ފުޢާކުރުމާބެހޭ ގޮތުން އަބަދުވެސް ބުނެވޭ އެއްވާހަކައަކީ ދުޢާކުރުމުގެ ވިސްނުން ލިބުމަކީވެސް ދުޢާ ޢިޖާބަކުރައްވަވާނެކަމަށް ލިބޭ ޔަޤީންކަމެއް ކަމަށެވެ. ގިނަ ބައަކަށް ދުޢާ ނުކުރެވެނީ އެކަމުގެ ވިސްނުން ނުލިބޭތީއެވެ. އެކަން ގިނަފަހަރު އެކަން ދިމާވަނީ އެމީހަކަށް ﷲ ތަޢާލާ އާއި ދުރުހެލިވެގެން ހުރެވޭތީއެވެ.
ދުޢާކުރުމަށްފަހު ޢިޖާބަކުރައްވަވާނެކަމަށް ޔަޤީންކޮށްގެން ހުންނަ މީހަކަށް ހިންމަވައިދެއްވަވާނެތެވެ. އިން ޝާ ﷲ. އެއީ ސުވާލުވެސް އުފައްދަން ޖެހޭ ކަމެއް ނޫނެވެ.
އަޅުގަނޑުމެންގެ ތެރެއިން ގިނަ ބައަކަށް ދުޢާކުރެވެނީ ޢިޖާބަކުރައްވަވާނެ ކަމުގެ އެއްވެސް ޔަޤީންކަމެއް ނެތިއެވެ. ޔަޤީންކަމާއިއެކު ދުޢާކުރާ ގިނަ ބައކަށްވެސް ވަޤުތުން ދުޢާ ޢިޖާބަ ނުކުރެއްވެވިނަމަ ތިބެވެނީ ޢިޖާބަކުރައްވަވާނެ ކަމުގެ ޔަޤީންކަމެއް ނެތިއެވެ. އެފަދަ މީހުން މިޙަދީޘްފުޅަށް ވިސްނައިލާށެވެ!
މާތް ނަބިއްޔާ ﷺ ޙަދީޘްކުރައްވާފައިވެއެވެ.
اُدْعُوْا اللَّهَ وَأَنْتُمْ مُوْقِنُوْنَ بِالْإِجَابَةِ ) [رواه الترمذي ٣٤٧٩ صحيحه الألباني]
މާނައީ: " ތިޔަބައިމީހުން ﷲ އަށް ދުޢާ ކުރާށެވެ. އަދި ދުޢާ އިޖާބަ ކުރައްވާނޭކަމުގެ ޔަޤީންކަމާއެކު ތިޔަބައިމީހުން ދުޢާ ކުރާށެވެ."
- ޙަދީޘްއާ މާނަ: ޑރ. މުޙައްމަދު އިޔާޟް ޢަބްދުއްލަޠީފް
