އަހުރެންގެ 3 ދަރިންގެ ތެރެއިން މިހާރު 7 އަހަރުގެ ދަރިފުޅުގެ ޢުމުރުން 5 އަހަރުގައި ފާހަގަކުރެވުނު ކަމަކީ ބޮޑާހޭކުން ގިނަ ކަމެވެ. ޙައްލަކަށް ވިސްނަމުން ގޮސް ކުރަން ފެށުނު ކަމަކީ ބޮޑާހާކަން ފަށާއިރަށް ނާސް ސޫރަތް މަންމައަށް ކިޔާލަދޭން ބުނުމެވެ. ބައެއް ފަހަރު އިޚްލާޞް ސޫރަތް ނުވަތަ ފަލަޤް ސޫރަތްވެސް ކިޔަވަން ބުނަމެވެ.
އަޅުގަނޑަށް ފާހަގަކުރެވުނު ކަމަކީ ކިޔަވައި ނިމޭއިރު ހަމައަކަށް އެޅިފައި ހުންނަކަމެވެ. ކުރިން ބޮޑާހޭކުނު ކަންވެސް ހަނދާނަކު ނުހުރެއެވެ.
ކިޔުންތެރިޔާގެ މިތަޖުރިބާއަކީ ހަމަ ރަނގަޅު ތަޖުރިބާއެކެވެ. ކުދިންގެ ކިބައިން މިފަދަ ކަންކަން ގިނަފަހަރު ފެންނަން ދިމާވާ ސަބަބުތަކުގެ ތެރޭގައި ޝައިޠޯނާގެ އުނދަގޫތައް ހިމެނެއެވެ. ވީމާ ޝައިޠޯނާ ފައިސައިލެވުމުން އެކަމުން ސަލާމަތްވެވެނީއެވެ. ދަރިފުޅު ނުކިޔަވައިފިނަމަ ދަރިފުޅަށް އަޑުއިއްވައި ބެލެނިވެރިން ކިޔަވާށެވެ!
ގުޅުންހުރި ލިޔުމެއް!:
ކިތަންމެ ކުޑަ ވަޤުތުކޮޅެއް ލިބުނަސް ކިތަންމެ މަޑުން ނަމަވެސް ޤުރްއާނުން އެންމެ ޢާޔަތެއް ނަމަވެސް ކިޔެވުމުން ލިބޭނެ ބޮޑު ފައިދާ!
ޝައިޠޯނާ އަހުރެމެންގެ ދަރިންގެ މައްޗަށް ބާރުގަދަކުރަމުން ގެންދާތީ ކަންބޮޑުނުވާ ބެލެނިވެރިއަކު މުސްލިމުންގެ ތެރޭގައި ހުންނާނެކަމަކަށް ޤަބޫލެއް ނުކުރެވެއެވެ. ހިތާމައަކީ ޝައިޠޯނާއަށް އެކަން ނުކުރެވޭނެ ގޮތް ހަދަން ކުރަންޖެހޭ ކަންކަން ކުރަން ފަސްޖެހޭ ކަމެވެ.
"ޤުރްއާން ކިޔެވޭ އަޑު އިވުމުން ޝައިޠޯނުންނަށް ވަރަށް އުނދަގޫވާނެއެވެ! ވީމާ ޝައިޠޯނާ ބަލިކުރުމަށް އޮތް އެންމެ ވަރުގަދަ އެއް ހަތިޔާރަކީ ގިނަގިނައިން ޤުރްއާން ކިޔެވުމުވެ!"
- ޑރ. މުޙައްމަދު އިޔާޟް ޢަބްދުއްލަޠީފް
ޑރ. އިޔާޟްގެ މިބަސްފުޅުން އެނގިގެންދަނީ އެމީހަކާއި ޝައިޠޯނާ ދުރަށް ޖައްސުވަން އެދޭ މީހާ ކީރިތި ޤުރްއާން ކިޔެވުން ގިނަކުރުމުގެ މުހިންމުކަމެވެ. ހަމައެފަދައިން ދަރިން ލައްވައި ޤުރްއާން ކިޔެވެވުމުން އެކުދިންނަށް ކުރާނެ ފައިދާއެވެ. އެހެނީ ޝައިޠޯނާ އާއި ދުރުހެލިވެވުމަށްވުރެ ފައިދާބޮޑު އެއްކަމެއްވެސް ނެތެވެ.
ދަރިން ޝައިޠޯނާގެ ކިބައިން ސަލާމަތްކުރުވަންވެސް އެކުދިން ލައްވައި ވީހައި ގިނައިން ކީރިތި ޤުރްއާން ކިޔުއްވާށެވެ! ކާބަފައިން ދެ ނަމާދު ދޭތެރޭގައި ކުދިން ލައްވައި ޤުރްއާން ކިޔުއްވައި ހެދީ މިފަދަ ސަބަބުތަކަށްޓަކައެވެ. އެ ރިވެތި، ފައިދާހުރި އާދަ އަލުން އަނބުރާ ގެންނަން ގަދައަޅައި މަސައްކަތްކުރަން އެބަޖެހެއެވެ.
