މިއަހަރުގެ މިހާތަނަށް ރާއްޖޭގައި 37,000 އަށްވުރެ ގިނަ މީހުން ގައިންގަޔަށް ނާރާ ބަލިތަކަށް ސްކްރީންކޮށްފައިވާ ކަމަށާއި، އޭގެ ތެރެއިން 18 އިންސައްތަ މީހުންނަކީ ލޭމައްޗަށްދާ މީހުން ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކުރައްވައިފިއެވެ. ލޭމައްޗަށް ދިއުމަކީ ހިތުގެ ބަލިތަކަށް މީހުން ހުށަހެޅުމަށް މެދުވެރިވާ އެންމެ ބޮޑު އެއް ހިރާސް (ރިސްކް ފެކްޓަރ) އެވެ.
ދުނިޔޭގެ ހިތުގެ ދުވަހާ ގުޅިގެން އެޗްޕީއޭއިން ނެރުނު ރިޕޯޓުގައި ބަޔާންކޮށްފައިވާ ގޮތުގައި، މިއަހަރުގެ ސެޕްޓެމްބަރު މަހުގެ ނިޔަލަށް ޖުމްލަ 37,038 މީހުން ވަނީ ގައިންގަޔަށް ނާރާ ބަލިތަކަށް ސްކްރީން ކުރެވިފައެވެ. މި ސްކްރީނިންގްތަކުގެ ނަތީޖާއަށް ބަލާއިރު، 18 އިންސައްތަ މީހުންނަކީ ލޭމައްޗަށްދާ މީހުން ކަމަށް ފާހަގަކުރެވިފައިވާއިރު، 21.2 އިންސައްތަ މީހުންގެ ކޮލެސްޓްރޯލް މަތި ކަމަށް ވަނީ ރިކޯޑުކުރެވިފައެވެ. އަދި 10.4 އިންސައްތަ މީހުންނަކީ ހަކުރުބަލި ތަހައްމަލު ކުރަމުންދާ މީހުންނެވެ.
މިއަހަރުގެ ހިތުގެ ދުވަހުގެ ޝިއާރެއްގެ ގޮތުގައި ކަނޑައަޅާފައިވަނީ "ޑޯންޓް މިސް އަ ބީޓް" އެވެ. މި ޝިއާރުގެ އަސާސީ މަގުސަދަކީ ހިތާއި ލޭހޮޅިތަކުގެ ބަލިތަކުގެ އަލާމާތްތައް އަވަހަށް ދެނެގަނެ، ފަރުވާ އަވަހަށް ފެށުމަށް ބާރުއެޅުމެވެ. އަދި އަމަލީގޮތުން ދިރިއުޅުމުގެ ވައްޓަފާޅިއަށް އެދެވޭ ބަދަލުތަކެއް ގެނެސް، ދުރާލާ ހިތުގެ ބައްޔަށް ސްކްރީންކުރުމަށް އާންމުން އަހުލުވެރިކުރުވުންވެސް މި ޝިއާރުގެ މަގުސަދުތަކުގެ ތެރޭގައި ހިމެނެއެވެ.
ގައިންގަޔަށް ނާރާ ބަލިތަކަކީ މުޅި ދުނިޔޭގައިވެސް އަދި ރާއްޖޭގައިވެސް އެންމެ ގިނައިން މީހުން މަރުވާ އެއް ސަބަބެވެ. ތަފާސްހިސާބުތަކުން ދައްކާގޮތުގައި ރާއްޖޭގައި މަރުވާ މީހުންގެ 84 އިންސައްތައަކީ ގައިންގަޔަށް ނާރާ ބަލިތައް ތަހައްމަލުކުރާ މީހުންނެވެ. އަދި "ނޮން ކޮމިއުނިކަބްލް ޑިޒީޒް ރިސްކް ފެކްޓަރ ސަރވޭ 2020-2021" އިން ދައްކާ ގޮތުގައި، ރާއްޖޭގައި 15 އަހަރާއި 65 އަހަރާ ދެމެދުގެ އާބާދީގެ 4.7 އިންސައްތަ މީހުންނަކީ ހިތުގެ ބަލި، ސްޓްރޯކް އަދި އެންޖީނާ ފަދަ ނުރައްކާތެރި ބަލިތައް ޖެހިފައިވާ މީހުންނެވެ.
މިފަދަ ބަލިތައް ދުރާލާ ދެނެގަތުމަށާއި، ބަލިތަކަށް ހުށަހެޅޭ މިންވަރު ދެނެގަތުމަށްޓަކައި ރާއްޖޭގައި ޕްރައިމަރީ ހެލްތު ކެއަރ ނިޒާމު ހަރުދަނާކުރުމުގެ ބޮޑެތި މަސައްކަތްތަކެއް ދަނީ ކުރެވެމުންނެވެ. އެގޮތުން މާލޭގެ އިތުރުން ރާއްޖޭގެ ހުރިހާ އަތޮޅެއްގައި ސިއްހީ ދާއިރާގެ ހިދުމަތްތެރިންނަށް ތަމްރީނު ދެވި، ކުރީބައިގައި ބަލިތަކަށް ސްކްރީންކޮށް، އެ މައުލޫމާތުތައް ބެލެހެއްޓޭނެ އިންތިޒާމުތައް މިހާރު ގާއިމުކުރެވިފައިވާ ކަމަށް އެޗްޕީއޭއިން މައުލޫމާތު ދެއްވައެވެ.
