ދިވެހިންގެ އުފެއްދުންތެރިކަމުގެ މައުރަޒުގައި ބައިވެރިކޮށްފައިވާ ތަކެތި ބަލައިގަންނާނެ ތާރީޚްތައް ބިޒްނަސް ސެންޓަރ ކޯޕަރޭޝަން (ބީސީސީ) އިން އާންމުކޮށްފިއެވެ. މި މައުރަޒުގެ ވާދަކުރުމުގެ ބައިގައި ބައިވެރިވުމުގެ ފުރުޞަތު މިހާރު ބަންދުވެފައިވީ ނަމަވެސް، ފޯމު ހުށައެޅި ފަރާތްތަކުން ހުށައަޅާ ހުށައެޅުންތައް ރަޖިސްޓްރީކުރުމުގެ ފުރުޞަތު މިހާރު ވެސް ވަނީ ހުޅުވާލާފައެވެ.
ބީސީސީން މަޢުލޫމާތުދޭ ގޮތުގައި 700 އަށްވުރެ ގިނަ މީހުން ވާދަކުރުމުގެ ބައިގައި ބައިވެރިވާން ހުށައަޅާފައިވާއިރު، މިހާތަނަށް 6000 އަށްވުރެ ގިނަ ތަކެތި މައުރަޒުގައި ބެހެއްޓުމަށް ވަނީ ރަޖިސްޓްރީކޮށްފައެވެ.
ބީސީސީން ހާމަކޮށްފައިވާ ތާވަލުގައިވާ ގޮތުން އެކި ގިންތިތަކުގެ ތަކެތި ބަލައިގަތުމަށް ހަމަޖެހިފައިވަނީ ތަފާތު ތާރީޚްތަކުގައެވެ.
އެހެނިހެން ހުރިހާ އުފެއްދުންތައް 07 އޮކްޓޫބަރު އިން 13 އޮކްޓޯބަރަށް ބަލައިގަންނައިރު ކާބޯތަކެތި، ދަނޑުވެރިކަމުގެ އުފެއްދުންތައް (ވެލިއު އެޑިޝަން ހިމެނޭހެން) އަދި މަސްވެރިކަމުގެ އުފެއްދުންތައް (ވެލިއު އެޑިޝަން ހިމެނޭހެން) ބަލައިގަންނާނީ 15 އޮކްޓޫބަރަށެވެ. އަދި ކޭކް ޑެކަރޭޝަން ބަލައިގަންނާޏީ 17 އޮކްޓޫބަރު ގައި ކަމަށެވެ.
މީގެއިތުރުން އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ ގިންތީގެ އުފެއްދުންތައް ބަލައިގަންނާނީ އޮންލައިން ލިންކެއް މެދުވެރިކޮށް ކަމަށާއި، އެ ލިންކް ފަހުން ހިއްސާކުރައްވާނެ ކަމަށް ބީސީސީން ވަނީ ވިދާޅުވެފައެވެ.
ތަކެތި ބަލައިގަތުމަށް ހަމަޖެހިފައިވަނީ ކަނޑައެޅިފައިވާ މުއްދަތުގެ ތެރޭގައި ކޮންމެ ދުވަހަކު ހެނދުނު 10:00 އިން ރޭގަނޑު 20:00 އަށް، ހުޅުމާލެ ސެންޓްރަލް ޕާކްގައި މައުރަޒު ބޭއްވުމަށް ހަމަޖެހިފައިވާ ސަރަހައްދުގައެވެ. ތަކެތި ހަވާލުކުރާއިރު ޕޯޓަލް މެދުވެރިކޮށް ހުށަހަޅަންޖެހޭ ހުރިހާ މައުލޫމާތު ފުރިހަމަކުރަން ޖެހޭނެ ކަމަށާއި، ބަންދުކުރަންޖެހޭ ތަކެތި ހުންނަންވާނީ ރައްކާތެރިކަމާއެކު ބަންދުކޮށްފައި ކަމަށް ވެސް އެ ކޯޕަރޭޝަނުން މައުލޫމާތުދެއެވެ.
މިއަހަރުގެ ދިވެހިންގެ އުފެއްދުންތެރިކަމުގެ މައުރަޒު ކުރިއަށްދާނީ އޮކްޓޫބަރު 25 އިން ނޮވެންބަރު 2 ގެ ނިޔަލަށެވެ.
