މިއަހަރުގެ މިހާތަނަށް މަކަރާއި ހީލަތުން ފައިސާ ހޯދުމުގެ ނުވަތަ ސްކޭމްގެ 1،584 މައްސަލައެއް ފުލުހުންގެ އިދާރާއަށް ރިޕޯޓްކޮށްފައިވާ ކަމަށާއި، މި މައްސަލަތަކުގައި 15 މިލިއަނަށް ވުރެ ގިނަ ރުފިޔާ ގެއްލިފައިވާ ކަމަށް ދިވެހި ފުލުހުންގެ ޚިދުމަތުން ހާމަކުރައްވައިފިއެވެ.
ފުލުހުންގެ ޚިދުމަތުން ބޭއްވި ނޫސްވެރިންގެ ބައްދަލުވުމެއްގައި މަޢުލޫމާތު ދެއްވަމުން ވިދާޅުވީ، ސްކޭމްތަކުގައި ގެއްލުނު ފައިސާގެ ތެރެއިން 44.3 އިންސައްތަ ނުވަތަ 6.6 މިލިއަން ރުފިޔާ އަނބުރާ ހޯދައި، އެ ފައިސާގެ ވެރިފަރާތްތަކާ މިހާރު ވަނީ ހަވާލުކުރެވިފައެވެ.
ފުލުހުން ހާމަކުރެއްވި ތަފާސްހިސާބުތަކަށް ބަލާއިރު، މިފަދަ މައްސަލަތަކާ ގުޅިގެން މިހާތަނަށް 53 މީހަކު ވަނީ ހައްޔަރުކޮށްފައެވެ. އަދި މީގެ ތެރެއިން 25 މައްސަލައެއް ޕްރޮސެކިއުޓް ކުރުމަށް ފޮނުވާފައިވާއިރު، މިހާތަނަށް 4 މީހެއްގެ މައްޗަށް ވަނީ ކުށް ސާބިތުވެ ހުކުމް ކޮށްފައެވެ. މީގެއިތުރުން، މި މައްސަލަތަކާ ގުޅިގެން ޖުމްލަ 3،300 އަށް ވުރެ ގިނަ ބޭންކު އެކައުންޓް އެކި މުއްދަތުތަކަށް ފްރީޒްކޮށްފައިވާ ކަމަށް ވެސް ފުލުހުން ވިދާޅުވިއެވެ.
ރިޕޯޓްކުރެވޭ މައްސަލަތަކުގެ ތެރޭގައި އެންމެ ގިނައިން ހިމެނެނީ އޮންލައިން ވިޔަފާރީގެ މުއާމަލާތްތަކާއި، ބޭރު ފައިސާ މާރުކުރުމުގެ މައްސަލަތަކުގެ އިތުރުން މީހުންގެ ޝަހުސު އޮޅުވާލައިގެން ފައިސާ ހޯދުމުގެ މައްސަލަތަކެވެ. ހަމައެއާއެކު، ފަތުރުވެރިކަމުގެ ދާއިރާގެ ވިޔަފާރިތަކަށް އަމާޒުކޮށްގެން ބުކިންގ ކެންސަލްކޮށް ރިފަންޑް ހޯދުމުގެ ނަމުގައި ހިންގާފައިވާ 80 ސްކޭމް މައްސަލައެއް ވެސް ފުލުހުންނަށް ވަނީ ރިޕޯޓްކޮށްފައެވެ.
