ހުޅުމާލޭ ފޭސް އެކެއްގައި ޤާއިމުކޮށްފައިވާ ސިންތެޓިކް ޓްރެކް ބައިނަލްއަޤްވާމީ މިންގަނޑުތަކަށް ފެތޭގޮތަށް އަލުން ތަރައްޤީކުރުމުގެ ޢަމަލީ މަސައްކަތް އަންނަ މަހުގެ ފުރަތަމަ ދުވަހު ފެށުމަށް ސަރުކާރުން ނިންމައިފިއެވެ.
ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ހާމަކުރެއްވި ގޮތުގައި، ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވެރިކަމުގައި ހުޅުމާލޭގައި އެޅި ސިންތެޓިކް ޓްރެކް މިހާރު ވަނީ ވަރަށް ބޮޑަށް ހަލާކުވެފައެވެ. އަދި އޭގެ ސަބަބުން އެތަނުގައި ފަރިތަކުރާ އެތުލީޓުންނަށް އެކި ކަހަލަ އަނިޔާތަކާއި ގެއްލުންތައް ވަމުންދާކަން ވުޒާރާގެ ސަމާލުކަމަށް އައިސްފައިވާ ކަމަށް ވަޒީރު ފާހަގަކުރެއްވިއެވެ.
މީގެ އިތުރުން ވަޒީރު ވިދާޅުވީ، ހުޅުމާލޭގައި މިހާރު އޮތް ޓްރެކަކީ ބައިނަލްއަޤްވާމީ މިންގަނޑުތަކަށް ފެތޭ ޓްރެކެއް ނޫން ކަމަށެވެ. އެހެންކަމުން، ދިވެހި އެތުލީޓުން އެ ޓްރެކުގައި ޤައުމީ ފެންވަރުގެ ރެކޯޑެއް ހެދި ނަމަވެސް، ވޯލްޑް އެތުލެޓިކްސްގެ އުސޫލުތައް ހުންނަ ގޮތުން އެފަދަ ރެކޯޑުތައް ރަސްމީކޮށް ބަލައިނުގަންނަ ކަމަށް އެމަނިކުފާނު ވިދާޅުވިއެވެ. ސަބަބަކީ ބައިނަލްއަޤްވާމީ ފެޑެރޭޝަނުން ބަލައިގަންނަނީ ހަމައެކަނި ވޯލްޑް އެތުލެޓިކްސް އެސޯސިއޭޝަންގެ މިންގަނޑުތަކަށް ހަދާފައިވާ ޓްރެކްތަކުގައި ހަދާ ރެކޯޑުތައް އެކަނި ކަމަށްވާތީއެވެ.
އެހެންކަމުން، މި މައްސަލައަށް ދާއިމީ ޙައްލެއް ގެނައުމަށްޓަކައި، މިހާރު އޮތް ޓްރެކްގެ ބޭސް އެއްކޮށް ނަގައި، މެޓީރިއަލް އެއްކޮށް ބަދަލުކޮށްގެން މުޅިން އައު ސިންތެޓިކް ޓްރެކެއް އެޅުމަށް ވަނީ ހަމަޖެހިފައެވެ. އަދި އަންނަ މަހުގެ އެއްވަނަ ދުވަހު ފަށާ މި މަސައްކަތް، އަންނަ އަހަރުގެ ޖަނަވަރީ މަހުގެ ނިޔަލަށް އެއްކޮށް ނިންމައިލެވޭނެ ކަމަށް ވަޒީރު ރާފިޢު ވިދާޅުވިއެވެ.
ވަޒީރު އިތުރަށް ހާމަކުރެއްވި ގޮތުގައި، ހުޅުމާލޭ ޓްރެކްގެ އިތުރުން މާލޭގައި އޮންނަ ސިންތެޓިކް ޓްރެކް ވެސް ބައިނަލްއަޤްވާމީ ސްޓޭންޑަޑަށް ފެތޭގޮތަށް ބަދަލުކުރުމުގެ މަސައްކަތްތައް ސަރުކާރުން މިހާރު އަންނަނީ ކުރަމުންނެވެ.
