ބައިވެރިއަކު ދެއްވެވުން އެދިގެން ދުޢާކުރާއިރު ދުޢާގައި ތިބާ އެދޭ މީހާގެ ނަން ނުދެންނެވިނަމަވެސް އެއީ ތިބާއަށް ފައިދާކުރާނެ މީހަކުނަމަ ތިބާގެ ހިތުގައިވާ މީހާ ތިބާއަށް ދެއްވަވާނެތެވެ. އެއީ ތިބާގެ ހިތް ﷲ ތަޢާލާ ދެނެވޮޑިގެންވާތީއެވެ.
ފުރަތަމަ ވާންވީ މިވާހަކައިގައިވާ ފަދަ ތަޤްވާވެރިއަކަށެވެ. ހެޔޮޢަމަލުތައްކުރާ މީހަކަށެވެ. އަޅުކަންކުރަންވީ ކަމަކަށް ބޭނުންވުމަކުން ނޫނެވެ. ކަމަކަށް ބޭނުންވުމުން އޮތީ ކުރާ އަޅުކަން ގިނަކޮށް ތަޤްވާވެރިކަން އިތުރުކުރަން މަސައްކަތްކުރުމެވެ. ދުޢާކުރި ބޭނުން ފުދުމުން އޮތީ ކުރިއަށްވުރެވެސް އިތުރުކުރުމެވެ. ޝުކުރުވެރިވުމަކީ އެއީއެވެ.
އެއީ ޔުނިވާސިޓިގެ ފަހު އަހަރެވެ. މިސްކިތުގެ އިމާމަކީ އަހުރެންނެވެ. އެހެންވެ އެހެންކުދިން ފަދައިން ލޯބިވެރިން ހޯދަން އުޅުމުގެ ފުރުޞަތު އަހުރެންނަށް ވަރަށް ކުޑައެވެ. އެކަމަކުވެސް ވަރަށް ގަޔާވާ އަންހެން ކުއްޖަކު ފެނުމުން އޭނާ ހޯދަން މަސައްކަތްކުރީމެވެ.
އެގޮތުން ސީދާ ނުބުނެ އޭނާ އާއި ވާހަކަދައްކަން ވަރަށް ގިނަ މަސައްކަތްކުރީމެވެ. ކޮންމެފަހަރަކުވެސް ލިބެނީ ހިނިތުންވުމެކެވެ. އަނގައަކުން ނުބުނެއެވެ. އެހެން އުޅެމުން ދަނިކޮށް ޔުނިވާސިޓީން ނިމި އެކުއްޖެއްގެ ރަށަށް ދާން ޖެހިއްޖެއެވެ. އަހުރެން ކުރި ބުރަ މަސައްކަތުން އަހުރެންނަށް ހޯދުނީ ހަމައެކަނި އޭނާގެ އެޑްރެހެވެ. ދެމީހުންގެ ސިޓީގެ ދުރުމިނުގައި އެތައް ސަތޭކަ ކިލޯމީޓަރު ހުރެއެވެ. އެހެންވެ ދެން ބައްދަލުވެވޭނެ ކަމުގެ އުންމީދު ގެއްލިގެން ދިއައެވެ.
ގެއަށްގޮސް އުޅެން ފެށުމުންވެސް އޭނާގެ ހަނދާންތަކާއި ދުރެއް ނުވެވުނެވެ. އެންމެފަހުން ކޮންމެ ރެއަކު ޢިޝާނަމާދަށްފަހު 2 ރަކްޢަތް، މެންދަމު ހޭލައި 4 ރަކްޢަތް އަދި ފަތިސްނަމާދުގެ ކުރިން 2 ރަކްއަތްކުރަން ފެށީމެވެ. ކޮންމެ ފަހަރަކުވެސް ކުރަނީ ވަރަށް ކުރުކުރު ދުޢާއެކެވެ. "ޔާ ﷲ! އިނބަ ﷲ މޫސާގެފާނަށް އަންތބަކު ދެއްވެވި ފަދައިން މިއަޅާގެ ހިތަށް ފިނިކަން ދެއްވަވާނދޭވެ!" މިފަދައިންނެވެ. އިތުރު ވާހަކަތައް ނުދެންނެވީ އަހުރެންގެ ހިތުގައިވާ އެއްޗެއް އެކަލާނގެ ދެނެވޮޑިގެންވާނެތީއެވެ!
މިގޮތަށް ކަންތައްކުރަންފެށިތާ 7 ވަނަ ދުވަހަކު ޔުނީގެ އެކުވެރިއަކު ގުޅާފައި ބުނީ ކަލޭ ނުލިބިގެން އުޅުނު ލޯބިވެރިޔާއާއި މިހާރު ބައްދަލުކުރުމަށެވެ. ކަންކަން ބަދަލުވެއްޖެކަމަށެވެ.
ކޮންމެއަކަސް ކޮންމެ ގޮތެއް މެދުވެރިވިނަމަވެސް ހެޔޮކަމަށް ވަކީލްކޮށްގެން އަނެއް ދުވަހު ރޭލުގައި ދަތުރުފެށީމެވެ. އެޑްރެހަށް ގޮސް ބައްދަލުކުރީމެވެ. ޢާއިލާއިން އަހުރެންނަށް މަރުޙަބާކިޔެވެ. ދެފަރާތުގެ މެދުގައި ވާހަކަ ދެކެވި 2 މަސްދުވަސްތެރޭގައި ކައިވެނިކުރެވުނެވެ. އަހުރެމެން އުފަލުގައި ދިރިއުޅެމުން މިއަންނަނީ އެކައިވެނިމަތީގައެވެ.
އަހުރެން މިކިޔައިދިނީ އަހުރެންގެ ތަޖުރިބާއެވެ. ލޯބިވެރިޔާ ހޯދަން އަހުރެން ކުރި މަސައްކަތާއި އަހުރެން ކުރި ދުޢާއެވެ. އިތުރަށް އެއްވެސް އެއްޗެއް ބުނާކަށް ނެތީމެވެ!
- މިއީ ދީނަށް ދަޢުވަތު ދެއްވަމުން ގެންދަވާ ޢިލްމްވެރިއަކު ވިދާޅުވެފައިވާ ވާހަކަކޮޅެކެވެ. އެހެންކަމުން މިއީ ތެދެއްކަމަށް މިއަދުނޫހުން ޤަބޫލުކުރަމެވެ. ޙާޞިލުކުރަން އޮތް ޢިބްރަތަކީ ކިތަންމެ ބޮޑަށް ލޯބިވީނަމަވެސް ހަޑިމުޑުދާރު ކަންކަން ނުކޮށް ރޭއަޅުކަންކޮށް ދުޢާކުރުމުން އެކަމަކީ އެމީހަކަށް ފައިދާހުރިކަމެއްނަމަ އެކަމެއް ހިންމަވައި ދެއްވަވާނެ ކަމެވެ. އިން ޝާ ﷲ
- މިއަދުނޫސް
