ފުޑް އެންޑް ހޮސްޕިޓާލިޓީ އޭޝިއާ މޯލްޑިވްސް (އެފްއެޗްއޭއެމް) 2026 ގެ ކަލިނަރީ ޗެލެންޖުގައި ވާދަކޮށް، މުޅި މުބާރާތުގެ އެންމެ މޮޅު ޝެފުގެ މަގާމު ދޫސިތު ޑީ2 ފޭދޫ މޯލްޑިވްސްގެ މުސްލިމާ އާދަމް ހޯދައިފިއެވެ. މިއީ މި ޝަރަފުވެރި އެވޯޑު ދިވެއްސަކު އަދި ދިވެހި އަންހެނަކު ކާމިޔާބުކުރި ފުރަތަމަ ފަހަރެވެ.
ހޯމަ ދުވަހުން ފެށިގެން ބުރާސްފަތި ދުވަހުގެ ނިޔަލަށް ކުރިއަށްދިޔަ މި މުބާރާތަކީ ފަތުރުވެރިކަމާއި މެހެމާންދާރީގެ ދާއިރާގައި މަސައްކަތްކުރާ ޝެފުންގެ ހުނަރު ދައްކާލުމަށް ރާއްޖޭގައި ބާއްވާ އެންމެ ބޮޑު އެއް ޕްލެޓްފޯމެވެ. މި އަހަރުގެ މުބާރާތުގެ 20 އަށް ވުރެ ގިނަ ކެޓަގަރީގައި ރާއްޖޭގެ ރިސޯޓުތަކާއި ހޮޓާތަކުގެ އިތުރުން ބައިނަލްއަގުވާމީ އިދާރާތަކުން އެތައް ސަތޭކަ ޝެފުންނެއް ވާދަކުރިއެވެ.
ހުޅުލެ އައިލެންޑް ހޮޓެލް (އެޗްއައިއެޗް) ގައި ބުރާސްފަތި ދުވަހުގެ ހެނދުނު ބޭއްވި އިނާމު ދިނުމުގެ ރަސްމިއްޔާތުގައި މުސްލިމާ ވަނީ އޭނާ ވާދަކުރި ހަތަރު ކެޓަގަރީން ތިން ރަން މެޑައްޔާއި އެއް ރިހި މެޑަލް ހާސިލުކޮށްފައެވެ. އެގޮތުން އެޕިޓައިޒާސް، ހޮޓް އެންޑް ކޯލްޑް، ޔެލޯފިން ޓޫނާ ސްޓީކް، ހޮޓް ކުކިން އަދި ސީފުޑް، ހޮޓް ކުކިން ކެޓަގަރީން އޭނާ ރަން މެޑަލް ހޯދިއިރު، ހަތަރުވަނަ ކެޓަގަރީން ހޯދީ ރިހި މެޑައްޔެވެ.
މުސްލިމާގެ މި ކާމިޔާބީއަކީ ކެއްކުމުގެ ދާއިރާގައި ދިވެހި އަންހެނުންނަށް ލިބުނު ތާރީޚީ ކާމިޔާބީއެއްގެ ގޮތުގައި އެފްއެޗްއޭއެމް އިން ވަނީ ސިފަކޮށްފައެވެ. އަދި މި ކާމިޔާބީން ދައްކުވައިދެނީ ރާއްޖޭގެ ހޮސްޕިޓާލިޓީ ދާއިރާގައި ދިވެހި ހުނަރުވެރިންގެ އަގުވަޒަންކުރެވޭ މިންވަރު އިތުރުވަމުން އަންނަކަން ކަމަށްވެސް ފާހަގަކޮށްފައިވެއެވެ.
މުސްލިމާގެ ކާމިޔާބީގެ އިތުރުން، އެންމެ މޮޅު އޯގަނައިޒޭޝަންގެ އެވޯޑު ހޯދީ ދޫސިތު ޑީ2 ފޭދޫ މޯލްޑިވްސްއެވެ. އެ ރިސޯޓުގެ ކަލިނަރީ ޓީމުން ވަނީ އެކި ކެޓަގަރީތަކުން ޖުމްލަ 18 އެވޯޑު ހޯދައި، މުބާރާތުގައި ބައިވެރިވި ރިސޯޓުތަކުގެ ތެރެއިން އެންމެ ގިނަ އެވޯޑު ހާސިލުކުރި ރިސޯޓުގެ ޝަރަފު ހޯދާފައެވެ.
އެފްއެޗްއޭއެމް ކަލިނަރީ ޗެލެންޖަކީ ބައިނަލްއަގުވާމީ ފަނޑިޔާރުންނާއި ހޮސްޕިޓާލިޓީ ދާއިރާގެ ތަޖުރިބާކާރުންގެ ކުރިމަތީގައި ޓެކްނިކަލް ހުނަރާއި އީޖާދީ ވިސްނުން ދައްކާލުމަށް ޝެފުންނަށް ލިބޭ ވަރަށް މުހިންމު ފުރުސަތެކެވެ. އެފްއެޗްއޭއެމް 2026 ނިންމާލާފައިވަނީ ބުރާސްފަތި ދުވަހު ބޭއްވި އިނާމު ދިނުމުގެ ހަފުލާއިންނެވެ.
