ޤައުމީ އެއަރލައިން، މޯލްޑިވިއަންގެ ސީޕްލޭން އޮޕަރޭޝަންގައި މިހާތަނަށް 1.2 މިލިއަނަށްވުރެ ގިނަ ފަސިންޖަރުން އުފުލާފައިވާކަން އެ ކުންފުނީގެ މެނޭޖިންގ ޑިރެކްޓަރ އިބްރާހިމް އިޔާސް ހާމަކުރައްވައިފިއެވެ. އިޔާސް މިކަން ހާމަކުރެއްވީ މޯލްޑިވިއަންގެ ސީޕްލޭން ޓަރމިނަލް ތަރައްޤީކުރުމަށްފަހު ރަސްމީކޮށް ހުޅުވުމަށް ބޭއްވި ޚާއްޞަ ރަސްމިއްޔާތުގައި ވާހަކަދައްކަވަމުންނެވެ.
2014 ވަނަ އަހަރުގެ އޭޕްރީލް މަހު އެންމެ 2 މަތިންދާބޯޓާއެކު ފެށި މި ޚިދުމަތަކީ މޯލްޑިވިއަންގެ ތާރީޚުގައި އައު ބާބެއް ފެށިގެންދިޔަ މުހިންމު ފިޔަވަޅެއްކަން އެމްޑީ ވަނީ ފާހަގަކުރައްވާފައެވެ. މި ޚިދުމަތުގެ ސަބަބުން ވެލާނާ އިންޓަރނޭޝަނަލް އެއާޕޯޓާއި ރާއްޖޭގެ ރިސޯޓްތަކުގެ އިތުރުން ދުރު ރަށްތައް އެއްވިއުގައަކުން ގުޅުވާލުމުގެ ވަރުގަދަ ބިންގަލެއް އެޅިގެންދިޔަ ކަމަށްވެސް އޭނާ ވިދާޅުވިއެވެ. މިއަދު 11 ޓުވިން އޮޓަރ މަތިންދާބޯޓުގެ ފްލީޓަކާއެކު ޚިދުމަތް ދެމުން އަންނައިރު، މޯލްޑިވިއަން ސީޕްލޭން ވަނީ ރާއްޖޭގެ ފަތުރުވެރިކަމުގެ ދާއިރާގެ ވަރުގަދަ ބައިވެރިއަކަށް ވެފައެވެ.
ސަރުކާރުން އިސްކަންދީގެން ސީޕްލޭންގެ ޚިދުމަތް ފުޅާކުރުމަށް ކުރެވުނު މަސައްކަތުގެ ދަށުން، ޓާމިނަލްގެ ޖާގަ ވަނީ ކުރިން ބޭނުންކުރި 10,000 އަކަފޫޓުގެ ސަރަޙައްދަށްވުރެ ދެގުނަ ބޮޑުކޮށްފައެވެ. އަދި ލައުންޖުގެ ޖާގަ ބޮޑުކޮށް، ކުޑަކުދިން ކުޅޭ ސަރަޙައްދަކާއި، ލުއިކާނާ އަދި ސްވެނިއަރ ކިއޯސްކްތަކުގެ އިތުރުން ދިވެހި މާހައުލާ ގުޅޭ އައުޓްޑޯ ސަރަޙައްދެއް ވަނީ ޤާއިމްކޮށްފައެވެ.
ކުންފުނީގެ އޮޕަރޭޝަން އިތުރަށް ވަރުގަދަކުރުމުގެ ގޮތުން، އެންމެ ފަހުގެ 2 ޓުވިން އޮޓަރ ކްލެސިކް 300ޖީ މަތިންދާބޯޓަށް އޯޑަރުދީފައިވާކަން އެމްޑީ އިޔާސް ފާހަގަކުރެއްވިއެވެ. މިއަހަރުގެ އޯގަސްޓްމަހު އޯޑަރުކުރި މި ދެ ބޯޓު އަންނަ އަހަރު ރާއްޖެ ގެނެސް އޮޕަރޭޝަނަށް ނެރުމަށް ވަނީ ހަމަޖެހިފައެވެ.
