މި އަހަރުގެ ޖުލައި މަހާ އަޅާބަލާއިރު އޯގަސްޓް މަހު ރާއްޖޭގެ ކޮންސިއުމަރ ޕްރައިސް އިންޑެކްސް (ސީޕީއައި) %1.15 ދަށަށް ގޮސްފައިވާ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސްގެ ހިސާބުތަކުން ދައްކައިފިއެވެ.
ތަފާސްހިސާބުތަކުން ދައްކާ ގޮތުގައި، ޖުލައި މަހާ އަޅާބަލާއިރު އޯގަސްޓް މަހު އަގުތައް ދަށަށް ދިއުމުގެ މައިގަނޑު ސަބަބަކީ ކަރަންޓުގެ އަގާއި، ވައިގެ ދަތުރުފަތުރުގެ އަގުތައް އަދި ދުންފަތުގެ އަގުތައް ހެޔޮވުމެވެ.
ސަރަޙައްދުތަކަށް ބަލާއިރު، ވޭތުވެދިޔަ އޯގަސްޓް މަހު ސީޕީއައި އިންޑެކްސް މާލޭގައި %1.57 ދަށަށް ގޮސްފައިވާއިރު، އަތޮޅުތެރޭގެ ރަށްރަށުގައި ސީޕީއައި ދަށަށް ގޮސްފައިވަނީ %0.54 އެވެ.
އޯގަސްޓް މަހު އާންމުކޮށް އަގުތައް ދަށަށް ދިޔަ ނަމަވެސް، ކާބޯތަކެތީގެ ބައެއް ބާވަތްތަކުގެ އަގު ވަނީ އުފުލިފައެވެ. އެގޮތުން ބިސް، މޭވާ، ތަރުކާރީ، މަސް އަދި ކިރުގެ އުފެއްދުންތަކުގެ އަގު އޯގަސްޓް މަހު ވަނީ މައްޗަށް ގޮސްފައެވެ.
މީގެއިތުރުން، ޚިދުމަތްތަކުގެ އަގުތަކަށް ބަލާއިރު މުވާސަލާތީ ޚިދުމަތްތަކާއި، ގެސްޓްހައުސްތަކުގެ އަގުތަކާއި، ކެފޭ އަދި ރެސްޓޯރެންޓްތަކުގެ އަގުތަކުގެ އިތުރުން ސިއްހީ ޚިދުމަތްތަކުގެ އަގު ވަނީ ބޮޑުވެފައެވެ.
މަހުން މަހަށް ބަލާއިރު އޯގަސްޓް މަހު އަގުތައް ދަށަށް ދިޔަ ނަމަވެސް، ވޭތުވެދިޔަ އަހަރުގެ އޯގަސްޓް މަހާ އަޅާބަލާއިރު މިއަހަރުގެ އޯގަސްޓް މަހު އަގުތައް ހުރީ %0.76 މަތީގައެވެ.
