އަތޮޅުތެރޭގެ ރަށްރަށުގައި ސަރުކާރުން ގާއިމުކޮށްފައިވާ ކުޅިވަރާއި ގުޅުންހުރި އެކި ވަސީލަތްތައް ދެމެހެއްޓެނިވިގޮތެއްގައި ބަލަހައްޓައި މަރާމާތުކުރުމަށްޓަކައި ޚާއްސަ ޕްލޭނެއް ރޭވިފައިވާކަމަށް ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު ވިދާޅުވެއްޖެއެވެ.
ރަށްރަށުގައި ޤާއިމްކޮށްފައިވާ ކުޅިވަރު ދަނޑުތަކާއި ކޯޓުތައް ނުބެލެހެއްޓި، ހަލާކުވަމުންދާތީ އެކަމުގެ ކަންބޮޑުވުން ފާޅުކުރުމުން ވަޒީރު ރާފިއު ވަނީ އާދިއްތަ ދުވަހުގެރޭ ބޭއްވި "އަހާ" ފޯރަމުގައި މިކަމަށް ޖަވާބުދެއްވާފައެވެ.
" މިއަހަރުގެ ކުރީކޮޅުގައި އަޅުގަނޑުމެން މިނިސްޓްރީން ސާރކިއުލާއެއް ފޮނުވާލިން ކުޅިވަރުގެ ވަސީލަތްތައް މިނިސްޓްރީގެ ދަށަށް ގެންނަން. ބައެއް ކައުންސިލްތަކުގެ ދަށުގައި ހުރި ތަންތަނާއި އަދި ބައެއް ފަރާތްތަކުން ޑޮނޭޝަންގެ ގޮތުގައި ހައްދަވާފައި ހުރި ތަންތަންވެސް. މީގެ ބޭނުމަކީ ކުޅިވަރު ވުޒާރާގެ މެންޑޭޓް ތަންފީޒުކޮށް ދެމެހެއްޓެނިވި ގޮތެއްގައި ކުޅިވަރާއި ގުޅޭ ވަސީލަތްތަކަށް ބޮޑު ހަރަދެއްނުކޮށް ގިނަ ދުވަސްވަންދެން އެތަންތަނުގެ އުމުރު ގިަނ ދުވަހަށް ހިފެހެއްޓޭނެ ގޮތަކަށް ބެލެހެއްޓުން." ވަޒީރު ވިދާޅުވިއެވެ.
ވަޒީރު ވިދާޅުވީ މީގެ ކުރިން އޮނިގަނޑު ރޭވިފައި އޮތްގޮތުގެ ސަބަބުން ރަށްރަށުގައި ހުރި ބައެއް ފެސިލިޓީސްތައް ހުންނަނީ ރަށުގެ ކައުންސިލްގެ ދަށުގަކަމަށްވާއިރު، އަނެއްބައި ފެސިލިޓީސްތައް ހުންނަނީ ވުޒާރާގެ ބެލުމުގެ ދަށުގައިކަމަށެވެ. އަދި މިހާތަނަށް ވަށާޖެހޭ އުސޫލެއްގެ ދަށުން މިކަންކަން ބަލަހައްޓާނެ ނިޒާމެއް ޤާއިމްވެފައިނެތްކަމަށް ވަޒީރު ވިދާޅުވިއެވެ. އެހެންކަމުން ރާއްޖޭގެ އެކި ސަރަހައްދުތަކުގައި ހުރި އެތައް ވަސީލަތެއް ހަލާކުވެ، މަރާމާތުގެ ބަދަލުގައި ބަދަލުކުރަންޖެހޭ ހާލަތަށް ގޮސްފައިވާކަމަށެވެ.
މިމައްސަލައަށް އެދެވޭ ހައްލެއް ހޯދުމަށް ސަރުކާރުން ވަކި ޕްލޭނެއް ރާވާފައިވާކަމަށް ވަޒީރު ވިދާޅުވިއެވެ. އެގޮތުން ރާއްޖޭގައި ޤާއިމްކުރަމުންދާ ފިޓްނެސް އެންޑް ރެކްރިއޭޝަން ސެންޓަރުތަކުގައި އެކަމަށް ޚާއްސަކޮށް މުވައްޒަފުން ބޭތިއްބުމަށް ރާވާފައިވާކަމަށް ވަޒީރު ހާމަކުރެއްވިއެވެ. އެ މުވައްޒަފުން މެދުވެރިކޮށް، ޤަވާއިދުން ކުޅިވަރު ވަސީލަތްތައް ބަލަހައްޓާ މަރާމާތުކުރުމުގެ ކަންކަން ކުރެވެމުންދާނެކަމަށް ވަޒީރު ވިދާޅުވިއެވެ. އެހެންކަމުން ރާއްޖޭގައި ޤާއިމްކޮށްފައިވާ ކުޅިވަރު ވަސީލަތްތައް ދެމެހެއްޓެނިވިގޮތެއްގައި މޮނީޓާ ކުރެވި ބޭނުންވާ މަރާމާތުގެ ކަންކަން އުސޫލެއްގެ ދަށުން ކުރެވެމުންދާނެކަމަށް ވަޒީރު ވިދާޅުވެފަވެއެވެ.
މިކަން އެންމެ އެދެވޭގޮތެއްގައި ކުރިއަށް ގެންދިއުމަށްޓަކައި ރަށްރަށުގެ ފިޓްނެސް ސެންޓަރުތަކަށް ވަކި ޚާއްސަ ބަޖެޓެއް ކަނޑައަޅާނެކަމަށް ވަޒީރު ވިދާޅުވިއެވެ. އަދި މި ބަޖެޓާއެކު ވަށާޖެހޭ އުސޫލެއްގެ ދަށުން މިކަންކަން ހަމަޖެހިގެންދާނެކަމަށް ވަޒީރު ހާމަކުރެއްވިއެވެ.
ހަބަރު: ސަރުކާރު
