މުސްލިމުންނަށް ކުޅިވަރުކުޅުން ހުއްދައެވެ. މަނާވަނީ އެކުޅިވަރެއްގައި ޝިރުކާއި މުންކަރާތްތައް ހިމެނޭ ހުޅިވަރެވެ. ވީމާ ހުއްދަވެގެންވާ ކުޅިވަރުތައް ކުޅުމަކީ އެއްވެސް މައްސަލައެއް އޮތްކަމެއް ނޫނެވެ. މައްސަލައަކަށް ވެގެން މިއުޅެނީ ކުޅިވަރުގެ ތެރެއިންވެސް އިބިލީހުގެ ފަޅިއަށް ޖެހިލެވި ކުރެވޭ ކަންކަމެވެ.
މިހެން ބުނަން ޖެހެނީ ދުންމާރިއާއި ނުލައި ކުރެވޭ އެއްވެސް ކަމެއް ނެތްކަމަށް ބުނެވޭ ހިސާބަށް ދުންމާރިފުމުން ގިނަވެފައިވާތީއެވެ. ދުންމާރި ފުމެ އުފާކޮށް ލަވަކިޔައި އަތް ޖަހައި ނަށައި ހެދުމަކީ މިއަދު މީސްތަކުން އެއްވެ ކުރާ ކޮންމެ ކަމެއްގައި ކުރަމުން ގެންދާ ކަންކަމެވެ. ކުޅިވަރެއް ކުޅުނު ނަމަވެސްމެއެވެ. މިއީ އިބިލީހަށް ކޮށްދެވޭ ކަމެއްކަމާއިމެދު ވިސްނައެއް ނުލެވެއެވެ.
ކުޅިވަރުތަކުގެ ތެރެއިން ﷲ ތަޢާލާ ހުއްދަ ކުރެއްވެވި ކުޅިވަރެއް ކުޅުނުކަމުގައިވީނަމަވެސް އިބްލީސް ތަޢާރަފްކޮށްދިން ދުންމާރިން އިބިލީހަށް އޮނުފުމެނުދީ ކުޅެވޭ ކަމަކަށް މިހާރަކު ނުހަދައެވެ. މުޝްރިކުން ކުރާ ކޮންމެ ކަމެއް ކުރުމުގެ ނުބައި އާދަ މިވަނީ އެވަރަށް މުސްލިމުންގެ ތެރެއަށް ވައްދައިފައެވެ.
މިއަދު ދުންމާރިތައް ފުމެބަލާށެވެ! އިބިލީސް އުފާކޮށްދީ އެކަމުން އުފާލިބިގަނެބަލާށެވެ! ހަމައެކަނި ކޮށްލަން ޖެހޭ ކަމަކީ އެންމެ ބޮޑު ދުންމާރި ފުމެލެވޭނެކަން ޤަބޫލުކުރުމެވެ.
އެދުންމާރި ފުމެލައްވަވާނީ ﷲ ތަޢާލާގެ އަމުރުފުޅަށް އިސްރާފީލްގެފާނެވެ. އެދުންމާރީގެ އަޑާއިއެކު ﷲ ތަޢާލާގެ ޙަޟްރަތަށް ޙާޒިރުވާންޖެހޭނެ ދުވަހު ތިބާ މިއަދު ތިއަ ދުންމާރި ފުންމައިދޭ އިބިލީހަށްވެސް ހުންނަން ޖެހޭނީ އެއްވެސް ބާރެއް ނެތި ވަރަށް ރަނގަޅަށް ސައިޒުވެގެންނެވެ. ތިބާގެ ޙާލަކީ ކޮބައިހެއްޔެވެ؟
ބިރުވެތިވާށެވެ! ދުންމާރިތައް ދޫކޮށްލާށެވެ! ބޮޑު ދުންމާރީގެ އަޑަށް އިޖާބް ދޭން ޖެހޭ ދުވަހު ތިބާ ސައިޒުގައި ހުންނަން އެދޭނަމަ ތާޅަފިލިން 5 އިވެމުންދާ ބަންގީގެ އަޑަށް ފުރިހަމައަށް އިޖާބަދޭ މީހަކަށްވާށެވެ! އެންމެ މަދުވެގެން ވެސް ކޮންމެ ދުވަހަކު އަދާކުރަންޖެހޭ ފަރުޟު 17 ރަކްޢަތް އަދާކުރުންމަތީގައި ސާބިތުވެ ހުންނާށެވެ!
- އިސްލާމީ ތިލަފަތުގެ ދަރުސަކުން
