މެލޭޝިއާގައި ތަޢުލީމު ޙާސިލުކުރަމުންދާ ދިވެހި ދަރިވަރުންނަށް ކުރިމަތިވާ ދަތިތަކަށް އެދެވޭ ހައްލެއް ހޯދައިދެއްވާނެކަމުގެ ފުރިހަމަ ޔަޤީންކަން އެ ޤައުމުގެ ބޮޑުވަޒީރު އަންވަރު އިބްރާހީމް ދެއްވާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޕީއެސްއެމްގެ "ނޭޝަން ޗެޓް" ޕްރޮގްރާމްގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، އެމަނިކުފާނުގެ ދަޢުވަތަކަށް މެލޭޝިއާގެ ބޮޑުވަޒީރު ދިވެހިރާއްޖެއަށް ކުރެއްވި ފުރަމާނަ ދަތުރުފުޅަކީ ދެ ޤައުމުގެ ގުޅުމުގެ ތެރެއިން މުހިންމު ނިންމެވުންތަކެއް ނިންމެވި، އަދި އުފާވެރި ޚަބަރުތަކެއް ލިބިގެންދިޔަ ދަތުރުފުޅެއް ކަމަށެވެ.
އެގޮތުން، މެލޭޝިއާގައި ކިޔަވަމުންދާ 2,700 އެއްހާ ދަރިވަރުންނާއި، އެ ކުދިންގެ އާއިލާތަކާއެކު އެ ޤައުމުގައި ދިރިއުޅޭ 6,000 އަށްވުރެ ގިނަ ދިވެހިންނަށް ދިމާވާ ދަތިތައް ހައްލުކޮށް، ލުއިފަސޭހަ އިންތިޒާމުތަކެއް ހަމަޖައްސައިދެއްވާނެކަމުގެ ޔަޤީންކަން ބޮޑުވަޒީރު ދެއްވާފައިވާކަން ރައީސް ފާހަގަކުރެއްވިއެވެ.
ޚާއްޞަކޮށް، ތަފާތު ދާއިރާތަކުން ތަޢުލީމު ޙާސިލުކުރާ ދަރިވަރުންނަށް އިންޓަރންޝިޕްގެ ފުރުޞަތުތައް ފަސޭހައިން ލިބޭނެ މަގުފަހިކޮށްދެއްވާނެކަމަށް ބޮޑުވަޒީރު ވިދާޅުވިކަމަށް ރައީސް ފާހަގަކުރެއްވިއެވެ. "ކަންކަން ފަސޭހަކޮށްދެއްވާނެކަމަށް ވިދާޅުވި. އޭގެ ތެރޭގައި ކިޔަވާ ކުދިންނާއި ކިޔަވަން ދާން ބޭނުންވާ ކުދިންނަށް ބޭނުންވާ ކަންކަމުގެ އިތުރުން، މިސާލަކަށް ޑޮކްޓަރުކަން ކިޔަވާ ކުދިންގެ އިންޓަރންޝިޕް ކަންތައްތައް ހަމަޖައްސަވައިދެއްވަން މަސައްކަތްކުރައްވާނެކަމަށް ވިދާޅުވި،" ރައީސް ވިދާޅުވިއެވެ.
މީގެ އިތުރުން، ދެ ޤައުމުގެ ދެމެދުގައި ސޮއިކުރުމަށް ހަމަޖެހިފައިވާ 100 މިލިއަން ޑޮލަރުގެ ކަރަންސީ ސޮވަޕް އެގްރީމަންޓްގެ ކަންކަން އަވަސްކުރުމަށް އިސްކަންދެއްވާނެކަމުގެ ޔަޤީންކަންވެސް ބޮޑުވަޒީރު އަންވަރު އިބްރާހީމް ދެއްވާފައިވާކަމަށް ރައީސުލްޖުމްހޫރިއްޔާ ވިދާޅުވިއެވެ.
