އެދެމަފަރިންވެސް ވަޒީފާއަދާކުރެއެވެ. 2 ދަރިން އެބަތިއްބެވެ. ދިރިއުޅެނީ އަނބިމީހާގެ ގޭގައެވެ. ބޮޑުމުސާރަ ލިބެނީވެސް އަނބިމީހާއަށްކަމަށްވާތީ ގިނަ ޚަރަދުތައް ކުރަނީ އަނބިމިހާއެވެ. އެކަމަކަށް އަނބިމީހާއެއްވެސް ޝަކުވާއެއް ނުކުރެއެވެ.
ކައިވެންޏަށް 6 ވަނަ އަހަރު އެއްރޭ ފިރިމީހާ ގެއަށް އައުމުން އަނބިމީހާ އަނގައަކުން ނުބުންޏެވެ. ވާހަކަ ދެއްކުމުންވެސް މަޑުން އިނީއެވެ. ކޮންމެވެސް ކަމެއް ވަރަށް ގޯސްވެއްޖެކަން އެނގުމުން ވަރަށް ލޯބިން އަނބިމީހާގެ ގައިގަ ބައްދާލައިފަ ދޫކޮށްލުމުން އަނބިމީހާ ބުންޏެވެ.
"މިރޭ މިގެއަށް ޒުވާން އަންހެންކުއްޖަކު އައެވެ. ދަބަހެއްވެސް ހިފައިގެންނެވެ. ބުނީ މިގެއަކީ އޭނާގެ 4 އަހަރުވީ ލޯބިވެރިޔާގެ ގެކަމަށެވެ. މީގެއކުރިންވެސް އެތައް ފަހަރަކު މާލެއައިން ކަމަށާއި ބައިންދަނީ ގެސްޓްހައުސެއްގައި ކަމަށެވެ. މިފަހަރު ލޯންޗްދޮށަށް ބަލައި ނުދިއައިމަ ގެއަށް އައީ ކަމަށެވެ.
މިހުރިހާ ވާހަކަތަކަށްވުރެ ދެރަވީ އަހުރެން މަރުވެއްޖެކަމަށާއި ކައިވެނިކުރަން މިހާރު އެއްވެސް ހުރަހެއް ނެތްކަމަށް ބުނެފައިވާކަން އެނގުމުންނެވެ. މާލެއައީވެސް ކައިވެނިކުރަންކަމަށް އޭނާ ބުންޏެވެ."
ފިރިމީހާ އެހުރިހާ ވާހަކަތަކެއް ދޮގުކުރިއެވެ. އެއީ ދެމަފިރިން ލޯބިން އެކުގައި އުޅޭތީ ދޭތެރެޖައްސުވަން ބައަކު ރާވައިގެން ކުރިކަމެއް ކަމަށްވެސް ބުންޏެވެ. އެހިސާބަށް އަނބިމީހާ ތެދުވެގެންގޮސްފައި އެނބުރި އައީ އަންހެން ކުއްޖާ ގޮވައިގެންނެވެ.
އަންހެން ކުއްޖާގެ ކުރިމަތީގައި އެވާހަކަތައް ދޮގުކުރަން އަނބިމީހާ ބުނުމުން ފިރިމީހާގެ ބަސްހުއްޓުނެވެ. އަނގައިން ނުބުނެ ހުރެ އިސްދަށަށް ޖަހައިލުމުން އަނބިމީހާ ބުންޏެވެ. "އެހެންވީމާ ލިބޭ މުސާރަ ޚަރަދުކުރާގޮތްވެސް މިއެނގުނީއެވެ. އެކަމަކަށްވެސް މައްސަލައެއް ނެތެވެ. ވަރިކޮށްފައި އަވަހަށް ގެއިން ނުކުންނާށެވެ. މަރުވެފައިވާ މީހަކާއިއެކު އުޅެނިކޮށް މާބޮޑުދެރައެއްވެސް ލިބިދާނެއެވެ. މިހާރު މިގޭގައި މިއުޅެނީ ތިބާގެ އަނބިމީހާއެއް ނޫނެވެ. އޭނާގެ ޤަބުރެވެ."
ފިރިމީހާ މާފަށް އެދި ހަމައެކަނި އެރޭ ސިޓ8ިންގރޫމްގައި ނިދާލުމުގެ ފުރުޞަތަކަށް އެދުމުންވެސް ފުރުޞަތު ނުދީ ފިރިމީހާ ގެއިން ނެރެލީއެވެ. އަންހެން ކުއްޖާއާއިވެސް އެކުގައެވެ.
މިއީ އަޅުގަނޑުގެ އެންމެ ގާތް އެކުވެރި އުޚުތާއަށް ކަންތައް ދިމާވިގޮތެވެ. އަޅުގަނޑު ހިތަށް އަރަނީ މިބާވަތުގެ ބޮޑެތި ދޮގުތައް ހަދައި ޒުވާންކުދިން މަޅީގައި ޖައްސުވައިގެން ކިހާގިނަ ބައަކު މިހާރު އުޅޭނެބާވައެވެ! ހަމަޤައިމުވެސް ކޮންމެވެސް ދުވަހަކުން ބޭޒާރުވެސްވާނެއެވެ. ބޭޒާރުވީމާ ދިމާވާނީ ހަމަ މިފަދަ ގޮތެއްކަން ނުވިސްނަނީ ކީއްވެގެންބާވައެވެ!
- މިއަދުނޫހުގެ ކިޔުންތެރިއެއް
- ޢިބްރަތްތެރި ވާހަކަ
