ސަރުކާރު ހިންގާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ނައިބު ރައީސްކަމުގެ މަގާމަށް 6 ބޭފުޅަކު މިއަދު އިންތިހާބުކޮށްފިއެވެ.
މި ބޭފުޅުން އެ މަގާމުތަކަށް އިންތިހާބުކޮށްފައިވަނީ ސޯޝަލް ސެންޓަރުގައި މިހާރު ކުރިއަށްދާ ޕީއެންސީގެ މަތީ މަޖިލީހުގެ ޖަލްސާގެ ތެރެއިންނެވެ. މާލެއާއި ރާއްޖޭގެ އެކި ކަންކޮޅުތަކުން 1،300 އަށް ވުރެ ގިނަ މަންދޫބުން ބައިވެރިވާ މި ބައްދަލުވުމުގައި ޕާޓީގެ އެކި ގުނަވަންތަކަށް މެންބަރުން ހޮވުމުގެ ވޯޓުލުން މިއަދު ވަނީ ކުރިއަށް ގެންގޮސްފައެވެ.
ޕީއެންސީގެ ނައިބު ރައީސްކަމަށް ޖުމްލަ 8 ބޭފުޅަކު ވާދަކުރެއްވި އިރު، ވޯޓުން އިންތިހާބުވި 6 ބޭފުޅުންނަކީ:
މި އިންތިހާބުގައި އެންމެ ގިނަ ވޯޓު ހޯއްދަވައިގެން ލިސްޓުގެ އެއްވަނަ ކަށަވަރުކުރެއްވީ ސްޕޯޓްސް މިނިސްޓަރު އަބްދުﷲ ރާފިއުއެވެ. އަދި ދެވަނައަށް އެންމެ ގިނަ ވޯޓު ފިޝަރީޒް މިނިސްޓަރު އަހުމަދު ޝިޔާމް ހޯއްދެވިއިރު، ތިންވަނައަށް އެންމެ ގިނަ ވޯޓު ލިބިވަޑައިގެންނެވީ ރައްޔިތުންގެ މަޖިލީހުގެ ނިލަންދޫ ދާއިރާގެ މެންބަރު ފާތިމަތު ސައުދާއަށެވެ.
މި މަގާމަށް ދެން ވާދަކުރެއްވި ދެ ބޭފުޅުންނަށް މި އިންތިހާބު ކާމިޔާބު ކުރެއްވޭ ގޮތެއް ނުވިއެވެ. އެގޮތުން ލޯކަލް ގަވަމަންޓް އޮތޯރިޓީ (އެލްޖީއޭ) ގެ ސީއީއޯ މުހައްމަދު ނިމާލަށް ލިބިވަޑައިގަތީ 301 ވޯޓެވެ. އަދި ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އަސްމާ ރަޝީދަށް ލިބިވަޑައިގަތީ 228 ވޯޓެވެ.
ޕީއެންސީގެ ހިންގުން ހަރުދަނާކުރުމުގެ ގޮތުން ގިނަ އަދަދެއްގެ މަންދޫބުންނާއެކު ފެށި މި މަތީ މަޖިލީހުގެ ސިލްސިލާ ބައްދަލުވުންތައް އަންނަ ހުކުރު ދުވަހުގެ ނިޔަލަށް ސޯޝަލް ސެންޓަރުގައި ކުރިއަށްދާނެ ކަމަށް އެ ޕާޓީން މައުލޫމާތުދެއެވެ.
