އެއީ ތަނަވަސް އަންހެނެކެވެ. ފިރިމީހާދެކެ ލޯބިވާވަރުން ވަރަށް އިތުބާރުކުރެއެވެ. އަނބިމީހާގެ ކުއްޔަށްދޭ ގޭގެ ކުއްޔަށްދޭންވެސް ޙަވާލުކޮށްފައި އޮންނަނީ ފިރިމީހާއަށެވެ. ލިބޭ ފައިސާ އެކައުންޓަށް ޖަމާކުރާ ވަރެއްވެސް ނުބަލައެވެ.
ކައިވެންޏަށް ދުވަސްކޮޅެއްވޯީތަނާ ފިރިމީހާއަށް ބަދަލުތަކެއް އަންނަން ފެށިއެވެ. އަނބިމީހާ އުންމީދުކޮށްގެން ހުރީ ކަންކަން ބަދަލުވެ ހިތްހަމަޖެހުން ލިބޭނެކަމަށެވެ. އެހެން ހުއްޓައި ހިލޭ އަންހެނަކާއިއެކު ފިރިމީހާ ފިހާރައަކުން ނުކުންނަތަން ފެނުމުން ފޮޓޯއެއްނަގައި އެކުވެރިންނަށް ދައްކައިގެން އޭނާގެ މަޢުޅުމާތު އޮޅުންފިލުވިއެވެ.
އޭނާ ދިރިއުޅެނީ އަނބިމީހާގެ ގެއެއްގައެވެ. އެހެންވެ އެއްރޭ އެގެއަށް ދިއައިރު ފިރިމީހާވެސް އެގޭގައި އުޅެއެވެ. އަނބިމީހާ ޒުވާބެއް ނުކުރެއެވެ. އަންހެން މީހާގެ ކިބައިން އެދުނީ ގެހުސްކޮށް ގެއިން ނުކުތުމަށެވެ. އަންހެން މީހާ ބުނީ އެގެއަކީ އޭނާގެ ލޯބިވެރިޔާ (އަނެކާގެ ފިރިމީހާ) އޭނާއަށް ދީފައިހުރި ގެއެއް ކަމަށެވެ. ރަޖިސްޓްރީ ބަދަލުކުރަން މަސައްކަތްކުރަމުން ގެންދާ ކަމަށެވެ. އޭނާގެ ލޯބިވެރިޔާއަކީ ވަރަށް ހެޔޮ މީހެއް ކަމަށާއި ދުއްވާނެ ކާރެއް ގަނެދީފައިވާކަމަސްވެސް ބުންޏެވެ.
އެހިސާބުން އަނބިމީހާ ބުނީ ފިރިމީހާއަށް ދެވޭނީ އޭނާގެ ހަށިގަނޑު ކަމަށާއި މިގެއަކީ އޭނާގެ ގެއެއް ކަމަށެވެ. އަދި ކާރުގަނެދީފައި އެވަނީވެސް އޭނާގެ ފައިސާއިން ކަމަށާއި ކާރުގެ މައްސަލަ ނިންމާނީ ކޯޓުން ކަމަށެވެ.
ފިރިމީހާއަށް ބުނީ އެނގުރި ގެއަށް ދިއަޔަސް ގެއަށް ނުވައްދާނެ ކަމަށާއި މާދަމާ ހަވީރު އެގެވެސް ބޭރުން ތަޅުލާނެ ކަމަށެވެ. ނުނުކުމެ ތިބެއްޖެނަމަ ދޮރުހުޅުވަން ފުލުހުންނަށް ގުޅަންޖެހޭނީ ނުނުކުމެ ގޭގައި ތިބި ބައަކު ކަމަށެވެ. ވީމާ ލަސްވެގެން ހަވީރު 5 ޖެހުމުގެ ކުރިން ގެހުސްކޮށް ގެއިން ނުކުތުމަށެވެ.
އެހެން ބުނުމުން އަންހެން މީހާ އޭނާގެ ލޯބިވެރިޔާގެ ގައިގައި ބާރަށް ތަޅަން ފެށިއެވެ. މައިންބަފައިންގެ ޣާތުގައި އުޅެނިކޮށް ތަނަވަސް މީހަކަށް ހެދިގެން އޭނާއަށް އެހާބޮޑު ލަނޑެއްދިނީތީއެވެ. އިރުކޮޅަކުން އަވަސްއަވަހަށް ގެއިން ނުކުމެގެން ހިނގައްޖެއެވެ.
އޭނާ ދިއުމުން ފިރިމީހާގެ އަތުގައި އޮތް ކޭޝްކާޑާއި އެއިރު ވޮލެޓުގައި ހުރި ފައިސާ އަނބިމިހާ އަތުލިއެވެ. އެއީ އޭނާގެ އެއްޗެތިކަމަށްވާތީއެވެ. ދެން ފިރިމީހާ ގެއިން ނެރެ ގެތަޅުލާފައި އަނބިމީހާ ގެއަށް ދިއައީއެވެ. ދަމުން ފިރިމީހާއަށް ބުނީ ގޭގައި ހުރި ފިރިމީހާގެ އަންނައުނާއި އެހެން ތަކެއްޗަކީވެސް އޭނާގެ އެއްޗެތިކަމަށްވުމުން ހުރިހާ އެއްޗެއް ހަމަ މިޜޭ ފަޤީރުންނަށް ޞަދަޤާތްކޮށްލާނެ ކަމަށެވެ. ވީމާ އެއްވެސް އެއްޗެއް ހޯދަންވެސް ގެއަށް ނުދިއުމަށެވެ.
އެގޮތަށް ކަންތައް ނުކޮށް މާފުކުރުން އެދި ވަރަށް އާދޭސްކުރިއެވެ. ނަމަވެސް އެއިން އެއްވެސް އަޑެއް އިވުނު ކަމަށްވެސް ނުހަދައި އަނބިމީހާ ދިއައީއެވެ. ދިއުމުން ފިރިމީހާ ވިސްނައިލިއެވެ. ދާނީ ކޮންތަނަކަށް ކަމާއިމެދުގައެވެ. އޭނާއަށް އެހީތެރިވާނީ ކާކުކަމާއިމެދުގައެވެ. ރިޒޯޓަކުން ކުނިކަހާ މީހެއްގެ ވަޒީފާ ލިބެންދެން އުޅެންޖެހުނީ މަގުމަތީގައެވެ. ކައިހެދީ ސަލާންޖަހައިގެންނެވެ.
މިހުންނަނީ ވިސްނައިލުން މުހިންމު ޙާދިސާތަކެވެ. ތިމާއަށް ތަނަވަސް ބައިވެރިއަކު ލިބި އޭނާގެ އެހީތެރިކަމުގައި ދިރިއުޅެވޭނެ މަގުފަހިވުމުންވެސް ހިތްނުފުރޭ ކޮންމެ މީހަކަށްވެސް ޢިބްރަތްތެރި ފިލާވަޅަކަށް ފުދޭނެ ކަމަށް އުންމީދުކުރަމެވެ.
- ޞޯބިރާ / މިއަދުނޫހުގެ ކިޔުންތެރިއެއް
