ކުރީގެ ސަރުކާރުތަކުން ފަޅުތައް ދިނީ ދައުލަތަށް ގެއްލުންވާ ގޮތަށް، ރަސްމާލެއިން 46 ބިލިއަން ރުފިޔާ ލިބޭނެ: މުއްތަލިބު
ރަސްމާލެ އެއްބަސްވުމަކީ ރާއްޖޭގެ އިގްތިސޯދު މުޅިން އެހެން ހަރުފަތަކަށް ގެންދާނެ ޑީލެއް: މުއްތަލިބު
މާޒީގައި އެކި ސަރުކާރުތަކުން ބޮޑެތި ފަޅުތަކާއި އެސެޓްތައް ދޫކޮށްފައިވަނީ ދައުލަތަށް ބޮޑެތި ގެއްލުންތަކެއް ވާ ގޮތަށް ކަމަށާއި، ނަމަވެސް ރަސްމާލެ މަޝްރޫއަކީ ރާއްޖޭގެ ތާރީޚުގައި ވެސް ދައުލަތަށް އެންމެ ބޮޑު އާމްދަނީއަކާއި މަންފާއެއް ލިބޭނެ ގޮތަށް ފަރުމާކޮށްފައިވާ އެންމެ ފައިދާބޮޑު މަޝްރޫއު ކަމަށް މިނިސްޓަރ އޮފް ހައުސިންގ، ލޭންޑް އެންޑް އާބަން ޑިވެލޮޕްމަންޓް ޑރ.އަަލީ މުއްޠަލިބު ވިދާޅުވެއްޖެއެވެ.
މީޑިއާއަކަށް ދެއްވި ޚާއްސަ އިންޓަވިއުއެއްގައި ވާހަކަދައްކަވަމުން މުއްތަލިބު ވަނީ މީގެ ކުރިން ހިންގާފައިވާ ބޮޑެތި މަޝްރޫއުތަކަށް އަލިއަޅުއްވާލައްވައި، ރަސްމާލެ މަޝްރޫއުގެ ތަފާތު ހާމަކުރައްވާފައެވެ.
އެގޮތުން، ވެލާނާ އިންޓަނޭޝަނަލް އެއާޕޯޓް ޖީއެމްއާރަށް ދިނުމަށް ވެވުނު އެއްބަސްވުމަށް އިޝާރާތް ކުރައްވައި މިނިސްޓަރު ވިދާޅުވީ، އެ ޑީލްގެ ދަށުން ސަރުކާރަށް އަޕްފްރަންޓްކޮށް ލިބުނީ 78 މިލިއަން ޑޮލަރު ކަމަށެވެ. އަދި އޭގެ ބަދަލެއްގެ ގޮތުގައި މުޅި އެއާޕޯޓް ދިނުމުގެ އިތުރުން، ފަސިންޖަރުންގެ އަތުން އެއާޕޯޓް ޑިވެލޮޕްމަންޓް ޗާޖުގެ ގޮތުގައި 25 ޑޮލަރު ނެގުމަކީ، ދައުލަތަށް ބޮޑު ގެއްލުމެއް ލިބުނު ކަމެއް ކަމަށް ވިދާޅުވިއެވެ.
"ޕެސެންޖާ އަތުން ލާރި ނަގާފަ ލާރިދޭ ގޮތަށް ހަދާފައި އޮތް ޑީލެއް އެއީ. އެހެންވީމަ ދައުލަތަށް ބޮޑު ގެއްލުމެއް ލިބޭ ޑީލެއް އެއީ." މުއްތަލިބު ވިދާޅުވިއެވެ.
މީގެ އިތުރުން، އެނބޫދޫ ފަޅު ހިއްކައިގެން ހެދި "ކްރޮސްރޯޑްސް" މަޝްރޫއަށް މުޅި ފަޅު ދޫކޮށްލީ އެންމެ 40 މިލިއަން ޑޮލަރަށް (ގާތްގަނޑަކަށް 600 މިލިއަން ރުފިޔާ) ކަން ފާހަގަކުރައްވަމުން މިނިސްޓަރު ވިދާޅުވީ، 10 އަހަރު ވެގެންދިޔައިރު ވެސް އެތަނުން ތަރައްގީ ކުރެވުނީ ފަޅުގެ އެންމެ ބައެއް ކަމަށެވެ. އަދި އެތަނުން ލިބޭ ޓީޖީއެސްޓީ އާއި ވަޒީފާތަކަށް ބަލާއިރު ދައުލަތަށް ލިބުނު ހަގީގީ މަންފާއާމެދު ސުވާލު އުފެދޭ ކަމަށް ވިދާޅުވިއެވެ.
އަދި ނިމިދިޔަ އެމްޑީޕީ ސަރުކާރުގެ އެންމެ ފަހު ދުވަސްވަރު ދޫކޮށްލި 550 ހެކްޓަރުގެ ފޮއްތެޔޮ ފަޅާ ބެހޭގޮތުން ވާހަކަދައްކަވަމުން މިނިސްޓަރު ވިދާޅުވީ، އެ ފަޅު ދޫކޮށްފައިވަނީ ދައުލަތަށް އެންމެ ފައިސާ ފޮއްޗެއްވެސް އެކުއިޒިޝަން ކޮސްޓުގެ ގޮތުގައި ނުލިބޭ ގޮތަށް ކަމަށެވެ. އަދި އޭގެ ބަދަލުގައި އެތަނުގައި އަޅާ އެއާޕޯޓް ވެސް ދައުލަތަށް ލިބުމުގެ ބަދަލުގައި 50 އަހަރަށް ޕްރައިވެޓް އެއާޕޯޓެއްގެ ގޮތުގައި ހިންގަން ދީފައިވާއިރު، އެވަރުގެ ބޮޑު ފަޅަކުން އަހަރަކު ލިބޭނީ އެންމެ 2 މިލިއަން ޑޮލަރު ކަމަށާއި، 54 ވިލާ ތަރައްގީކޮށްގެން ލިބޭނެ ޓީޖީއެސްޓީ އާއި ވަޒީފާގެ ފައިދާ އިންތިހާއަށް ކުޑަ ކަމަށް ވިދާޅުވިއެވެ.
މި މިސާލުތަކާ އަޅާބަލާއިރު ރައީސް ޑރ. މުހައްމަދު މުއިއްޒުގެ ސަރުކާރުން ރަސްމާލެ ހިއްކުމަށް އީގަލްސްއާއެކު ވެފައިވާ އެއްބަސްވުމަކީ ދައުލަތަށް ނުހަނު ބޮޑު ފައިދާއެއް އޮތް އެއްބަސްވުމެއްކަން މިނިސްޓަރު ހާމަކުރެއްވިއެވެ.
މިނިސްޓަރު މުއްތަލިބު ވިދާޅުވީ، ރަސްމާލެ މަޝްރޫއުގެ އަމަލީ މަސައްކަތް ފެށުމުގެ ކުރިން ވެސް، 5000 ހައުސިން ޔުނިޓް އެޅުމަށް ބޭނުންވާ ކަންކަން އެ ކުންފުނިން ކޮށްދޭނެ ކަމަށެވެ. މިހާރުގެ މާކެޓް ރޭޓުން ބަލާއިރު އެއީ 500 މިލިއަން ޑޮލަރު (7.7 ބިލިއަން ރުފިޔާ) ގެ އަގުހުރި މަސައްކަތެކެވެ. މިއީ އެހެން އެއްވެސް މަޝްރޫއަކުން ދައުލަތަށް އެޑްވާންސްކޮށް ނުލިބޭ ފަދަ ބޮޑު އަދަދެކެވެ.
މީގެއިތުރުން، އެ ކުންފުނިން އެތަނުގައި ތަރައްގީކުރާ 8،800 އަށްވުރެ ގިނަ ޕްރޮޕަޓީ ވިއްކައިގެން ލިބޭ ފައިސާގެ 10 ޕަސެންޓް ސަރުކާރަށް ލިބޭ ގޮތަށް ވަނީ އެއްބަސްވެވިފައެވެ.
" އަޅުގަނޑުމެން މި އެކްސްޕެކްޓުކުރަނީ އެސެސްމެންޓު ދައްކާގޮތުން 3 ބިލިއަނަށްވުރެ ގިނަ ޑޮލަރު، ގާތްގަނޑަކަށް 46 ބިލިއަނަށްވުރެ ގިނަ ރުފިޔާ ޑިވެލޮޕްމަނޓު 10 އަހަރު ނިމޭރު ސަރުކާރަށް ލިބޭނޭ. އެއީ އިތުރަށް ލިބޭ 4 ޕަސެންޓުގެ ޗާޖާއި، ޓީޖީއެސްޓީއާ، ވިޔަފާރިތަކާއި ވަޒީފާ ތަކާއި މިހުރިހާ ކަމެއްގެ އިތުރުން،" މުއްތަލިބު ވިދާޅުވިއެވެ.
މިނިސްޓަރު އިތުރަށް ވިދާޅުވީ، މި މަޝްރޫއުގެ ސަބަބުން އަހަރަކު 1 މިލިއަން ޓޫރިސްޓުން ގެނެވި، ޓޫރިސްޓުންގެ ފަރާތުން މަދުވެގެން 2 ބިލިއަން ޑޮލަރު ރާއްޖޭގެ އިގްތިސޯދުގެ ތެރެއަށް ވަންނާނެ ކަމަށެވެ. އަދި މިއީ މިހާރު މުޅި ޓޫރިޒަމް ދާއިރާއިން ލިބޭ ފައިދާގެ ތިންބައިކުޅަ އެއްބައި ކަމަށާއި، މި ޑީލަކީ ރާއްޖޭގެ އިގްތިސޯދު މުޅިން އެހެން ހަރުފަތަކަށް ގެންދިއުމަށް އެޅުނު އެންމެ މުހިންމު ފިޔަވަޅު ކަމަށް ވެސް މިނިސްޓަރު ވިދާޅުވިއެވެ.
