ފާއިތުވި ދެ އަހަރާއި ބައިގެ ތެރޭގައި ސަރުކާރުން ކުރި މަސައްކަތްތަކުގެ ނަތީޖާއެއްގެ ގޮތުން، އިންތިޒާމުވެގެން ހިންގާ ކުށްތައް، ޚާއްސަކޮށް ގޭންގު ކުށްތައް ވަރަށް ބޮޑަށް މަދުކުރެވިފައިވާ ކަމަށް ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާނު ވިދާޅުވެއްޖެއެވެ. މީގެ އިތުރުން މިހާރުވެސް 10 ގޭންގު ލީޑަރެއްގެ މައްސަލަ ފުލުހުން ތަހުގީގުކުރަމުންދާ ކަމަށް ވަޒީރު ހާމަކުރެއްވިއެވެ.
މިކަންކަން ވަޒީރު ހާމަކުރެއްވީ، ސަރުކާރުގެ ވުޒާރާތަކުގެ މަސައްކަތްތަކާ ގުޅޭ ގޮތުން އާއްމުން ކުރާ ސުވާލުތަކަށް ވަޒީރުން ޖަވާބުދެއްވުމަށް ބާއްވާ "އަހާ" ފޯރަމުގައި، ގޭންގު ކުށްތައް މަދުކުރުމަށް ސަރުކާރުން އަޅާފައިވާ ފިޔަވަޅުތަކާއި ނެރެވުނު ނަތީޖާއާ ގުޅޭ ގޮތުން އާއްމު މީހަކު ކުރި ސުވާލަކަށް ޖަވާބުދެއްވަމުންނެވެ.
ވަޒީރު އިހުސާނު ވިދާޅުވި ގޮތުގައި، މީގެ ކުރިން ގޭންގު ކުށްތަކަކީ ވަރަށް ބޮޑަށް އާއްމުވެފައިވާ ކަމެކެވެ. ގޭންގުތަކުގެ މެދުގައި ހިނގަމުންއައި މާރާމާރީތަކުގައި، އެވެރެޖުކޮށް އަހަރެއްގެ މައްޗަށް ދެ ޒުވާނުންނާއި ފަސް ޒުވާނުންނާ ދެމެދުގެ އަދަދަކަށް ޒުވާނުން ގަތުލުކުރަމުންދިޔަ ކަމީ ނުތަނަވަސްކަން އޮތް ކަމެއް ކަމަށް އޭނާ ފާހަގަކުރެއްވިއެވެ.
ގޭންގުތަކުގެ މައްސަލަ ހައްލުކުރުމަށް ސަރުކާރުން އެޅި އެންމެ މުހިއްމު ފިޔަވަޅެއްގެ ގޮތުގައި ވަޒީރު ފާހަގަކުރެއްވީ، ކުރިއްސުރެ ގޭންގުތައް ހަރަކާތްތެރިވަމުންއައި ސަރަހައްދުތަކުގައި ދިވެހި ފުލުހުން ހަރަކާތްތެރިވާ މިންވަރު އިތުރުކުރުމެވެ. ވަޒީރު ވިދާޅުވި ގޮތުގައި މިހާރު އެ ސަރަހައްދުތަކުގައި ގޭންގުތަކަށް ނިސްބަތްވާ މީހުން ހަރަކާތްތެރިވާ އަދަދަށްވުރެ ގިނައިން ފުލުހުން ހަރަކާތްތެރިވާނެއެވެ.
އަދި ސަރުކާރުން ގޭންގުތަކުގައި އުޅޭ ޒުވާނުންނަށް ދެ ހިޔާރެއް ދިން ކަމަށް އިހުސާން ވިދާޅުވިއެވެ. އެއީ މަސައްކަތާއި ވިޔަފާރީގައި ޝާމިލުވެ ކުށުގެ ވެށިން އަމިއްލައަށް ނުކުތުން ނުވަތަ ގާނޫނުގެ ދަށުން ކުށްވެރިވުން ކަމުގައި މިނިސްޓަރު ވިދާޅުވިއެވެ. އެގޮތުން ގޭންގްގުތަކުގައި އުޅުނު ގިނަ ކުދިން ޒިންމާދާރު ބަޔަކަށްވާން އަމިއްލަ އިހުތިޔާރުކޮށްފައިވާ ކަމަށާއި އަދި އެކަމާ އުފާ ކުރައްވާ ކަމަށްވެސް އިހުސާން ވިދާޅުވިއެވެ.
"އެމީހުންނަށް އަޅުގަނޑުމެން ދީފައިވާނެ ޗޮއިސެއް. އެ ޗޮއިސަކީ، ޒުވާން ކުދިންނޭ ތިއީ އަދި ކުރިމަގު އަދި އެބައޮތެއްނޫންހެއްޔޭ، މިކަމުން ދުރުހެލިވެ ވިޔަފާރިތަކުގައި އުޅެ ވަޒީފާއަށް ދާން. އެ ފުރުސަތު މިހާރު ދީފައި އޮންނާނީ. އުފަލާއެކު އަޅުގަނޑުމެން ފާހަގަކުރާކަމަކީ އެކުދިންގެ ތެރެއިން ގިނަ ކުދިން އިހުތިޔާރުކުރީ އެމަގު،" ވަޒީރު ވިދާޅުވިއެވެ.
ގޭންގުތަކުގައި އުޅުނު ޒުވާނުންނަށް އަނބުރާ މުޖުތަމައަށް އައުމަށް މަގުފަހިކޮށްދިނުމާއެކު، އިންތިޒާމުވެގެން ކުށްކުރުން ހުއްޓުވުމަށް ފުލުހުން ހާއްސަ މސައްކަތްތަކެއް ކުރަމުންދާކަން ވަޒީރު ފާހަގަކުރެއްވިއެވެ. އެގޮތުން މިހާތަނަށް 52 ޓާގެޓެޑް ގޭންގު އޮޕަރޭޝަންތައް ހިންގާފައިވާއިރު، އެ އޮޕަރޭޝަންތަކުގައި 10،000 އަށްވުރެ ގިނަ މީހުން ޗެކުކޮށް، 517 މީހަކު ހައްޔަރުކޮށްފައިވެއެވެ. އަދި މިމީހުންނާ ގުޅުންހުރި 670 އެއްހައި ސަކަލު ފުލުހުން ޓޯކޮށްފައިވެއެވެ.
ގޭންގުތަކުން އުމުރުން 14، 15 އަހަރުގެ ކުޑަކުދިން ކުށުގެ ވެއްޓަށް ތައާރަފުކޮށް ނާޖައިޒު ގޮތުގައި ބޭނުންކުރަމުންދާކަން ފާހަގަކުރައްވަމުން އިހުސާނު ވިދާޅުވީ، އެކަން ހުއްޓުވުމަށް ކުރެވުނު މަސައްކަތުގެ ތެރެއިން ގޭންގުތައް ހަރަކާތްތެރިވާ ތަންތަނުން 212 ކުއްޖަކު ނަގައި ފުލުސް ސްޓޭޝަންތަކަށް ގެނެސް ނަސޭހަތްދީ އާއިލާތަކާ ހަވާލުކޮށްފައިވާ ކަމަށެވެ. އަދި ކުޑަކުދިން ގޭންގު ކުށްތަކުގައި ބައިވެރިކުރުމަށް ސޭފް ހައުސްތަކުގެ ގޮތުގައި ބޭނުންކުރަމުންއައި 26 ތަނެއް ފުލުހުން ރެއިޑުކޮށް، އެކަންކަމަށް ބޭނުންނުކުރެވޭ ގޮތަށް މިހާރު ބަންދުކޮށްފައިވާ ކަމަށެވެ.
ނިމުނު ޖޫން މަހުން ފެށިގެން 10 ގޭންގު ލީޑަރެއްގެ މައްސަލަ ތަހުގީގުކުރަމުންދާކަން ހާމަކުރައްވަމުން ވަޒީރު ވިދާޅުވީ، އެމީހުންނާމެދު އައު ގާނޫނުގެ ދަށުން ފިޔަވަޅުއެޅިގެންދާއިރު، އިންތިޒާމީ ގޮތެއްގައި ޖަރީމާތައް ހިންގުމަށް ބޮޑު ހައްލެއް ލިބިގެންދާނެކަން ޔަގީންކުރައްވާ ކަމަށެވެ.
އެ މަސައްކަތްތަކުގެ ނަތީޖާއެއްގެ ގޮތުން، މިހާރު ކުރިން ފަލަސުރުހީތަކުން ފެންނަ ގޮތަށް ގޭންގު މާރާމާރީގެ ޚަބަރުތައް ވަރަށް ބޮޑަށް މަދުވެފައިވާ ކަމަށް ވަޒީރު ފާހަގަކުރެއްވިއެވެ. އަދި އޭނާ ހާމަކުރެއްވި ގޮތުގައި، މި ސަރުކާރުގައި ފާއިތުވި ތިން އަހަރެއްހައި ދުވަހުގެ ތެރޭގައި އެއްވެސް ދިވެހި ރައްޔިތެއްގެ ފުރާނަ ގޭންގު މާރާމާރީއެއްގައި ގެއްލިފައިނުވާނެއެވެ.
މި މައްސަލައިގެ ދާއިމީ ހައްލަކީ ހޯޕް އައިލެންޑު ގާއިމުކޮށް، އެތަނުގެ ތެރެއިން ކުދިންނަށް ދޭންޖެހޭ ތަރުބިއްޔަތާއި ހުނަރުތައް ފޯރުކޮށްދިނުން ކަމަށްވެސް ވަޒީރު ވިދާޅުވިއެވެ. މިއީ ގޭންގު ކުށްތަކުން މުޖުތަމަޢު ސަލާމަތްކޮށް، ޒުވާނުންނަށް އުޖާލާ މުސްތަޤްބަލެއް ކަށަވަރުކޮށްދިނުމަށް ސަރުކާރުން ކުރާ މުހިއްމު މަސައްކަތެކެވެ.
