއިން ވެދެވެން އޮތް ހުރިހާ އެހީތެރިކަމަކާއި އެއްބާރުލުމެއް ދެއްވާނެ ކަމުގެ ފުރިހަމަ ޔަޤީންކަން ވަނީ އަރުވާފައެވެ.
މެލޭޝިއާގެ ބޮޑުވަޒީރު އަންވަރު އިބްރާހީމް ދިވެހިރާއްޖެއަށް ކުރެއްވި ފުރަމާނަ ދަތުރުފުޅު ކާމިޔާބުކަމާއެކު ނިންމަވާލެއްވުމަށްފަހު ރޭގެވަގުތެއްގައި ވަނީ ފުރާވަޑައިގެންފައެވެ.
