އެދެމަފިރިންގެ ތިބެނީ 2 ފިރިހެންދަރިންނާއި އަންހެންދަރިފުޅެކެވެ. ދޮށީ ދެފިރިހެންދަރިންނެވެ. ބައްޕައަށް ގެއަށް އާދެވުނުއިރު އަންހެންދަރިފުޅު ފޮށިހިފައިގެން ގެއިން ނުކުންނަނީއެވެ. ގެއިން ނުކުމެގެންދިއުމަށެވެ.
ބައްޕަ އޭނާ ހުއްޓުވައި ގެއިން ނުކުމެގެންދާ ސަބަބާއިމެދު ސުވާލުކުރުމުން ބުންޏެވެ. "ބައްޕާއެވެ. އަޅުގަނޑަށް ލިބޭ މުސާރައިން މިގޭގައި ހުންނަން ޚަރަދުކޮށްފައި ބާކީއެއް ނުވެއެވެ. އެހެންވެ އެކުވެރިއެއްގެ ގެއިން ކުޑަކޮޓަރިއެއް ކުއްޔަށް ހިފައިފީމެވެ."
ހުރިހާ ޚަރަދެއް ބައްޕަކުރާއިރުވެސް ތިއަ ފައިސާއެއް ދެނީ ކާކުބުނެގެން ކާކަށްތޯ ސުވާލުކުރުމުން ބުނީ މަންމަ ބުނެގެން މަންމައަށް ކަމަށެވެ. ބައްޕަ މަންމައާއި ސުވާލުކުރީ ގޭގެ ޚަރަދަށް އޭނާ ދޭ ފައިސާއިން ކުރަނީ ކޮންކަމެއްތޯ އާއި 2 ފިރިހެންދަރިންގެ އަތުންވެސް ފައިސާ އަތުލަންތޯއެވެ؟" ޖަވާބު ނުދޭން ހުރެފައިވެސް މަންމައަށް ބުނެވުނީ 2 ފިރިހެންދަރިންގެ އަތުން ފައިސާއަތުނުލާ ކަމަށާއި އަންހެންދަރިފުޅުގެ އަތުން ފައިސާ އަތުލަނީ ޚަރަދުކުރަން ދަސްކޮށްދޭން ކަމަށެވެ. އެހިސާބުން ބައްޕަ ބުނީ "ޚަރަދުކުރަން ފިރިހެންދަރިންނަށް ދަސްކޮށްދިނުން މާމުހިންމު ކަމަށެވެ."
ދަރިފުޅުގެ އަތުން ފޮށި އަތުލާފައި ބައްޕަބުނީ ގެއިން ދާންޖެހޭނީ މަންމަ ކަމަށެވެ. އެއީ ދަރިންނަށް ތަފާތުކުރާތީ ކމަށެވެ. މަންމައަށް އަމުރުކުރީ ދަރިފުޅުގެ އަތުން އަތުލި ހުރިހާ ފައިސާތަކެއް ހަމަ މިހާރު ދަރިފުޅަށް ދިނުމަށެވެ. އެކަމަކު އެކަން ކުރެވޭކަށް ނެތެވެ. އެފައިސާތައް ވަނީ ރަްނދަރިންނަށް ދީ ހުސްކޮށްފައެވެ. އެކަން އެނގުމުން ބައްޕަ ބުނީ އަތުގައި ހުރި ގަހަނާތައް ވިއްކާފައިވެސް އެފައިސާ ދަރިފުޅަށް ދިނުމަށެވެ.
މަންމަ އެބުނީ ތެދަކަށް ނޫނެވެ. މަންމަގެ ގުއިދަރިއަކީ އަންހެންދަރިފުޅު ކަމަށްވީމާ އޭނާއަށް ދަތިކުރަން އޭނާގެ އަތުން ފައިސާ އަތުލަނީއެވެ. ރަންދަރިންގެ އަތުން އަތުނުލަނީއެވެ. މިއީ ކޮންފަދަ ބޮޑު ބޭއިންޞާފެއް ހެއްޔެވެ؟ އެދަރިފުޅުގެ އަތުން އަތުލާ ފައިސާ އެހެންދަރިންނަށް ދިނުމުން އަނިޔާވެރިކަން ބޮޑުނުވޭހެއްޔެވެ؟
ވިސްނާލަންވީ ދުނިޔޭގެ ކަންކޮޅުތަކުގައި މިފަދަ ހިތްދަތިޙާލުގައި ކިތައް ގުއިދަރިން އުޅޭނެކަމާއިމެދުގައެވެ. އެދަރިން އުޅެމުން ގެންދާނެ ނިކަމެތިޙާލެވެ. އަހުރެންގެ އާދޭހަކީ މިފަދަ ގޮތްގޮތަށް ކަންކަން ނުކުރުމެވެ. ދަރިންގެ މެދުގައި ޢަދުލުވެރިވުމެވެ.
- މިއަދުނޫހުގެ ކިޔުންތެރިއެއް
