ދިވެހިރާއްޖޭގެ ކުޅިވަރު ދާއިރާއަށް އިންގިލާބީ ބަދަލުތަކެއް ގެނައުމުގެ މުހިންމު ފިޔަވަޅެއްގެ ގޮތުން، މުޅި ގައުމުގައި ޖުމްލަ 27 އިންޑޯ ކޮމްޕްލެކްސް ތަރައްޤީ ކުރުމުގެ މަސައްކަތް ސަރުކާރުން ފަށާފައިވާ ކަމަށް، ޒުވާނުން ބާރުވެރިކުރުމާއި ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު މިއަދު ވިދާޅުވެއްޖެއެވެ. މިނިސްޓަރު މިކަން ހާމަކުރެއްވީ "އަހާ ފޯރަމް" ގައި ވާހަކަފުޅު ދައްކަވަމުންނެވެ.
ވަޒީރު ރާފިއު ވިދާޅުވީ، މި ބޮޑު މަސައްކަތުގެ ދަށުން، ހުޅުމާލެ ފޭސް ދޭއްގައި އަޅާ އިންޑޯ ކޯޓުގެ މަސައްކަތް ވަރަށް އަވަހަށް ފެށޭނެ ކަމަށެވެ. މީގެ އިތުރުން މާލެ ސަރަހައްދުގައި މިހާރު ހުރި ހަމައެކަނި އިންޑޯ ކޯޓަކީ މާލެ ޒުވާނުންގެ މަރުކަޒުގައި ހުންނަ ކޯޓުކަން ފާހަގަކުރައްވަމުން، އެކަން ބަދަލުކޮށް މާލެ ސަރަހައްދުގައި އިތުރު އިންޑޯ ކޯޓުތައް އެޅުމަށް ސަރުކާރުން އިސްކަންދެއްވާ ކަމަށް ވަޒީރު ވިދާޅުވިއެވެ.
މާލެ ސަރަހައްދަށް 33 އަހަރުވީއިރުވެސް އެޅިފައި ވަނީ އެންމެ އިންޑޯ ސެންޓަރެއް ކަމުގައި ފާހަގަކުރައްވައި، ވަޒީރު ވިދާޅުވީ ދާދި އަވަހަށް ހުޅުމާލެ ފޭސް 2 ގައި އިންޑޯ ކޮމްޕްލެކްސްއެއްގެ މަސައްކަތް ފެށިގެންދާނެ ކަމަށެވެ. އަދި އޭގެ އިތުރުން ހުޅުމާލެ ފޭސް 1 އަދި ވިލިމާލޭގައި ވެސް އިންޑޯ ފެސިލިޓީތަކެއް އަޅަން ސަރުކާރުން މަސައްކަތް ކުރަމުން އަންނަ ކަމަށް އޭނާ ހާމަކުރެއްވިއެވެ.
މި މަސައްކަތްތަކުގެ މައިގަނޑު މަޤްސަދުތަކުގެ ތެރޭގައި ކުޅިވަރު ލާމަރުކަޒުކޮށް ރާއްޖޭގެ އެކި ކަންކޮޅުތަކުގައި ބޮޑެތި މުބާރާތްތައް ބޭއްވުން ހިމެނޭ ކަމަށް ވަޒީރު ރާފިއު ވިދާޅުވިއެވެ. އޭނާ ވިދާޅުވީ، އެތުލީޓުންނަށް ތަފާތު ސްޓޭޑިއަމްތަކުގައި ވާދަކޮށް، ސްޓޭޑިއަމް ތަޖުރިބާ ކުރުމުގެ ފުރުސަތު ފަހިކޮށްދިނުމަކީ ވެސް މި މަޝްރޫޢުގެ މުހިންމު ބޭނުމެއް ކަމަށެވެ.
ވަޒީރު އިތުރަށް ވިދާޅުވީ: "ގާތް ގަނޑަކަށް 27 އިންޑޯ ކޮމްޕްލެކްސް ރާއްޖޭގެ އެކި ކަންކޮޅުތަކުގައި އަދި މާލެ ސަރަހައްދު ހިމެނޭ ގޮތައް ކުރިއަށް އެބަ ގެންދަން. މީގެ ބޭނުމަކީވެސް އިންޑޯގައި ކުޅޭ ކުޅިވަރުތައް ގަޑިތަކަށް ބަހާލައިގެން މުބާރާތްތަކާ އެއްޗެހި އެގޮތައް، ފަސޭހަކާމާއެކީ ގެންދިޔުން."
ސަރުކާރުން ކުޅިވަރު ގާނޫނަށް ގެނައި އިސްލާހާއެކު، ކުޅިވަރު އެސޯސިއޭޝަންތަކުން ވެސް އަންނަނީ އެކި ސަރަހައްދުތަކުގައި އޮފީސްތައް ހުޅުވުމުގެ މަސައްކަތް ކުރަމުންނެވެ. މިގޮތުން އެސޯސިއޭޝަންތަކުން އަސާސީ ގަވައިދުތަކަށް ބަދަލުގެނެސް، ކުޅިވަރު ލާމަރުކަޒުކުރުމަށް ސަރުކާރުން ކުރާ މަސައްކަތަށް އެއްބާރުލުން ދެމުންދާ ކަން ވެސް ފާހަގަކުރެއްވިއެވެ. 27 އިންޑޯ ކޮމްޕްލެކްސްއާއެކު، ރާއްޖޭގެ އެކި ކަންކޮޅުތަކުގައި ބޮޑެތި މުބާރާތްތައް ބޭއްވުމުގެ މަގު ފަހިވެ، ކުޅިވަރުގެ ތަރައްޤީއަށް ބޮޑު ކުރިއެރުމެއް ލިބޭނެ ކަމަށް ވަޒީރު ލަފާކުރެއްވިއެވެ.
