ދިވެހިރާއްޖޭގެ ޖަލުތަކަކީ ބައިނަލްއަޤުވާމީ މިންގަނޑުތަކަށް ފެތޭ، އަދި ދިވެހި ރައްޔިތުން ފަޚުރުވެރިވާފަދަ އިޞްލާޙީ މަރުކަޒުތަކަކަށް މި ސަރުކާރުގެ 5 އަހަރުގެ ދައުރުގެ ތެރޭގައި ބަދަލުކުރައްވާނެ ކަމަށް ދާޚިލީ ސަލާމަތާއި، މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙުސާން ވިދާޅުވެއްޖެއެވެ.
ވަޒީރު މިހެން ވިދާޅުވީ ޕަބްލިކް ސަރވިސް މީޑިއާއިން ކުރިއަށްގެންދިޔަ "އަހާ" ފޯރަމްގައި އާންމު ރައްޔިތަކު ކުރި ސުވާލަކަށް ޖަވާބުދެއްވަމުންނެވެ.
ޖަލުތަކުގެ މިހާރުގެ ހާލަތަށް އަލިއަޅުއްވާލައްވަމުން ވަޒީރު އިޙުސާން ވިދާޅުވީ، މި ސަރުކާރުން ހަވާލުވިިއިރު ޖަލުތަކުގެ ޖާގަ އޮތީ ވަރަށް ބޮޑަށް ދަތިވެފައި ކަމަށެވެ. ނަމަވެސް، ޖަލުތަކުގެ ކެޕޭސިޓީ އިތުރުކުރުމަށް ކުރެވުނު މަސައްކަތުން މިހާތަނަށް 400 އެއްހާ ޖާގަ އިތުރުކުރެވިފައިވާ ކަމަށާއި، މި މަހުގެ ނިޔަލަށް އިތުރު 100 ޖާގަ އިތުރުކުރެވިގެންދާނެ ކަމަށް ވަޒީރު ފާހަގަކުރެއްވިއެވެ.
ނަމަވެސް ޖަލުގެ ޖާގަ އިތުރުކުރުމުގެ މައިގަނޑު ބޭނުމަކީ އެއްވެސް ހާލެއްގައި ރައްޔިތުންތަކެއް ބަންދުކޮށްފައި ތިބުން ނޫންކަން ފާހަގަކުރައްވައި ވަޒީރު ވިދާޅުވީ، ރާއްޖޭގައި މިވަގުތު އޮތް ކުށުގެ މާހައުލަށް ބަލާއިރު، ޖަލަށް ލައިގެން ރިހެބިލިޓޭޓްކޮށް، އަނބުރާ މުޖުތަމަޢަށް ނެރެންޖެހޭ މީހުން ތިބުމުން ޖަލުތަކުގައި އެ ކެޕޭސިޓީ ހުންނަންޖެހޭ ކަމަށެވެ.
މީގެއިތުރުން، ޖަލުތަކުގެ އަސާސީ ހާލަތު ރަނގަޅުކުރުމަށް ކުރެވުނު މަސައްކަތްތަކަށް އަލިއަޅުއްވާލައްވަމުން ވަޒީރު ވިދާޅުވީ، ސަރުކާރުން ހަވާލުވިއިރު ގިނަ ގޮޅިތަކުގައި ކަރަންޓާއި ވައި ދައުރުކުރުން ފަދަ އަސާސީ ޚިދުމަތްތައްވެސް ނެތް ކަމަށެވެ.
"އަޅުގަނޑުމެން ހަވާލުވި އިރުގައި ޖަލުގެ ގިނަ ގޮޅި ތަކުގައި ކަރަންޓެއް ނެތް، ވައި ދައުރެއް ނުކުރޭ. މިހާލަތުގައި ޖަލުއޮތީ. މިހާރު 100% ޖަލު ގޮޅިތަކުގައި ހުންނާނީ ކަރަންޓު ލެވިފައި. ވައި ދައުރުކުރާނެ. އަދި ބައެއް ގޮޅިތަކުގައި ވާނީ އޭސީވެސް ކުރެވިފައި،" ވަޒީރު އިޙުސާން ވިދާޅުވިއެވެ.
ވަޒީރު އިތުރަށް ވިދާޅުވީ، ސަރުކާރުގެ އަމާޒަކީ އިރާދަކުރެއްވިއްޔާ ޖަލުތަކަކީ ދިވެހި ރައްޔިތުންނަށް އަމާން، ކުށްވެރިން ރިހެބިލިޓޭޓްކޮށްގެން އަނބުރާ މުޖުތަމަޢަށް ނެރެވޭނެފަދަ ބައިނަލްއަޤުވާމީ މިންގަނޑުތަކުން ފާސްވާ، އަދި ރައްޔިތުން ފަޚުރުވެރިވާފަދަ އިޞްލާޙީ މަރުކަޒުތަކަކަށް މި 5 އަހަރުތެރޭގައި ހެއްދެވުން ކަމަށެވެ.
