ދިރިއުޅުމުގައި ކުރިމަތިވާ ބައެއް އިމްތިހާނުތަކަކީ އެކަނި އުފުލަން އިންތިހާއަށް ބުރަ، ހިތްދަތި ކަންކަމެވެ. އުމުރުން 42 އަހަރުގެ މަރިޔަމް އަވްލީން ވަހީދުގެ ހާލަތަކީ މިއަދު ދިވެހި އޯގާތެރި ރައްޔިތުންގެ ދީލަތި އެހީތެރިކަމަށް އިންތިހާއަށް ބޭނުންވެފައިވާ ހިތްދަތި ހާލަތެކެވެ. އަމިއްލަ ނުކުޅެދުންތެރިކަމާއި، ހާއްސަ އެހީއަށް ބޭނުންވާ ދެ ދަރިންގެ ޒިންމާތަކުގެ އިތުރުން، ކުރިމަތިވި ހިތާމަވެރި ހާދިސާއަކަށްފަހު ފަޔަށް ލިބުނު އަނިޔާއިން ސަލާމަތްނުވެ، އަވްލީން މިއަދު މިވަނީ ބޮޑު ތަކުލީފެއްގެ ތެރޭގައެވެ.
މި ހިތާމަވެރި ހާދިސާ ހިނގަން މެދުވެރިވީ ރާއްޖެތެރޭ ރަށެއްގައި އުޅެނިކޮށްނެވެެ. ކުރުނބާ ކަނޑަން އުޅެނިކޮށް، ކަތިވަޅިން ޖެހި އަވްލީންގެ ފައިގެ ބޮޑުވައި އިނގިއްޔަށް ބޮޑު އަނިޔާއެއް ލިބުނެވެ. އެރަށު ސިއްހީ މަރުކަޒުން އެތަން ފަހައި، ފަރުވާ ދިނުމަށްފަހު މާލެ އައި ނަމަވެސް، ފަހުން ފެނިގެންދިޔައީ ހީވެސް ނުކުރާ ފަދަ ނުރައްކާތެރި އަލާމާތްތަކެކެވެ. "ދުވަސްވާން ފެށީމަ ފައި ދުޅަވާން ފެށީ. ދުޅަވެގެން ފުއްޕާ ކަންތައްވާން ފެށީ. ޑޮކްޓަރަށް ދެއްކުމުން ފުރަތަމަ ބުނީ ލޭ ގަނޑުވަނީއޭ. އެމީހުން އެކްސްރޭއާ އެއްޗެހި ނަގައިގެން ބަލާފަ ބުނީ އޮޕަރޭޝަން ކޮށްގެންނޭ ދެން އެ އިނގިލި ތެދުކުރެވޭނީ." އަވްލީން ބުންޏެވެ.
އެއާއެކު، 2022 ވަނަ އަހަރު އޭޑީކޭ ހޮސްޕިޓަލުގައި އަވްލީންގެ ފައިގެ އޮޕަރޭޝަނެއް ކުރިއެވެ. ނަމަވެސް، އެ އޮޕަރޭޝަނަށް އެތައް ދުވަހެއް ވީއިރުވެސް އަދިވެސް އޭނާގެ ފަޔަށް އެއްވެސް ލުޔެއް ނުލިބެއެވެ. އޮޕަރޭޝަން ކުރުމުންވެސް ފައިގެ ބޮޑުވާ އިނގިލި އިންނަނީ ގުދުލާފައެވެ. މީގެއިތުރުން، އާތްރައިޓްސް (ރާއްޖެ ބަލި) ހުންނާތީ ޑޮކްޓަރުން މިހާރު ލަފާދެނީ ރާއްޖެއިން ބޭރަށް ގޮސް، ފައިތިލައަށް އާ ކަށި ލައްވައިގެން މިހާރު ޖަހާފައިވާ ދެ އިސްކުރު ނެގުމަށެވެ. މި ފަރުވާއަށް އިންޑިއާއަށް ގޮސް މަދުވެގެން އެއް މަސްދުވަހު އެ ގައުމުގައި މަޑުކުރަން ޖެހޭނެ ކަމަށް ޑޮކްޓަރުން ވަނީ ބުނެފައެވެ.
"މާލެއިން ކޮށްފައި އިން އޮޕަރޭޝަނެއް އެއީ އޭޑީކޭއިން، 2022 ގައި އެ އޮޕަރޭޝަން ކޮށްފައި އިނީ. ދެން އެ އޮޕަރޭޝަން ކޮށްފަ މިހާ ދުވަސްވީއިރުވެސް އަދިވެސް ރަނގަޅެއް ނުވޭ. ދެން އެޖަހާފަ އިން ދެ އިސްކުރު ނަގަން ބުނީ." އަވްލީން ބުންޏެވެ.
އަވްލީންގެ ހާލަތު އިތުރަށް ހިތްދަތިވަނީ އޭނާގެ އާއިލީ ޒިންމާތަކާއި އަމިއްލަ ސިއްހީ ހާލަތު ހުރި ގޮތުންނެވެ. ލޮލަށް ފެނުމުގެ ދަތިކަން ހުންނާތީ އަވްލީން އަކީ އަމިއްލައަށްވެސް ހާއްސަ އެހީއަށް ބޭނުންވާ މީހެއްގެ ގޮތުގައި ރަޖިސްޓްރީވެފައިވާ ފަރާތެކެވެ. މީގެ އިތުރުން، އޭނާގެ ބެލުމުގެ ދަށުގައި ތިބި ދެ ދަރިންނަކީވެސް ހާއްސަ އެހީއަށް ބޭނުންވާ ދެ ކުދިންނެވެ. ދޮށީ ދަރިފުޅަށް އަމިއްލައަށް ހިނގާބިނގާވެ ނޫޅެވޭތީ އިންނަން ޖެހެނީ ފުރޮޅުލީ ގޮނޑީގައެވެ. ދެން ހުންނަ ކުއްޖާއަކީ އޯޓިޒަމް ހުންނަ ކުއްޖެކެވެ.
މިފަދަ ބޮޑު ޒިންމާއެއް ކޮނޑުގައި އަޅައިގެން އުޅޭ މައަކަށް، ފައިގެ މި ބޮޑު ވޭނާއެކު ހިނގާބިނގާވެ އުޅުމަކީ ކޮންފަދަ ބޮޑު ތަކުލީފެއްތޯއެވެ؟ ރާއްޖެއިން ބޭރުން ހޯދަންޖެހޭ މި ފަރުވާއަށް ބޭނުންވާ ޚަރަދުތައް ހަމަޖެއްސުމަކީ އަވްލީންގެ އާއިލާއަށް މިއަދު އަތްފޯރާ ފަށުގައިވާ ކަމެއް ނޫނެވެ.
އެހެންކަމުން، އަވްލީންގެ މި ދަތި އަދި ވޭނީ ހާލަތުން އަރައިގަނެ، އޭނާގެ ދެ ދަރިންގެ ހައްގުގައި ފަޔަށް ބޭނުންވާ އަވަސް ފަރުވާ ހޯދުމަށްޓަކައި އެދެނީ ދީލަތި އެހީއަކަށެވެ.
އަވްލީނުއަށް އެހީވުމަށް 7594462 އަށް ގުޅާލައިގެން އިތުރު މައުލޫމާތު ހޯދޭނެއެވެ.
ބީއެމްއެލް ރުފިޔާ އެކައުންޓު: 7715505470101 މަރިޔަމް އަވްލީން
ބީއެމްއެލް ޑޮލަރު އެކައުންޓު: 7730000739534 މަރިޔަމް އަވްލީމް
