މަރްޔަމް ސާޖިދާ
އަޅުގަނޑުމެންގެ ތެރެއިން ވަރަށް ގިނައިން އިވޭ އަޑެކެވެ. 'މިނެދޭނީ މިނެދޭ ނާޅިއަންނެވެ'. ނަމަވެސް، މިއީ މާތް ވެގެންވާ އިސްލާމްދީން އަޅުގަނޑުމެނަށް ދަސްކޮށްދޭ ގޮތެއް ނޫނެވެ. އިސްލާމްދީނުގައި އޮތީ މިނެދޭ ނާޅީން މިނެދިނުމުގެ އުސޫލެއް ނޫނެވެ.
ހިސާބު ބެއްލެވޭ ދުވަހު، ހިސާބުކުރެވިގެން ދަނީ އެމީހަކު ކުޅަ އަމަލެކެވެ. އަނެކާ ތިމާ އާއިމެދު ކަންތައް ކުރި ގޮތަކީ، އަނެކާގެ ފަތުގައި ލިޔެވި ރައްކާކުރެވޭނޭ ކަންތަކެވެ. އަނެކާ ތިމާ އާއި މެދު ކަންތައް ކުރިގޮތެއްގެ ސަބަބުން ތިމާ އެގޮތަށް އަނެކާއާއި މެދު ކަންތައް ނުކުރާށެވެ. މާނައަކީ ތިބާއާއިމެދު ނުބައިކޮށް ކަމެއް ކުރިޔަސް ތިބާ އެފަދަ ނުބައި ކަމެއް ނުކުރާށެވެ.
މިއަދު އަޅުގަނޑުމެންގެ މުޖުތަމައިން ފެންނަ ވަރަށް ހިތާމެވެރި މަންޒަރެކެވެ. އެއްބަނޑު އެއްބަފާ ކުދިންނެވެ. އެކަކު އަނެކަކަށް އަނގައިން ނުބުނެ އެއް ގޭތެރޭގައި އެބައުޅުއެވެ. ނުވަތަ އެއް ގޭތެރޭގައި ނޫނަސް، އަންގައިން ނުބުނެ ރަޙިމުގެ ގުޅުން ކަނޑައިގެން އުޅެން ހެޔޮވާނެތޯއެވެ. އަޅުގަނޑުމެން އިންސާނުންނަކީ މައުސޫމު ބަޔަކީމެއް ނޫނެވެ. ކޮންމެ މީހަކީވެސް ކުށް ކުރެވޭނެ މީހެކެވެ. ކުށެއް ކުރެވިއްޖެނަ، އަވަހަށް މާފަށް އެދޭށެވެ. މާފަށް އެދުމުން އަވަހަށް މާފުކޮށް ދޭށެވެ. އަޅަމެން ހެއްދެވި، ޚާލިޤު ވަންތަ އިލާހު އަޅަމެނަށް ކުރެވޭ އެންމެހާ ކުދި ބޮޑު ފާފަތައް ފުއްސަވައިދެއްވުމުގައި އެންމެ ދީލަތިވަންތަވެވޮޑިގެންވާއިރު، އެއްވެސް އާރެއް ބާރެއް ނެތް މި ނިކަމެތި އިންސާނާއަކީ އަނެކާއަށް މާފުނުކޮށް ހުންނަން ފަހެ ކާކުތޯއެވެ.
ރަޙިމުގެ ގުޅުން ކެނޑިފައިވާނަމަ،ފުންކޮށް ވިސްނާލާށެވެ. އެއީ ބޮޑު ވެގެންވާ ފާފައެކެވެ. ރަޙިމުގެ ގުޅުން ކަނޑާ މީހުނަށް މާތްﷲ ލަޢުނަތް ލައްވާ، ރަޙުމަތުން ބޭރުކުރައްވާނެކަމަށް ވަޙީކުރައްވާފައިވެއެވެ.
"ފަހެ، ތިޔަބައިމީހުން ފުރަގަސްދީ، އެނބުރި ހިނގައްޖެނަމަ (ކުރިޔެކޭ އެއްފަދައިން) ތިޔަބައިމީހުން ބިމުގައި فساد ކޮށް، އަދި ތިޔަބައިމީހުންގެ ގާތްތިމާގެކަމުގެ ގުޅުންތައް ކަނޑައިފުމަށް ތިޔަބައިމީހުން ގާތްވެގެންވޭ ނޫންހެއްޔެވެ؟ (22) އެއުރެންނީ، އެއުރެންނަށް اللَّه لعنة ލެއްވި މީހުންނެވެ. ފަހެ، އެކަލާނގެ އެއުރެން ބީރުކުރައްވައި، އަދި އެއުރެންގެ ލޯތައް ކަނުކުރެއްވިއެވެ. (23) “ سورة محمد
އަނެކާ ތިމާއާއި އަނގައިން ނުބުނި ނަމަވެސް، ތިބާ އެމީހުންގެ ހާލު ބަލާށެވެ. ޒިޔާރަތް ކުރާށެވެ. ރަސޫލުﷲ صلى الله عليه وسلم ޙަދީޘް ކުރެއްވިއެވެ.
".ليسَ الواصِلُ بالمُكافِئِ، ولَكِنِ الواصِلُ الذي إذا قُطِعَتْ رَحِمُهُ وصَلَها - ގުޅުން ވާޞިލުކުރާ މީހަކީ އެއްޗެއް ދިނީމާ ބަދަލުގައި އެއްޗެއް ދޭ މީހާއެއްނޫނެވެ. އެހެނަސް އެއީ ރަޙިމުގެ ގުޅުން ކަނޑާ މީހުންނާ އެކު އެ ގުޅުން ވާޞިލުކުރާ މީހާއެވެ."
ތިބާ އާއި ސުވާލުވެވިގެންވަނީ ތިބާ ކުޅަ އަމަލަކާއި ބެހޭ ގޮތުންނެވެ. އަނގައިން ނުބުނެ ރަޙިމުގެ ގުޅުން ކަނޑައިގެން ތިބެން ހެޔޮ ނުވާނެއެވެ. ދެދުނިޔޭގެ ބާއްޖަވެރިކަން ލިބިގަތުމަށްޓަކައި އަޅަމެންނީ ރަޙުމުގެ ގުޅުން ދަމަހައްޓައި އާލާކުރާ ބަޔަކު ކަމުގައި ވަމާ ހިނގާށެވެ.
- މިއަދުނޫސް
