ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ސަރުކާރުން ކުރަމުންދާ މަސައްކަތުގެ ތެރެއިން، ބިދޭސީންނާ މެދު އިހުމާލުވާ ދިވެހީންނާ ދެކޮޅަށް ވެސް ހަރުކަށި ފިޔަވަޅު އަޅާނެކަމަށް ދާހިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު އަލީ އިހްސާން ވިދާޅުވެއްޖެއެވެ.
ވަޒީރު މިހެން ވިދާޅުވީ، މިދިޔަ ބުރާސްފަތި ދުވަހު އޮތް "އަހާ" ފޯރަމްގެ 7 ވަނަ އެޕިސޯޑުގައި އާންމުންގެ ބޭފުޅަކު ކުރެއްވި ސުވާލަކަށް ޖަވާބު ދެއްވަމުންނެވެ.
ވަޒީރު އިހްސާން ފާހަގަކުރެއްވި ގޮތުގައި، ގިނަ އަދަދެއްގެ ބިދޭސީން ދިވެހީންގެ ނިވަލުގައި ތިބެ، ވިޔަފާރި ކުރަމުން އަންނައިރު، އެ ބިދޭސީންނަކީ ބަރާބަރަށް ވިސާ ފީ ދައްކައިގެން އުޅޭ ބައެއް ކަމަށެވެ. އެމަނިކުފާނު ވިދާޅުވީ، މި ބިދޭސީން ދިވެހި މީހާއަށް ކޮންމެ މަހަކު ކުލިދޭހެން ފައިސާ ދެމުން އަންނަކަމަށާއި، މިހާލަތުގައި ބައެއް ދިވެހިންނަށް އެމީހުންގެ ނަމުގައި ހުރި ބިދޭސީ މީހާ ކުރާ ކަންތައްތައް ވެސް ނޭނގޭކަމަށެވެ.
މިކަން ހައްލުކުރުމަށްޓަކައި ގާނޫނީ އޮނިގަނޑަށް ބަދަލުތަކެއް ގެނެސްފައިވާއިރު، ބިދޭސީންގެ ކަންކަމުގައި އިހުމާލުވާ ފަރާތްތަކަށް ހަރުކަށި އަދަބުތައް ދެވޭނެކަމަށް ވަޒީރު ވިދާޅުވިއެވެ. އެގޮތުން، ބިދޭސީ މީހާ ލައްވާ ކުރުވަން ބުނާ ކަންތައް ނޫން އެހެންކަމެއް ކުރުވުމަކީ އިހުމާލެއް ކަމަށާއި، ވިސާ ވައިލޭޝަނަކީ ވެސް އިހުމާލެއް ކަމަށް އެމަނިކުފާނު ވިދާޅުވިއެވެ. މީގެ އިތުރުން، ބިދޭސީއަކު ލައްވާ މަސައްކަތް ކުރުވުމަށްފަހު މުސާރަ ނުދިނުމަކީ ވެސް ސަރުކާރުން އިހުމާލެއްގެ ގޮތުގައި ބަލާނެ ކަމެއް ކަމަށް ވަޒީރު ފާހަގަކުރެއްވިއެވެ.
ވަޒީރު އިހްސާން ހާމަކުރެއްވި ގޮތުގައި، އިހުމާލުވާ ކޮންމެ ބިދޭސީއެއްގެ ބޮލަކަށް 50,000 ރުފިޔާގެ ޖޫރިމަނާއެއް ކުރާނެއެވެ. މީގެ އިތުރުން، އިންސާނީ ވަގުފާރީގެ ހަމަތަކުން ބަލާއިރު އެފަދަ އިހުމާލެއްނަމަ، ޖިނާއީ ތަހުގީގު ހިންގާނެކަމަށް ވެސް އެމަނިކުފާނު ވިދާޅުވިއެވެ.
މި މައްސަލަ ހައްލުކުރުމުގައި ހަމައެކަނި ބިދޭސީންނަށް ފިޔަވަޅު އަޅައިގެން ނުވާނެ ކަމަށް ވަޒީރު ވިދާޅުވިއެވެ. އެމަނިކުފާނު ވިދާޅުވީ، "ރާއްޖޭގައި މިކަން އެއްކޮށް ހައްލުކުރުމަކީ ހުސްއެކަނި ބިދޭސީންނަށް ދޭތެރޭ ފިޔަވަޅު އެޅުމެއް ނޫން. ބިދޭސީން އެކްސްޕްލޮއިޓް ކުރާ ދިވެހިންނާއި ދޭތެރޭ ވެސް އެ އަޅަންޖެހޭ ގާނޫނީ ފިޔަވަޅުއެޅުން." އެހެންކަމުން، މިކަމުގައި އިހުމާލުވާ އެހެން ފަރާތްތަކަށް ވެސް ފިޔަވަޅު އަޅައިގެން ނޫނީ މި މައްސަލަ ހައްލުނުވާނެ ކަމަށް ވަޒީރު އިހްސާން ފާހަގަކުރެއްވިއެވެ.
އަންނަ އަހަރުގެ މެއި މަހާ ހަމައަށްދާއިރު މި ހުރިހާ ކަމަކާ އެކު ބިދޭސީންގެ މައްސަލަ ހައްލުވެގެން ދާނެކަމަށް ގަބޫލުފުޅު ކުރައްވާ ކަމަށް ވަޒީރު ވިދާޅުވިއެވެ. މިއާއެކު، ބިދޭސީން ހިންގާ ވިޔަފާރިތައް ދިވެހީންގެ އަތްމައްޗަށް އަންނާނެކަމަށް ވެސް އެމަނިކުފާނު ވިދާޅުވިއެވެ.
