ޕިންކް އަދި ގްރީން ބިލްޑިންގްގައި ހިނގި ނުރައްކާތެރި އަލިފާނުގެ ހާދިސާއާ ގުޅިގެން، އެ ސަރަހައްދުގެ ސީސީޓީވީ ފުޓޭޖުތައް ފުލުހުން މިއަދު އާންމުކޮށްފިއެވެ. މި ހާދިސާ ހިނގާފައިވަނީ 12 ޑިސެންބަރު 2024 ގައެވެ.
ފުލުހުން އާންމުކުރި މައުލޫމާތުތަކަށް ބަލާއިރު، އިމާރާތުގައި އަލިފާނުގެ އަސަރު އެންމެ ފުރަތަމަ ފެންނަން ފަށާފައިވަނީ އެ ދުވަހުގެ ހެނދުނު 6:13 ހާއިރު ހައުސިން މިނިސްޓްރީ ހިންގާ ބައިގެ ތިރީ ފަންގިފިލާއިން ދުން އަރަން ފެށުމުންނެވެ. މި ހާދިސާ ކަމާބެހޭ އިދާރާތަކުގެ ސަމާލުކަމަށް ގެނެސް ރިޕޯޓުކޮށްފައިވަނީ އެ ވަގުތު އެ ސަރަހައްދުން ދަތުރުކުރި އެމްއެންޑީއެފްގެ އޮފް ޑިއުޓީ އޮފިސަރެކެވެ.
ސީސީޓީވީ ރެކޯޑިންގްތަކުން ދައްކާ ގޮތުގައި އެމްއެންޑީއެފްގެ ފަޔާ އެންޑް ރެސްކިއު ޓީމު އަލިފާން ނިއްވުމުގެ މަސައްކަތަށް އެ އިމާރާތުގެ ގޯތިތެރެއަށް ވަދެފައިވަނީ ހެނދުނު 6:35 ހާއިރުއެވެ. ނަމަވެސް، ސީލިންގް ތެރޭގައި ހުރި ކަރަންޓު ނަރުތަކެއްގައި ރޯވެ، އަލިފާންގަނޑު ހަލުވިކަމާއެކު އެކި ދިމަދިމާއަށް ފެތުރިގެން ދިޔުމުގެ ސަބަބުން އަލިފާންގަނޑު ކޮންޓްރޯލްނުވެ ވަރަށް ބޮޑަށް ބޮޑުވެގެން ދިޔައެވެ.
އަލިފާން ނިއްވާ ފަރާތްތަކުން ކުރި ބުރަ މަސައްކަތުން އަލިފާންގަނޑު މައިތިރިކުރެވުނީ އެ ދުވަހުގެ މެންދުރު 12:45 ހާއިރުއެވެ. އަދި އަލިފާން އެއްކޮށް ނިއްވާލެވުނީ ހަވީރު 3:30 ގައެވެ.
ފުލުހުން އިތުރަށް ކަށަވަރުކޮށްދީފައިވާ ގޮތުގައި، އެ އިމާރާތަކީ އެއްވެސް މީހަކަށް ސިއްރުން ވަދެވޭނެ ތަނެއް ނޫނެވެ. އަދި މި ހާދިސާ ހިނގުމުގެ ކުރިން އެ އިމާރާތަށް ވަދެ ނުކުމެ ހަދާފައިވަނީ އެކަމުގެ ހުއްދަ އޮތް މުވައްޒަފުން އެކަނި ކަމަށް ވެސް ފުލުހުން ވަނީ ވިދާޅުވެފައެވެ.
