އިންސްޓިޓިއުޓް އޮފް ޗާޓަޑް އެކައުންޓަންޓްސް އޮފް ދަ މޯލްޑިވްސް (ސީއޭ މޯލްޑިވްސް) އަށް ކޮންފެޑެރޭޝަން އޮފް އޭޝިއަން އެންޑް ޕެސިފިކް އެކައުންޓަންޓްސް (ސީއޭޕީއޭ) ގެ މެންބަރުކަން ލިބިއްޖެއެވެ.
މިއީ ރާއްޖޭގެ އެކައުންޓަންސީ ދާއިރާ ރެގިއުލޭޓްކުރާ އިދާރާގެ ހައިސިއްޔަތުން ސީއޭ މޯލްޑިވްސްއަށް ބައިނަލްއަގުވާމީ ގޮތުން ލިބިފައިވާ ކުރިއެރުންތަކަށް އިތުރުވި މުހިންމު ބޮޅެކެވެ.
ސީއޭޕީއޭ އަކީ އޭޝިއާ ޕެސިފިކް ސަރަހައްދުގެ ސަރަހައްދީ ޖަމާއަތުގެ ގޮތުގައި ދުނިޔޭގެ އެކައުންޓިންގގެ މައި އިދާރާ، އިންޓަނޭޝަނަލް ފެޑެރޭޝަން އޮފް އެކައުންޓަންޓްސް (އައިފެކް) އިން ކަނޑައަޅާފައިވާ ޖަމާއަތެވެ. މި ޖަމާއަތުގެ މެންބަރުންގެ ތެރޭގައި އޮސްޓްރޭލިއާ، ނިއުޒިލެންޑް، ޗައިނާ، އިންޑިއާ، ޖަޕާން، ދެކުނު ކޮރެއާ އަދި ކެނަޑާ ފަދަ ގައުމުތަކުގެ އެކައުންޓަންސީ އިދާރާތައް ހިމެނެއެވެ.
ދުނިޔޭގެ 143 އަށްވުރެ ގިނަ ގައުމެއްގެ 188 ޕްރޮފެޝަނަލް އެކައުންޓަންސީ އިދާރާތަކުގެ މައްޗަށް އެކުލެވޭ އައިފެކްގެ މެންބަރެއްގެ ހައިސިއްޔަތުން، އެ އިދާރާގައި ރާއްޖެ ތަމްސީލު ކުރަނީ ސީއޭ މޯލްޑިވްސްއިންނެވެ. މީގެއިތުރުން ސީއޭ މޯލްޑިވްސްއަކީ އޭޝިއަން-އޯޝެނިއަން ސްޓޭންޑަރޑް ސެޓަރސް ގުރޫޕު (އޭއޯއެސްއެސްޖީ) އާއި ސައުތު އޭޝިއަން ފެޑެރޭޝަން އޮފް އެކައުންޓަންޓްސް (ސަފާ) ގެ ވެސް މެންބަރެކެވެ. އަދި ވަކިވަކި ގައުމުތަކުގެ އެކައުންޓަންސީ ބޮޑީތަކާއެކު ހެދިފައިވާ އެމްއޯޔޫތަކުގެ ތެރެއިން ވެސް އިތުރު ޕާޓްނަޝިޕްތައް ސީއޭ މޯލްޑިވްސްއިން ވަނީ ގާއިމުކޮށްފައެވެ.
ސީއޭ މޯލްޑިވްސްގެ މިފަދަ ބައިނަލްއަގްވާމީ ޕާޓްނަޝިޕްތަކުގެ ސަބަބުން އެ އިދާރާގެ ބައިނަލްއަގްވާމީ ސްޓޭންޑިންގ އިތުރަށް ވަރުގަދަވެގެންދާނެއެވެ. އަދި މީގެ ސަބަބުން ރާއްޖޭގެ އެކައުންޓަންސީ އަދި އޮޑިޓިންގ ދާއިރާ މިހާރަށްވުރެ ބޮޑަށް ތަރައްގީކުރުމަށް ގިނަ ފުރުސަތުތަކެއް ފަހިވެގެންދާނެ ކަމަށް ބެލެވެއެވެ.
