ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އާ ލީޑަޝިޕް ރަސްމީކޮށް އެކުލަވާލައި، އެކި މަގާމުތަކަށް އިންތިޚާބުވި ބޭފުޅުންނާއި އައްޔަންކުރެއްވި ބޭފުޅުން މިއަދު މަގާމުގެ ހުވާކުރައްވައި އިގުރާރުވެވަޑައިގެންފިއެވެ.
މިއަދު ބޭއްވި އެ ޕާޓީގެ މަތީ މަޖިލީހުގެ ޚާއްސަ ބައްދަލުވުމުގައި މަގާމުތަކުގެ އިގުރާރު ލައިދެއްވީ ދިވެހިރާއްޖެއިން ސިންގަޕޫރަށް ކަނޑައަޅުއްވާފައި ހުންނަވާ ޑެޕިއުޓީ އެމްބެސެޑަރު މުހުތާޒު މުހުސިނެވެ. މި ޖބައްދަލުވުމުގައި ޕާޓީގެ ޗެއާޕާސަންގެ ހައިސިއްޔަތުން ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވަނީ ހުވާކުރައްވާފައެވެ. މީގެއިތުރުން ޕާޓީގެ ނައިބު ރައީސުންގެ ގޮތުގައި ރައީސުލްޖުމްހޫރިއްޔާގެ ނައިބު ހުސައިން މުހައްމަދު ލަތީފާއި، ޕީޖީ ލީޑަރު އިބްރާހިމް ފަލާހު ވެސް ހުވާކުރެއްވިއެވެ.
ޕީއެންސީގެ ނައިބު ރައީސްކަމުގެ މަގާމަށް އ ިންތިޚާބުވެވަޑައިގެންނެވި ބޭފުޅުންގެ ތެރޭގައި ސްޕޯޓްސް މިނިސްޓަރު އަބްދުﷲ ރާފިއު، ފިޝަރީޒް މިނިސްޓަރު އަހުމަދު ޝިޔާމް، އިކޮނޮމިކް މިނިސްޓަރު މުހައްމަދު ސައީދު، ރައީސް އޮފީހުގެ އިސް ތަރުޖަމާނު މުހައްމަދު ހުސައިން ޝަރީފް، ރައްޔިތުންގެ މަޖިލީހުގެ ނިލަންދޫ ދާއިރާގެ މެންބަރު ފާތިމަތު ސައުދާ އަދި ބާރަށު ދާއިރާގެ މެންބަރު އިބްރާހިމް ޝުޖާއު ހިމެނިވަޑައިގަންނަވައެވެ.
ޕާޓީގެ އަސާސީ ގަވާއިދުގެ ދަށުން، ވަޒީރުންނާއި ވަޒީރުންގެ ފެންވަރުގެ ބޭފުޅުންގެ ތެރެއިން ޕާޓީގެ ރައީސް ޑރ. މުހައްމަދު މުއިއްޒު ލީޑަޝިޕަށް ކަނޑައެޅުއްވި ހަތް މެންބަރުންނަކީ:
އަބްދުﷲ ފަޔާޒު (ޗީފް އޮފް ސްޓާފް)
އަބްދުﷲ ނާސިރު (މިނިސްޓަރު)
މުހައްމަދު އަމީން (މިނިސްޓަރު)
ޣާލިޔާ އަލީ (މިނިސްޓަރު)
ޑރ. އަބްދުﷲ މުއްތަލިބު (މިނިސްޓަރު)
މުހައްމަދު ތޮލާލު (މިނިސްޓަރު)
އާދަމް ޝަރީފް އުމަރު (ސަފީރު) އެވެ.
ސަރުކާރު ހިއްސާވާ ކުންފުނިތަކުގެ ވެރިންގެ ތެރެއިން ސީއީއޯ އަބްދުއްރައްޒާގު ހަލީމް، އެޗްޑީސީގެ އެމްޑީ އަލީ ޒުހައިރު އަދި އެފްޑީސީގެ އެމްޑީ ހަމްދާން ޝަކީލް ވެސް ވަނީ ލީޑަޝިޕަށް އައްޔަންކުރައްވާފައެވެ.
މީގެއިތުރުން ޕާޓީގެ އިދާރީ މުހިންމު މަގާމުތަކުގެ ތެރެއިން ސެކްރެޓަރީ ޖެނެރަލް ކަމަށް މޫސާ ފަތުހީ އާދަމް، ޑެޕިއުޓީ އެސްޖީ ކަމަށް މުހައްމަދު ލަމްއާން އަދި ހަޒާންދާރުގެ މަގާމަށް ހުސައިން ފަހުމީ ވަނީ ހަމަޖައްސަވާފައެވެ. ހަމައެއާއެކު އަންހެނުންގެ ހަރަކާތުގެ ރައީސަކަށް ހެރިޓޭޖް މިނިސްޓަރު ޝަހީދާ މުހައްމަދު (ހީނާ ވަލީދު) އަދި ޒުވާނުންގެ ހަރަކާތުގެ ރައީސަކަށް އަބާން އަބްދުއްލަތީފް ވަނީ އިންތިޚާބުވެވަޑައިގެންފައެވެ.
މީގެއިތުރުން އަންހެންގެ މަޖިލީހަށް އިންތިހާބުކުރި 10 މެމްބަރުންނާއި ޒުވާނުންގެ މަޖިލީހަށް އިންތިހާބުކުރި ހަތް މެމްބަރުންގެ އިތުރުން މެމްބަރުންގެ މަޖިލީހަށް އިންތިހާބުކުރި 18 މެންބަރުން ވަނީ އިގުރާރުވެފައެވެ.
މި ޖަލްސާގައި ޕާޓީގެ ޑެޕިއުޓީ ޕީޖީ ލީޑަރުން ކަމަށްވާ މެންބަރު މުހައްމަދު އިސްމާއިލް އަދި މެންބަރު މުހައްމަދު ޝާހިދުގެ އިތުރުން، އަންހެނުންނާއި ޒުވާނުންގެ މަޖިލީހާއި ސްޓިއަރިން ކޮމިޓީތަކަށް އިންތިޚާބުވި ގިނަ އަދަދެއްގެ މެންބަރުން ވެސް ވަނީ މަގާމުގެ އިގުރާރުވެވަޑައިގެންފައެވެ.
