ސަރުކާރު ކުންފުނިތަކުގެ ހިންގުމުގެ ނިޒާމު ވަރުގަދަކޮށް ހަރުދަނާކުރުމަށްޓަކައި، އެއްވެސް މަސައްކަތެއް ނެތި ތިބި މުވައްޒަފުން ވަކިކުރަންޖެހޭނެކަމަށް ޤަބޫލުކުރައްވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް ވިދާޅުވީ، އެމަނިކުފާނު ވެރިކަމަށް ވަޑައިގެންނެވިއިރު ކުންފުނިތަކުން މުވައްޒަފުން ވަކިނުކުރާނެކަމަށް ވިދާޅުވި ގޮތަށް، ވޭތުވެދިޔަ 2 އަހަރު ތެރޭގައި މީހުން ވަކިކޮށް ފިޔަވަޅުތަކެއް އަޅުއްވާފައިނުވާނެކަމަށެވެ. އަދި ކުންފުނިތަކަށް ބޭނުން ނުވާވަރަށް މުވައްޒަފުން ނަގާފައިވަނީ މީގެކުރިން ސިޔާސީ މަންފާއެއް ހާސިލުކުރުމުގެ ބޭނުމުގައިކަން ފާހަގަކުރައްވަމުން ރައީސް ވިދާޅުވީ، ކުންފުނިތަކަށް ބޭނުންވާ ވަރަށް ވުރެ އެތައް ގުނައެއް އިތުރަށް މީހުން ނަގާފައިވާއިރު، އޭގެ ތެރެއިން ގިނަ މުވައްޒަފުންނަކީ އެއްވެސް މަސައްކަތެއްނެތި ހަމައެކަނި މުސާރަ ޖަމާވަމުންދާ މުވައްޒަފުންކަމަށެވެ.
މިގޮތުން ފެނަކަ ކޯޕަރޭޝަންގެ މިސާލު ނަންގަވަމުން ރައީސް ވިދާޅުވީ، ފެނަކައަކީ ރަށްރަށުގެ ޚިދުމަތްތައް ދިނުމަށް އޮތް ކުންފުންޏެއް ނަމަވެސް، އެއްވެސް މަސައްކަތެއް ނުކޮށް ގޭގައި ތިބި އެތައް ބަޔަކަށް މުސާރަ ދެމުންގޮސްފައިވާކަމަށެވެ. އަދި އޮޑިޓަރ ޖެނެރަލްގެ ރިޕޯޓުންވެސް ކުންފުނި އޮތީ އެކިކަހަލަ މައްސަލަތަކުގެ ތެރޭގައިކަން އެނގެން އޮތުމުން، ކުންފުނީގެ ޚަރަދު ކުޑަކޮށް، ޕާފޯމެންސަށް ބަލައި މުވައްޒަފުން މަދުކޮށްގެން ނަމަވެސް ހިންގުން ރަނގަޅުކުރަންޖެހޭކަމަށް ރައީސް ވިދާޅުވިއެވެ.
ރައީސުލްޖުމްހޫރިއްޔާ އިތުރަށް ވިދާޅުވީ، މުވައްޒަފުން ވަކިކުރާއިރު އެފަރާތްތަކުގެ ހާޒިރީއާއި މަސައްކަތްކުރާ މިންވަރާއި އަޚުލާޤީ މައްސަލަތަކަށް ބަލައި ވަޒަންކުރެވޭނެކަމަށެވެ. އަދި ވަކިކުރާ މުވައްޒަފުންނަށް ދެރައެއް ނުލިބޭނެހެން ރިޑަންޑެންސީ ޕެކޭޖުތަކުން ލުއިތައް ދިނުމާއި، ލުއި ލޯނުތައް ހަމަޖައްސައިދީގެން އަމިއްލަ މަސައްކަތެއް ފެށޭނެ މަގު ހޯއްދަވައިދެއްވާނެކަމަށްވެސް ރައީސް ވިދާޅުވިއެވެ.
ސަރުކާރުން އަޅުއްވަމުންދާ އިސްލާހީ ފިޔަވަޅުތަކާއެކު، މިއަހަރު ނިމޭއިރު ސަރުކާރު ކުންފުނިތަކުގައި މުވައްޒަފުން ތިބޭނީ އެ ކުންފުންޏަކަށް އެންމެ ބޭނުންވާ މިންވަރަށްކަމަށާއި، އޭގެ ސަބަބުން ކުންފުނިތަކުގެ ހިންގުމުގެ ނިޒާމު އިތުރަށް ވަރުގަދަވެގެންދާނެކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ.
